Skip to content

Skip to secondary menu

Skip to table of contents

Testemuña ba Jeová

Mambae (Ermera)

Gaeshua Koden Dar Maromak

 LISAUN 4

Sé pe Jesus Kristu?

Sé pe Jesus Kristu?

1. Jesus ma dar be?

Jesus ni pun-punun sapa pe pun atuba leb pdesi la ua?MATEUS 11:29; MARCOS 10:13-16.

Jesus ba man atub selun, tan arpil ua ba ma mori ni raea hei, ua mori belʼsi man anju id her lalehan. (João 8:23) Maromak pun mun pe Jesus, depois Jesus ajuda hel Maromak pun san seir selun. Jesus mesas pe Maromak Jeová pun isa, tan idua it gau Jesus man Maromak ni “Ana-Mane mesan”. (João 1:14) Jesus meit pun serbis sai man Maromak ni Gaes-Ubun, tan idua it meit leb gau ua “Gaeshuan”.Lee Provérbios (Amsal) 8:22, 23, 30; Koloso 1:15, 16.

2. Tan la sapa Jesus ma ni raea?

Maromak laka ni Ana-Manen ma ni raea oid muda ni morin her lalehan ma mori dar virgen id atub judeu galan Maria. Jesus ni ama rion her raea ba nei. (Lucas 1:30-35) Jesus ma ni raea oid (1) denu atuba gaes dlon kdia la Maromak, (2) oid it pun dar ua mansapa pe pun dar Maromak maski it et susar, nor (3) ne “ni morin oid soi atub dotu”.Lee Mateus 20:28.

3. It karak mloeh dar sapa?

Arpil Maromak pun atuba, ua maki pun it sai maʼi nor mate. Mambae pe it leb tadlo idia? Maromak dale la atub permeirun, Adão, tuse arpil ua pun sapa pe Biblia gau “sala”, ua hi maet. Entaun, se Adão ba pun salan id, ua hi ba maet id. (Gênesis [Kejadian] 2:16, 17; 5:5) Biblia dale tuse dar ni atuba id, pe Adão, maeta “tam” ni raea. Tan idua atub hled maet tan Adão ni salan. It karak mloeh dar sala nor maeta id be it teh dar ni Adão.Lee Roma 5:12; 6:23.

 Maski it leb tak isa it salan arpil it maet, tan it atub sala-anan it ba leb tak atub selun ni salan. Se manua, sé pe leb goeh it ni salan nor maten?Lee Salmo (Mazmur) 49:7-9.

4. Tan-sapa pe Jesus maet?

Jesus salan ba nei, ba hanesa nor it. Dlo-dlon, ua ba leb maet oid tak ni salan tan ua ba pun salan id. Mais Jesus maet oid tak atub selu ni salan. Maromak kok tu ua dob it oid laka ni Ana-Manen ma maet la it. Jesus meit dob it oid pun dar ni Aman oid ne ni morin ma tak it salan.Lee João 3:16; Roma 5:18, 19.

5. Jesus agora pun tilu bel sapa?

Arpil Jesus hi mori bel ni raea, ua kura atub moras, ne mori hael-hel la atub seir maeta, ua meit pun lehe atub seir be her terus lalan. Oid pun manua, ua kok bel sapa pe ua hi pun ni ada-airu la atub seir beʼpe pun dar Maromak. (Mateus 15:30, 31; João 5:28) Arpil Jesus maet, Maromak pun ua mori hel man anju id. (1 Pedro 3:18) Arpil Jesus hael-hel la lalehan, ua kdei ni Maromak Jeová ni lima-hanan rat Maromak ne ua kbiit oid ukun raea hled man Kornel. (Ebreu 10:12, 13) Agora tilun-ia, Jesus ukun bel man Kornel her lalehan, atub seir be pun dar ua meit haklaken bel kdia la idia her raea hled.Lee Daniel 7:13, 14; Mateus 24:14.

Ba agi ta, Jesus nor ni kbiit man Kornel hi pun lako bel terus hled, nor meit seir beʼpe pun terus. Arpil idua rat ma, rom seir beʼpe fiar la Jesus oid pun dar ua, hi et mori la nahati ni raea man se munan her jardi Eden.Lee Salmo (Mazmur) 37:9-11.