Skip to content

Skip to secondary menu

Skip to table of contents

Testemuña ba Jeová

Mambae (Ermera)

Gaeshua Koden Dar Maromak

 LISAUN 11

Mambae pe Maromak ni matadaʼan leb oid kode ma it?

Mambae pe Maromak ni matadaʼan leb oid kode ma it?

1. Tan-sapa pe it karak dar Maromak ni matadaʼan?

Mansapa Biblia ni matadaʼan ajuda it oid pun san hled nor tburu?—SALMO (MAZMUR) 36: 9.

It Lum-Ubun matenek lau hel it. Man Ama kid dob ni anan, ua notar it. Ua meit ba pun it oid it ukun lolo isa. (Jeremias [Yeremia] 10:23) Man ankao loban id karak ni inan-aman denu nahati daʼa koden la ua, it meit karak Maromak kok ni daʼan nahati ma it. (Isaías [Yesaya] 48:17, 18) Biblia ni matadaʼan pe man san koden dar Maromak, tan leb ajuda it oid et mori koden.Lee 2 Timóteo 3:16.

Maromak Jeová ni uku-huan nor ni matadaʼan denu it oid mori kode nahai lelon, idua meit kok mansapa it leb et bensaun la nahati ni ada-airu. Maromak pe pun it, ua nei diretu oid ne uku-huan nor ni matadaʼan ma it. Tan Maromak kok ni domin ma it oid ne san sirʼia, it meit karak kok agradesen nor kontenti oid pun dar ni uku-huan nor ni matadaʼan.Lee Salmo (Mazmur) 19:7, 11; Apokalipse 4:11.

2. Biblia ni matadaʼan pe sapa?

Biblia ni matadaʼan pe gaeshua dlon seir beʼpe importante. Mais uku-huan pe Maromak ni lei seir beʼpe it tenki pun dar. (Deuteronômio [Ulangan] 22:8) It meit tgu nor matenek mansapa it leb pun dar Maromak ni matadaʼan arpil it bout situasaun seir. (Provérbios [Amsal] 2:10-12) Porezemplu, Biblia denu tu Maromak pe ne morin. Idia pe matadaʼan oid leb ajuda it ni serbis hatin, ni pada, nor meit her hati selun, idia leb ajuda it pun san hled nor koidad.Lee Apóstolu 17:28.

3. Mandamentu ru beʼpe importante lau?

Jesus gase kdia la mandamentu ru importante lau. Mandamentu id pe tan-sapa Maromak pun it mori, pe oid it tadlo kdia la Maromak, oid hadomi ua nor hua-lalan oid serbi la  Maromak. Arpil it beil pun sano seir, it meit tenki notar mun kdia la mandamentu kidia. (Provérbios [Amsal] 3:6) Atub seir beʼpe pun dar mandamentu kidia hi sai Maromak ni graen, hi et mori kid kontenti rio, nor hi et mori la nahati.Lee Mateus 22:36-38.

Mandamentu dar-ma pe hi pun it ko-ron kode nor atub selun. (1 Korinto 13:4-7) Mandamentu kidia meit pun it mori dar Maromak oid kok hua-lalan kode la atub selun.Lee Mateus 7:12; 22:39, 40.

4. Mambae pe Maromak ni matadaʼan leb oid kode ma it?

Maromak ni matadaʼan leb denu familan ro mansapa rom leb kok domin la ro oid mori put-put sai se id. (Koloso 3:12-14) Biblia ni matadaʼan id denu arpil atuba id kaben, rom tenki mori put rat maet. Matadaʼan kidia leb sargout mori familan nin.Lee Gênesis (Kejadian) 2:24.

Oid mori dar sapa pe Biblia denun, idia leb ajuda it arpil it sak susar kdia la osa. Ezemplun id pe, patraun dotu karak ne serbis la atub seir beʼpe mori dar Biblia ni denun oid mori nor hua-lalan moʼo, rom meit pun serbis nor mlema. (Provérbios [Amsal] 10:4, 26; Ebreu 13:18) Maromak ni Gaeshuan meit tulun it oid ba tgu dotu, tan Biblia denu it oid kontenti nor sapa pe it nei belʼsi, denu meit oid klae mun gala koden ni Maromak ni ahen, oid ba nae se sano ka osa.Lee Mateus 6:24, 25, 33; 1 Timóteo 6:8-10.

Mori dar Biblia ni matadaʼan leb pun it etan kode nahati. (Provérbios [Amsal] 14:30; 22:24, 25) Porezemplu, Maromak ni uku-huan kdia la ba ein nawa rat mlagu, idia leb sargout it oid ba et moras ka azar seir. (Provérbios [Amsal] 23:20) Maski Jeová ba badu it ein nawa, mais it ba leb ein resi. (Salmo [Mazmur] 104:15; 1 Korinto 6:10) Maromak ni matadaʼan meit ajuda it oid kok pun-punu koden, meit denu it oid koidad kdia la sapa pe it notar her it hua-lalan. (Salmo [Mazmur] 119:97-100) Atub kristau dlon pun dar Maromak ni uku-huan nor matadaʼan, ba dlo tan rom karak et san koden la rom eta lolon mais tan karak hahiʼi Maromak Jeová.Lee Mateus 5:14-16.