Skip to content

Skip to secondary menu

Skip to table of contents

Testemuña ba Jeová

Mambae (Ermera)

Gaeshua Koden Dar Maromak

 LISAUN 8

Tan la sapa Maromak lob san klaon nor terus nei?

Tan la sapa Maromak lob san klaon nor terus nei?

1. Mambae pe san klaon nei?

Maromak lob atuba ukun lolo oid kok tu atuba ba leb rio pun lako atuba ni probleman ro

San klaon nei arpil Satanás dale gaeshua lohin la atub permeirun. Munan Satanás ba dlo anju klaon id. Maromak pun ua man anju kid salan baʼni, mais ni pnorin “ua ba hela nahati ni gaes-dlon”. (João 8:44) Ua meit karak atuba adora ua, ba dlo adora Maromak. Satanás gase-bea la Eva, bihin permeiru, ua pun bihin idia dar se ua, oid ba pun dar Maromak. Adão meit hdel se Eva oid ba pun dar Maromak. Idia ni tubun pe terus nor maten.Lee Gênesis (Kejadian) 3:1-6, 19.

Arpil Satanás gase-bea la Eva oid ba pun dar Maromak, Satanás kontra sak Maromak ni diretun oid ukun. Atub dotu pun dar Satanás oid ba teh Maromak gmes man Uku-Ubun. Oid manua Satanás sai “id beʼpe ukun raea ia nin”.Lee João 14:30; 1 João 5:19.

2. Arpil Maromak pun anju nor atuba, ua pun rom oid leb pun dar Maromak ka baʼni?

San hled-hled beʼpe Maromak pun pe kode dlo nor ba kuran san id. Arpil Maromak pun anju nor atuba, Maromak meit pun rom oid leb pun dar Maromak ni karak. (Deuteronômio [Ulangan] 32:4, 5) Maromak pun it ua meit ne liberdade oid leb loi, pun san id be koden ka klaon. Liberdade kidua ne ma it oid leb kok sai it domin la Maromak.Lee Tiago 1:13-15; 1 João 5:3.

3. Tan la sapa Maromak lob terus nei nahati rat agora?

Hoir se Adão nor Eva kontra sak rom ni Lum-Ubun, Maromak Jeová ba badu atub seir beʼpe loi oid kontra ua diretun la ukun. Tan la sapa? Oid kok tu atub ni ukun keta dar ua ba leb pun san koden la atuba hled. (Eclesiastes [Pengkhotbah] 7:29; 8:9) Tonan 6.000 ni lalan, kok ma  it mo-moʼo tu atuba ba leb rio ukun lolo mesa. Atub ni ukun ba leb oid justisan, pun lako huna, pun-punu klaon, nor san-banan.Lee Jeremias (Yeremia) 10:23; 2 Pedro 3:7-9.

Mais atub seir be teh Maromak oid ukun rom, et san koden la rom morin. (Isaías [Yesaya] 48:17, 18) Ba doʼo ta, Maromak Jeová hi pun lako atuba ni ukun hled. Atub seir beʼpe loi oid teh Maromak ni ukun mesas, pe hi hela ni raea la nahati.Isaías (Yesaya) 11:9.Lee Daniel 2:44.

4. Maromak ni pasensia lob it oid pun sapa?

Satanás dud mat tu atuba karak serbi Jeová tan rom karak et sano seir, ba dlo tan rom hadomi ua. It karak kok sai tu Satanás ni gaeshua kidia pe bea ka baʼni? Maromak ni pasensia lob it oid pun dar manua. It id-id leb loi oid teh Maromak ni ukun ka teh atub ni ukun. Dar it mori ada-adan, it hi kok sai ukun kid beʼpe it loi.Lee (Ayub) 1:8-12; Provérbios (Amsal) 27:11.

5. Mambae pe it leb kok sai tu it loi Maromak sai man it Uku-Ubun?

Sapa pe it loi kok tu it loi Maromak sai man it Uku-Ubun

It loi Maromak pe it Uku-Ubun oid nae tadlo nor pun dar sapa pe Biblia denu bel kdia la adorasaun kid dlo-on. (João 4:23) It kok tuse it ba teh Satanás ni ukun oid heh-ao ni huna nor ni san politik nin man se Jesus.Lee João 17:14.

Satanás oid ni kbiit pun atuba loi pun-punu klaon, man se morin imoral nor meit pun-punun seir beʼpe oid san klaon la atuba ni morin. Arpil it heh-ao dar pun-punu sirʼia, it maen-balan ka it graen hi goza it ka gase sak it. (1 Pedro 4:3, 4) It meit tenki pun sano id. It hi put-put nor atub seir beʼpe hadomi Maromak ka baʼni? It hi pun dar ni gaeshuan id beʼpe ua ne ma it tan ua dob it ka baʼni? Se it pun manua, it kok tu Satanás gasen pe bea arpil ua dud mat tu atuba hi ba pun dar Maromak arpil rom et susar.Lee 1 Korinto 6:9, 10; 15:33.

Tan Maromak dob atuba, ua hi pun lako san klaon nor meit terus hled. Atub seir beʼpe fiar la Maromak nor loi oid hai-hu la ni ukun hi et mori la nahati ni raea.Lee João 3:16.