Langsung mlebu

Seksi-Seksi Yéhuwah

Pilih basa Jawa

Seksi-Seksi Yéhuwah Mèlu Ngresiki Hutan ing Cedhak Lviv

Seksi-Seksi Yéhuwah Mèlu Ngresiki Hutan ing Cedhak Lviv

Ing tanggal 6 Mei 2017, ana kira-kira 130 Seksi-Seksi Yéhuwah sing mbantu ngresiki Hutan Bryukhovychi ing cedhak Lviv, Ukraina. Para rélawan sing umuré 22 nganti 80 taun kuwi manggon lan kerja ing Kantor Cabang Seksi-Seksi Yéhuwah Ukraina sing lokasiné ana ing cedhaké hutan. Mung telung jam waé, wong-wong kuwi isa ngresiki dhaérah sing ambané 50 hektar lan nglumpukké sampah sing kira-kira aboté nganti 600 kilo.

Insinyur kepala ing Pusat Penangkaran Hutan dan Pengeboran sing jenengé Mykhailo Splavinskyi ngomong, ”Seksi-Seksi Yéhuwah dadi sing pertama ndhukung gawéan ngresiki hutan iki, lan gawéan iki wis ditindakké saben taun saka taun 2014.”

Apa Sebabé Hutan Lviv Kudu Diresiki?

Insinyur Splavinskyi ngomong, ”Sing nyebabké ana sampah ing hutan iki ana loro. Kapisan, sampah sing dibuwang sembarangan karo para pengunjung. Kapindho, sampah proyèk lan sampah-sampah liyané sing digawa karo truk-truk lan dibuwang ing kéné.”

Hutan kuwi isa rusak merga sampah-sampah mau. Insinyur Splavinskyi ngomong, ”Butuh wektu suwé bèn sampah isa terurai. Sampah-sampah kuwi ya isa ngregedi banyu sing ana ing njero lemah lan akhiré nyebabké akèh masalah lingkungan.” Sampah beling isa nyebabké kebakaran hutan merga kuwi isa mantulké sinar matahari. Terus, pecahan beling lan jarum suntik bekas kuwi berbahaya, khususé kanggo bocah cilik. Dhèwèké ngomong, ”Masalah-masalah iki isa diatasi nèk hutan kuwi diresiki saka sampah-sampah.”

Ngresiki hutan sing ambané 3.300 hektar kuwi ora gampang. Insinyur Splavinskyi njelaské, ”Penjaga hutan ing kéné mung ana lima, dadi ya ora mungkin isa ngresiki kabèh. Mula, setaun pisan masyarakat dijaluki tulung kanggo mèlu ngresiki hutan iki.”

Dikumpulké, Dipisahké, lan Dibuwang

Para rélawan Seksi nggunakké sarung tangan, tas kresek, lan garu kanggo ngumpulké botol-botol, ban mobil, beling, wesi, kertas, plastik, lan jarum suntik bekas. Ihor Fedak sing kerja dadi ahli kehutanan ing dhaérah kuwi ngomong nèk ”dhaérah sing diresiki karo Seksi-Seksi Yéhuwah resik banget.”

Senajan ora diwajibké karo pamréntah, para rélawan misah-misahké sampah dadi telung jenis, yaiku sampah beling, sampah kertas, lan sampah plastik. Dadi, sampah-sampah kuwi isa didaur ulang karo perusahaan pembuangan sampah ing kono. Mulai taun 2016, Seksi-Seksi Yéhuwah gelem mbayar dhéwé kanggo prosès pembuangan sampah sing wis dikumpulké. Fedak ngomong, ”Aku maturnuwun karo Seksi-Seksi Yéhuwah merga wis mènèhi akèh bantuan.”

”Aku Ora Isin Mèlu Resik-Resik”

Seksi-Seksi Yéhuwah seneng isa mbantu ngresiki hutan saben taun. Kegiatan kuwi ana manfaaté kanggo masyarakat lan isa njaga hutan tetep resik. Volker ngomong, ”Aku ora isin mèlu resik-resik. Mbantu wong liya kuwi nggawé aku seneng lan ngrasa puas.”

Anzhelika ngomong, ”Kanggoku, sing penting dudu nggolèki sapa sing mbuwang sampah sembarangan, ning piyé carané aku isa ngresiki sampah kuwi.” Lois sing umuré 78 taun ya mèlu resik-resik. Dhèwèké ngomong, ”Pas mlaku-mlaku terus ndelok ana sampah, ketimbang awaké dhéwé dadi nesu, luwih apik sampahé dijupuk terus dibuwang.”

Wieslaw ngomong, ”Wong-wong biasané ndelok awaké dhéwé rapi wektu nginjil. Ning, awaké dhéwé ya gelem mèlu ngresiki hutan utawa nindakké gawéan liya sing ana manfaaté kanggo wong liya.”