Langsung mlebu

Lunga menyang daftar isi

Seksi-Seksi Yéhuwah

Pilih basa Jawa

 ARTIKEL PELAJARAN 30

Nginjil marang Wong-Wong sing Ora Nduwé Agama

Nginjil marang Wong-Wong sing Ora Nduwé Agama

”Aku wis nindakké sak isa-isaku kanggo mbantu kabèh wong, supaya nganggo cara apa waé aku isa nylametké sapérangan wong.”​—1 KOR. 9:22.

LAGU 82 ”Duduhna Pepadhangmu”

ISINÉ ARTIKEL IKI *

1. Piyé pandhangané wong-wong ing jaman saiki soal agama?

SAIKI, pandhangané wong-wong wis berubah. Mbiyèn, mèh kabèh wong mesthi nduwé agama. Ning, saiki saya suwé saya akèh wong sing ngakuné ora nduwé agama. Malah, ana negara-negara sing mèh kabèh penduduké ora nduwé agama. *Mat. 24:12.

2. Apa sebabé ana saya akèh wong sing ora nduwé agama?

2 Apa sebabé ana saya akèh wong sing ngakuné ora nduwé agama? * Ana sing mungkin ora mikirké soal agama merga luwih ngutamakké kesenengan utawa nduwé akèh masalah. (Luk. 8:14) Ana sing mauné nduwé agama, ning akhiré dadi atéis. Sing liyané mungkin percaya nèk Gusti Allah kuwi ana, ning ora nduwé bukti-bukti sing kuwat lan malah kerep krungu nèk urip iki asalé saka évolusi. Akhiré, wong-wong kuwi nganggep nèk agama kuwi wis ketinggalan jaman, ora ana gunané, ora masuk akal, lan ora cocog karo ilmu pengetahuan. Ana manèh sing sengit karo para pemimpin agama sing srakah lan mata dhuwiten. Sakliyané kuwi, ana negara-negara sing kegiatan agamané pancèn dilarang utawa dibatesi karo pamréntah.

3. Apa sing bakal dirembug ing artikel iki?

3 Yésus ngongkon awaké dhéwé supaya ’ndadèkké wong-wong saka kabèh bangsa dadi muridé’. (Mat. 28:19) Awaké dhéwé mesthi péngin bèn wong-wong sing ora nduwé agama isa dadi  muridé Yésus. Ning, awaké dhéwé perlu ngerti nèk latar belakangé wong-wong kuwi béda-béda. Misalé, ing Eropa, wong-wong sing ora nduwé agama mungkin ngerti soal Alkitab lan tau krungu nèk kabèh iki diciptakké karo Gusti Allah. Ning, wong-wong ing Asia mungkin ora pati ngerti utawa malah ora ngerti babar blas soal isiné Alkitab. Malah, ana negara-negara ing Asia sing wong-wongé ora percaya nèk Gusti Allah kuwi ana. Mula, tanggepané wong-wong sing ditemoni wektu nginjil isa waé béda-béda. Artikel iki bakal ngrembug carané awaké dhéwé isa nginjil marang wong-wong sing ora nduwé agama.

CARANÉ BÈN ISA BERHASIL

4. Apa sebabé awaké dhéwé perlu tetep yakin?

4 Kudu Yakin. Saben taun, ana wong-wong sing mauné ora nduwé agama akhiré isa dadi Seksi Yéhuwah. Sakdurungé dadi Seksi Yéhuwah, ana sing uripé ora nggenah lan kelakuané bejat, ning akhiré isa berubah. Sing liyané mungkin sakjané kelakuané apik, ning ora nduwé agama merga sengit karo ajaran agama sing munafik. Awaké dhéwé yakin nèk Yéhuwah isa mbantu awaké dhéwé bèn nemokké wong-wong sing ”nduwé sikap sing bener kanggo nampa urip saklawasé”.​—Kis. 13:48; 1 Tim. 2:3, 4.

Awaké dhéwé perlu nggunakké cara sing béda-béda wektu nginjil marang wong-wong sing ora percaya karo Alkitab (Deloken paragraf 5-6) *

5. Wong-wong biasané gelem nampa kabar apik merga apa?

5 Apikan lan Perduli. Wong-wong biasané gelem nampa kabar apik dudu merga apa sing awaké dhéwé omongké, ning merga carané awaké dhéwé ngomong. Wong-wong seneng nèk awaké dhéwé apikan, pangertèn, lan perduli karo wong-wong kuwi. Mungkin ana sing ora gelem nèk dijak omong-omongan soal agama karo wong sing durung dikenal. Ana manèh sing rumangsa ora nyaman nèk ditakoni pendapaté soal Gusti Allah. Sing liyané mungkin isin nèk didelok wong liya wektu maca Alkitab utawa sinau karo Seksi Yéhuwah. Aja nganti awaké dhéwé meksa wong-wong kuwi bèn ngrungokké awaké dhéwé. Awaké dhéwé kudu ngertèni perasaané wong-wong kuwi.​—2 Tim. 2:24.

6. Apa sing ditindakké Paulus wektu nginjil, lan piyé carané awaké dhéwé isa niru Paulus?

6 Piyé nèk ana wong sing ora seneng wektu awaké dhéwé nyebutké kata ”Alkitab”, ”Gusti Allah”, utawa ”agama”? Awaké dhéwé isa niru contoné Rasul Paulus. Wektu nginjil marang wong-wong Yahudi, Paulus ngutip langsung saka Kitab Suci. Ning, Paulus ora nindakké kuwi wektu nginjil marang para ahli filsafat Yunani ing Aréopagus. (Kis. 17:2, 3, 22-31) Kaya Paulus, awaké dhéwé isa nggunakké cara sing béda-béda wektu nginjil. Misalé, nèk wong sing ditemoni ora percaya karo Alkitab, awaké dhéwé ora perlu ngutip langsung saka Alkitab. Utawa, mungkin wongé isin nèk didelok wong liya wektu maca Alkitab karo Seksi Yéhuwah. Dadi, awaké dhéwé isa macakké Alkitab saka HP utawa tablèt waé.

7. Kaya sing disebutké ing 1 Korintus 9:20-23, apa sing perlu awaké dhéwé tindakké bèn isa niru contoné Paulus?

7 Pangertèn lan Ngrungokké Tenanan. Awaké dhéwé perlu ngupaya bèn isa ngerti apa sing dipikirké wong-wong lan apa alesané dhèwèké mikir kaya ngono. (WB. 20:5) Awaké dhéwé isa niru contoné Rasul Paulus manèh. Paulus kuwi kèt cilik manggon karo wong-wong Yahudi. Mula, nèk arep nginjil marang wong-wong sing dudu Yahudi, dhèwèké kudu ngupaya bèn isa ngertèni wong-wong kuwi, merga wong-wong kuwi ora pati ngerti utawa malah ora ngerti babar blas soal Yéhuwah lan Kitab Suci. Dadi, awaké dhéwé mungkin ya perlu nggolèk katrangan sing luwih akèh utawa njaluk saran saka sedulur liya, bèn isa ngerti apa sing dipikirké lan dirasakké karo wong-wong ing dhaérahé awaké dhéwé.​—Wacanen 1 Korintus 9:20-23.

8. Apa salah siji cara kanggo mulai omong-omongan soal Alkitab?

 8 Awaké dhéwé mesthi péngin ketemu karo wong-wong sing ”gelem nampa” kabar apik. (Mat. 10:11) Mula, awaké dhéwé isa nakoni pendapaté wong-wong sing dikabari lan ngrungokké tenanan. Ana sedulur ing Inggris sing takon pendapaté wong-wong soal carané bèn perkawinan isa bahagia, carané nggedhèkké anak, utawa carané ngatasi masalah. Terus, dhèwèké ngrungokké jawabané wong-wong. Bar kuwi dhèwèké ngomong, ”Aku péngin ngerti pendapaté njenengan soal naséhat sing ditulis 2.000 taun kepungkur iki.” Terus, dhèwèké nduduhké ayat-ayat sing wis dipilih saka HP-né. Ning, dhèwèké ora nyebutké nèk kuwi saka Alkitab.

CARANÉ MBANTU WONG-WONG KUWI

9. Apa salah siji cara sing isa digunakké kanggo mbantu wong-wong sing ora pati seneng nèk dijak omong-omongan soal Gusti Allah?

9 Nèk ketemu karo wong-wong sing ora pati seneng nèk dijak omong-omongan soal Gusti Allah, awaké dhéwé isa ngomongké topik liyané sing disenengi karo wong kuwi. Misalé, akèh wong seneng ngamati alam. Mungkin awaké dhéwé isa ngomong, ”Apa njenengan ngerti nèk hasil rancangané para ilmuwan akèh sing niru saka alam? Contoné, sing nggawé mikrofon niru kupingé kéwan lan sing nggawé kaméra niru mripaté kéwan. Nurut njenengan, apa kuping lan mripaté kéwan ana sing nggawé?” Sakwisé ngrungokké pendapaté, awaké dhéwé isa kandha, ”Dadi, sakjané para ilmuwan kuwi lagi niru rancangané sapa? Aku tau maca salah siji tulisan kuna sing isiné, ’Kang masang kuping apa ora miyarsa? kang yasa mripat apa ora mirsani? . . . Panjenengané kang mulangaké kawruh marang manungsa?’ Para ilmuwan ya ana sing setuju karo kata-kata kuwi lan percaya nèk kabèh iki ana sing nyiptakké.” (Ms. 94:9, 10) Terus, awaké dhéwé isa nyetèlké video ”Apa Kandhané Kancamu—Percaya Gusti Allah Ana” saka jw.org® ing bagéan ”Cah Enom”. (Deloken ing bagéan PUBLIKASI > VIDEO.) Awaké dhéwé ya isa ngekèkké brosur sing ana ing basa Indonesia, yaiku brosur Benarkah Kehidupan Diciptakan?

10. Apa cara liya sing isa digunakké kanggo mbantu wong-wong sing ora pati seneng nèk dijak omong-omongan soal Gusti Allah?

10 Akèh wong mesthi péngin nduwé masa depan sing luwih apik. Ning, akèh sing kuwatir nèk bumi iki bakal rusak utawa ora isa dienggoni manèh. Ana pinituwa wilayah ing Norwegia sing kandha nèk wong-wong sing ora  pati seneng dijak omong-omongan soal Gusti Allah biasané gelem dijak omong-omongan soal keadaan ing donya. Biasané, sakwisé ngucapké salam, dhèwèké takon, ”Nurut njenengan, piyé masa depané awaké dhéwé sukmbèn? Apa awaké dhéwé isa percaya karo janji-janjiné para pemimpin politik, ilmuwan, lan liyané?” Sakwisé ngrungokké pendapaté, dhèwèké macakké utawa ngutip salah siji ayat sing nyebutké soal masa depan. Ana sing seneng wektu ngrungokké janjiné Alkitab sing kandha nèk wong-wong sing apik bakal manggon ing bumi saklawasé.​—Ms. 37:29; Ko. 1:4.

11. Kenapa awaké dhéwé perlu nggunakké cara sing béda-béda wektu nginjil, lan piyé carané niru contoné Paulus, kaya sing dicathet ing Roma 1:14-16?

11 Awaké dhéwé perlu nggunakké cara sing béda-béda wektu nginjil. Kenapa? Merga topik sing disenengi karo wong-wong kuwi ora padha. Ana sing gelem dijak omong-omongan soal Gusti Allah utawa Alkitab. Ning, sing liyané mungkin luwih seneng nèk dijak omong-omongan soal topik sing umum dhisik. Ora soal ketemuné karo wong sing kaya apa, awaké dhéwé kudu nggunakké saben kesempatan kanggo nginjil marang kabèh wong. (Wacanen Roma 1:14-16.) Awaké dhéwé kudu éling nèk Yéhuwah isa nggawé wong-wong sing tulus nyedhak marang Dhèwèké.​—1 Kor. 3:6, 7.

NGINJIL MARANG WONG-WONG SING ORA PERCAYA KARO GUSTI ALLAH

Akèh penginjil sing perduli lan mbagèkké apa sing disinaoni saka Alkitab marang wong-wong sing dudu Kristen (Deloken paragraf 12-13)

12. Piyé carané mbantu wong-wong sing durung tau mikirké soal Gusti Allah?

12 Wektu nginjil, Seksi-Seksi Yéhuwah ketemu karo akèh wong sing ora percaya karo Gusti Allah, termasuk sing asalé saka negara-negara sing kegiatan agamané dibatesi karo pamréntah. Ing negara-negara Asia, akèh sing mungkin durung tau mikirké soal Gusti Allah. Ana sing penasaran lan dadi gelem sinau Alkitab. Ning, sing liyané mungkin ragu-ragu merga durung tau omong-omongan karo wong liya soal Alkitab. Piyé carané mbantu wong-wong kuwi? Akèh penginjil sing berhasil nginjil marang wong-wong sing kaya ngono merga nggunakké kata pengantar sing umum, nduduhké sipat apikan, lan nèk wis cocog isa nduduhké nèk pathokané Alkitab ana manfaaté kanggo urip saben dina.

13. Piyé carané bèn wong-wong dadi gelem dijak omong-omongan soal Alkitab? (Deloken gambar ing halaman 1.)

13 Akèh wong seneng wektu ngerti nèk pathokané Alkitab kuwi ana manfaaté. (Ko. 7:12) Ana sedulur wédok ing New York sing nginjil marang wong-wong sing nganggo basa Mandarin. Dhèwèké kandha, ”Aku nduduhké nèk aku perduli lan gelem ngrungokké wong-wong kuwi. Nèk ketemu karo sing lagi waé pindhah saka negara liya, aku takon, ’Apa njenengan betah manggon ing kéné? Wis éntuk gawéan apa durung? Apa wong-wong kéné apikan karo njenengan?’” Biasané wong-wong kuwi dadi gelem ngrungokké wektu dijak omong-omongan soal Alkitab. Nèk keadaané cocog, sedulur kuwi kandha, ”Nurut njenengan, piyé carané bèn awaké dhéwé isa nduwé hubungan sing apik karo wong liya? Apa aku éntuk nduduhké naséhat saka Alkitab? Alkitab kandha, ’Miwiti grejegan [utawa, ”padu”] iku kaya mbedhah bendungan, mulané mundura sadurungé wiwit grejegan.’ Nurut njenengan, apa naséhat iki ana manfaaté?” (WB. 17:14) Cara kaya ngono kuwi isa mbantu awaké dhéwé ngerti apa wongé isa diparani manèh.

14. Piyé carané sedulur lanang ing Asia Timur mbantu wong-wong sing ora percaya karo Gusti Allah?

14 Piyé nèk ketemu karo wong-wong sing ngomong nèk dhèwèké ora percaya karo Gusti Allah? Ana sedulur lanang sing kerep ketemu karo wong-wong sing kaya ngono ing Asia Timur. Dhèwèké kandha, ”Nèk ana sing ngomong, ’Aku ora percaya karo Gusti Allah,’  biasané maksudé yaiku dhèwèké ora percaya karo déwa-déwa sing disembah wong-wong. Dadi, aku ngomong, ’Aku setuju nèk déwa-déwa kuwi mung gawéané manungsa lan ora nyata.’ Terus, aku macakké Yérémia 16:20 sing isiné yaiku, ’Punapa manungsa saged damel allah kanggé badanipun piyambak? Ingkang kados makaten punika rak sanès allah!’ Bar kuwi aku takon, ’Piyé carané bèn isa ngerti Gusti Allah sing bener?’ Sakwisé ngrungokké pendapaté, aku macakké Yésaya 41:23 sing isiné, ’Mratélakna [utawa, ”Duduhna”] bab-bab kang bakal kelakon sawusé iku, supaya aku padha sumurup, manawa kowé kabèh iki nyata allah.’ Terus, aku nduduhké salah siji ramalané Yéhuwah soal masa depan.”

15. Apa sing isa disinaoni saka pengalamané sedulur lanang liya ing Asia Timur?

15 Ana sedulur lanang liya ing Asia Timur sing nyritakké pengalamané wektu marani manèh, ”Biasané aku nduduhké conto-conto soal hukum alam, manfaat saka pathokané Alkitab, lan ramalan ing Alkitab sing wis kelakon. Kuwi kabèh bukti nèk Gusti Allah bener-bener ana lan ngerti sing paling apik kanggo ciptaané. Nèk wongé gelem ngrungokké, aku nduduhké apa kandhané Alkitab soal Yéhuwah.”

16. Nurut Ibrani 11:6, apa sebabé kudu percaya karo Gusti Allah lan Alkitab, lan piyé carané mbantu wong-wong kuwi?

16 Wektu sinau Alkitab karo wong-wong sing ora nduwé agama, awaké dhéwé kudu terus mbantu bèn dhèwèké percaya nèk Gusti Allah kuwi ana. (Wacanen Ibrani 11:6.) Awaké dhéwé ya kudu mbantu bèn dhèwèké percaya karo Alkitab. Mungkin ana ajaran Alkitab sing kudu dijelaské ping bola-bali. Saben sinau, awaké dhéwé mungkin perlu ngrembug apa buktiné nèk Alkitab kuwi bener-bener saka Gusti Allah. Misalé, awaké dhéwé isa ngrembug soal ramalané Alkitab sing wis kelakon, bukti nèk Alkitab cocog karo ilmu pengetahuan lan sejarah, utawa manfaat saka naséhat-naséhaté Alkitab.

17. Apa hasilé nèk awaké dhéwé nduduhké katresnan marang wong-wong?

17 Awaké dhéwé isa mbantu wong-wong dadi muridé Yésus nèk awaké dhéwé nduduhké katresnan, ora soal wong kuwi nduwé agama utawa ora. (1 Kor. 13:1) Wektu mulang wong-wong, awaké dhéwé péngin nduduhké nèk Gusti Allah nresnani manungsa lan péngin manungsa ya nresnani Dhèwèké. Saben taun, ana éwonan wong sing dibaptis merga nresnani Gusti Allah, padahal mauné ora nduwé agama utawa ora nganggep nèk agama kuwi penting. Dadi, awaké dhéwé kudu yakin lan perduli karo kabèh wong. Awaké dhéwé ya kudu ngrungokké lan pangertèn karo wong-wong kuwi. Kuwi isa mbantu awaké dhéwé mulang wong-wong bèn dadi muridé Kristus.

LAGU 76 Kepriyé Rasané?

^ par. 5 Saiki, ana akèh wong sing ora nduwé agama. Awaké dhéwé isa waé ketemu karo wong-wong sing kaya ngono wektu nginjil. Artikel iki ngrembug piyé carané mbantu wong-wong kuwi bèn percaya karo Yéhuwah lan ajarané Alkitab.

^ par. 1 Nurut salah siji penelitian, akèh wong ing negara-negara sing disebutké iki ngakuné ora nduwé agama. Ing Eropa yaiku: Albania, Austria, Azerbaijan, Republik Ceko, Denmark, Prancis, Jerman, Irlandia, Belanda, Norwegia, Spanyol, Swedia, Swiss, lan Inggris. Ing Asia yaiku: Cina, Hong Kong, Israel, Jepang, Korea Selatan, lan Vietnam. Sakliyané kuwi, akèh wong ing Australia lan Kanada ya nduwé pandhangan sing padha.

^ par. 2 KATRANGAN: Ing artikel iki, sing dimaksud wong-wong sing ora nduwé agama kuwi ya termasuk wong-wong sing ora percaya nèk Gusti Allah ana.

^ par. 54 GAMBAR: Sedulur lanang iki nginjil marang kanca kerjané ing rumah sakit, lan wong kuwi akhiré ndelok-ndelok situs web jw.org.