2 Korintus 4:1-18

  • Cahyané kabar apik (1-6)

    • Pikirané wong-wong sing ora nduwé iman digawé peteng (4)

  • Bandha ing wadhah saka lempung (7-18)

4  Gusti Allah wis welas asih maringi tugas suci iki marang aku kabèh, mula aku kabèh ora nyerah.  Aku kabèh padha nolak tumindak sing ngisin-isini, sing didhelik-dhelikké. Aku kabèh uga ora tumindak licik utawa ngowahi* pangandikané Gusti Allah. Nanging, aku kabèh nggawé wulangan sing bener dadi kétok cetha, lan kuwi sebabé ing ngarsané Gusti Allah aku kabèh dadi conto sing apik kanggo saben wong.*  Nèk kabar apik pancèn didhelikké,* kuwi didhelikké saka antarané wong-wong sing arep disirnakké,  yaiku wong-wong sing ora nduwé iman, sing pikirané digawé peteng karo allahé donya iki.* Kuwi sebabé wong-wong kuwi ora isa ndelok cahyané* kabar apik sing mulya yaiku kabar bab Kristus, sing nduduhké marang kita kaya apa Gusti Allah kuwi.  Aku kabèh ora martakké bab awakku dhéwé, nanging aku martakké nèk Yésus Kristus kuwi Gusti, lan aku kabèh iki budhakmu demi Yésus.  Mbiyèn Gusti Allah ngendika, ”Saka ing pepeteng, dadia pepadhang”, lan saiki Panjenengané wis madhangi ati kita nganggo pangertèn sing mulya bab Panjenengané, sing sumunar liwat Kristus.*  Aku kabèh nduwé tugas istiméwa iki, senajan aku kabèh mung kaya wadhah sing digawé saka lempung nanging isiné bandha sing aji. Iki kanggo nduduhké nèk kesanggupan sing nggumunké sing padha tak duwèni iki asalé saka Gusti Allah, dudu saka awakku dhéwé.  Akèh masalah sing ngepung aku kabèh saka ngendi-endi, nanging ora nggawé aku kabèh nganti ora isa obah. Aku bingung, nanging mesthi ana cara kanggo ngatasi kuwi kabèh.*  Aku kabèh dianiaya, nanging Gusti Allah ora ninggalké aku. Aku kabèh diantemi nganti tiba, nanging ora mati. 10  Ing ngendi waé aku kabèh tansah ngadhepi bahaya arep dipatèni kaya sing diadhepi Yésus, mula uripé Yésus dadi nyata ing badané aku kabèh. 11  Ing urip, aku kabèh tansah ngadhepi pati demi Yésus, mula uripé Yésus dadi nyata ing badané aku kabèh. 12  Aku kabèh tansah ngadhepi pati, nanging kuwi ngasilké urip kanggo kowé. 13  Ana ayat sing kandha, ”Aku nduwé iman, kuwi sebabé aku ngomong.” Aku kabèh uga nduduhké nèk nduwé iman sing padha, kuwi sebabé aku kabèh ngomong. 14  Aku kabèh ngerti nèk Gusti Allah, sing nguripké manèh Yésus, uga bakal nguripké manèh aku kabèh kanggo bareng karo Yésus lan nggawa kita marang Yésus. 15  Kuwi kabèh kelakon kanggo kepentinganmu, merga nèk ana luwih akèh wong sing ngluhurké Gusti Allah kanthi cara ngucap sokur marang Panjenengané, welas asihé Gusti Allah sing nggumunké* bakal saya luwih lubèr manèh. 16  Kuwi sebabé kita ora nyerah. Senajan badan kita saya suwé saya rusak, nanging ati lan pikiran kita saya dianyarké saben dinané. 17  Kasangsaran* sing kita adhepi kuwi mung kanggo sawetara wektu waé lan ora abot. Kuwi malah nggawé kita nampa kamulyan sing unggul banget, gedhé, lan langgeng. 18  Kita ora terus nggatèkké perkara-perkara sing kita delok, nanging terus nggatèkké perkara-perkara sing ora kita delok, merga perkara-perkara sing kétok kuwi mung kanggo sawetara wektu waé, nanging perkara-perkara sing ora kétok kuwi langgeng.

Katrangan Tambahan

Utawa ”ora malsu”.
Lit.: ”kanggo hati nuraniné manungsa”.
Utawa ”dikrukubi”.
Utawa ”sistem donya iki”. Deloken Daftar Istilah.
Utawa ”pepadhangé”.
Lit.: ”wajahé Kristus”.
Utawa mungkin ”nanging ora nganti putus asa”.
Deloken Daftar Istilah.
Utawa ”pacoban”.