1 Korintus 13:1-13

  • Katresnan, dalan sing luwih unggul (1-13)

13  Nèk aku ngomong nganggo basané manungsa lan basané malaékat, nanging ora nduwé katresnan, aku padha waé kaya gong utawa simbal* sing mung mbrebegi kuping.  Nèk aku nduwé anugrah kanggo ngomongké pangandika sing diparingké Gusti Allah marang aku, lan aku isa ngerti sakabèhé rahasia suci lan pangertèn, uga nduwé iman sing kuwat banget nganti isa mindhah gunung, nanging aku ora nduwé katresnan, apa sing tak tindakké kuwi ora ana gunané babar blas.  Nèk aku nggunakké kabèh duwèkku kanggo ngopèni wong liya, lan nèk aku ngurbanké nyawaku* supaya aku bangga, nanging aku ora nduwé katresnan, aku ora bakal éntuk paédah apa-apa.  Wong sing nduwé katresnan kuwi sabar lan apikan. Dhèwèké ora seneng iri, ora ngunggul-unggulké awaké dhéwé, ora sombong,  ora tumindak kasar,* ora mung mikirké kepentingané dhéwé, lan ora gampang nesu. Dhèwèké uga ora ngéling-éling salahé* wong liya.  Dhèwèké ora bungah merga apa sing ora bener, nanging bungah merga apa sing bener.  Wong sing nduwé katresnan kuwi nanggung samubarang kabèh, percaya samubarang kabèh, tansah nduwé pangarep-arep, lan tekun ngadhepi samubarang kabèh.  Katresnan kuwi ora ana entèké.* Nanging, anugrah kanggo ngomongké pangandika sing diparingké Gusti Allah, anugrah kanggo ngomong nganggo basa liya, lan kanggo éntuk pangertèn, kuwi kabèh bakal sirna.  Merga, pangertèn kita ora lengkap, lan pangandika sing kita omongké ya ora lengkap, 10  nanging wektu sing lengkap wis teka, apa sing ora lengkap mau bakal sirna. 11  Wektu aku isih bocah, aku ngomong kaya bocah, mikir kaya bocah, lan nggawé pertimbangan kaya bocah. Nanging sakwisé aku gedhé, aku ora tumindak kaya bocah manèh. 12  Saiki, kita mung ndelok bayangan sing lamat-lamat liwat cermin sing digawé saka logam, nanging sukmbèn kita bakal ndelok kanthi cetha, kaya ndelok adhep-adhepan. Saiki pangertènku bab Gusti Allah ora lengkap, nanging sukmbèn aku bakal ngerti tenan* bab Gusti Allah, padha kaya Panjenengané ngerti tenan bab aku. 13  Senajan ngono, telung bab iki bakal tetep ana: iman, pangarep-arep, lan katresnan. Nanging sing paling unggul saka antarané kabèh kuwi yaiku katresnan.

Katrangan Tambahan

Maksudé, alat musik saka logam sing bentuké bunder cèpèr.
Lit.: ”badanku”.
Utawa ”ora tumindak ora sopan”.
Utawa ”ora nyathet kesalahané”.
Utawa ”ora bakal gagal”.
Utawa ”ngerti sakabèhé”.