Langsung mlebu

Lunga menyang daftar isi

 BAB UTAMA | JARAN PAPAT LAN SING NUNGGANG—APA PENGARUHÉ KANGGO PANJENENGAN?

Jaran Papat lan sing Nunggang—Pengaruhé kanggo Panjenengan

Jaran Papat lan sing Nunggang—Pengaruhé kanggo Panjenengan

Kitab Suci nyritakké gambaran sing cetha nèk ana swara gludhug banter banget wektu patang jaran sing gagah prakosa lan sing nunggang mulai maju. Jaran sing kapisan wernané putih. Sing nunggang jaran kuwi raja sing mulya lan lagi waé dilantik. Ing mburiné, ana jaran abang mbranang lan sing nunggang ngilangi tentrem rahayu saka ing bumi. Banjur, jaran sing katelu wernané ireng banget, sing nunggang nggawa timbangan lan ngumumké kabar bab kurang pangan. Jaran sing kapapat wernané pucet, nggawa penyakit lan bencana sing marahi mati. Sing nunggang jaran kuwi disebut Pati lan ditutké karo Kuburan, sing nglumpukké akèh nyawa.Wahyu 6:1-8.

”Aku wedi wektu sepisanan maca crita bab jaran papat lan sing nunggang. Aku rumangsa nèk Dina Pengadilan wis cedhak lan aku ora bakal slamet merga durung siap.”Crystal.

”Aku nggumun banget wektu maca crita bab jaran papat lan sing nunggang. Bareng ngerti tegesé, jebulé kuwi pancèn masuk akal kabèh.”Ed.

Piyé perasaan panjenengan bab jaran papat lan sing nunggang? Apa padha kaya Crystal, utawa kaya Ed? Crita kuwi dicathet ing buku Wahyu, buku sing kèri dhéwé ing Alkitab. Panjenengan isa éntuk paédah nèk ngerti tegesé crita kuwi. Kok isa? Panjenengan isa bungah nèk maca, sinau, lan ngetrapké apa sing ditulis ing kono. Kuwi janji saka Gusti Allah.Wahyu 1:1-3.

Sakjané, crita kuwi ora kanggo medèn-medèni. Malah, akèh wong sing wis ngrasakké nèk crita kuwi isa nguwatké iman lan ngekèki pengarep-arep sing nyenengké kanggo dina mbésuk. Panjenengan uga isa ngrasakké sing padha.