Langsung mlebu

Lunga menyang daftar isi

 PELAJARAN 43

Dosané Raja Daud

Dosané Raja Daud

Sakwisé Saul mati, Daud dadi raja. Wektu kuwi umuré Daud 30 taun. Sakwisé dadi raja pirang-pirang taun, Daud nggawé kesalahan sing gedhé. Saka lantai sing paling dhuwur ing istanané, Daud ndelok wong wédok sing ayu. Daud akhiré ngerti nèk wong wédok mau jenengé Bat-syéba. Bat-syéba kuwi bojoné prajurit sing jenengé Uria. Daud ngongkon Bat-syéba teka ing istana. Terus, wong loro kuwi nindakké hubungan sèks. Akibaté, Bat-syéba hamil. Daud nyoba nutup-nutupi dosané. Daud ngongkon kepala pasukané nugaské Uria ing barisan sing paling ngarep pas perang, terus ditinggal dhèwèkan. Sakwisé Uria mati, Daud nikah karo Bat-syéba.

Tapi, Yéhuwah ndelok kuwi kabèh. Apa sing bakal ditindakké Yéhuwah? Yéhuwah ngongkon Nabi Natan nemoni Daud. Natan ngomong, ’Ana wong sugih sing nduwé akèh domba, lan ana wong miskin sing nduwé domba siji. Wong miskin kuwi sayang banget karo dombané. Tapi, dombané wong miskin kuwi dijupuk karo wong sugih mau.’ Daud nesu, terus ngomong, ’Wong sugih kuwi pantes mati!’ Terus, Natan ngomong, ’Ya njenengan kuwi wong sugihé!’ Daud sedhih banget. Terus, dhèwèké ngakoni dosané. Daud ngomong, ’Aku wis dosa.’ Akibaté, Daud lan keluargané ngalami akèh kesusahan. Yéhuwah ngukum Daud. Tapi, Daud ora dipatèni merga wis jujur lan rendah hati.

Daud péngin mbangun bait kanggo Yéhuwah. Tapi, Yéhuwah milih anaké Daud sing jenengé Salomo kanggo mbangun bait. Mula,  Daud mulai nyiapké bahan sing dibutuhké Salomo. Daud ngomong, ’Baité Yéhuwah kudu megah. Tapi, Salomo isih enom. Mula, aku bakal mbantu dhèwèké nyiapké kabèh sing dibutuhké kanggo mbangun bait kuwi.’ Daud nyumbangké akèh dhuwit kanggo mbangun bait. Dhèwèké ya nggolèkké tukang sing trampil. Daud ngumpulké emas, pérak, lan kayu aras saka dhaérah Tirus lan Sidon. Sakdurungé mati, Daud mènèhi Salomo rancangan bait sing bakal dibangun. Daud ngomong, ’Yéhuwah ngongkon Bapak nggawé rancangan iki kanggo kowé. Yéhuwah bakal mbantu kowé. Aja wedi, ya. Kowé kudu kuwat. Bangunen bait iki.’

”Wong ora bakal isa nutupi dosané, ning wong sing ngakoni lan mertobat saka dosané bakal éntuk welas asih.”​—Amsal 28:13