Yuús ni amikrí ajasarat tusa wakérawai. ¿Yuúsa amikrí ajasminiashit? Ee, Yuúsa amikrí ajasminiaitji. Yuús Papiinium tawai, yaunchuksha aénts núkap Yuúsa amikrí ajasar tí péṉker pujuarmiayi. Abrahán (Apraám) naártin Yuúsa amikrí ajasmiayi (Sántiak 2:23). Yamaiya juisha núkap aénts Yuúsa amikrí ajasaru íruneawai. Amesha Yuúsa amikrí ajasminiaitme.

Aénts amikmamujainkia Yuúsa amikrí ajastin imía péṉkeraiti. Yuús peṉké ikiuchuiti, ni amikrí ikiukratcha aínianka (Salmo 18:25). Kuitrintin ajastinjiainkia, Yuúsa amikrí ajastin imía péṉkeraiti. Jakarkia kuitkia juchatainti, íi jakakrinkia chíkich ju aíniawai. Antsu, Yuúsa amikrí ajasar warasar pujamunka yaáksha atantramkishtatji (Mateu 6:19).

Yuúsna unuímiatki weakmin nakitiasha ártatui. Ameé shuarkesha tura amikrumkesha nakitiarminiaiti (Mateu 10:36, 37). Yaáksha wishikramainiakui, unuímiaraip turamainiakui, juní anímiasta: ¿Ya péṉker iírsat tusan wakeraj? ¿Yuúsak turutskesh aéntsuk? Watskea enentaimsakia: Tuke yurumtsuk pujustá turamainiakui, ¿yurumtsuk pujusainmeash? Atsaa. Jakamniaitme. Aíntsamek, Yuúsa amikrí ajasaip turamainiakuish iniaisaip. Yuúsna unuímiatki wetaa, ni tuke iwiáku pujustinian amastatui (Juaṉ 17:3).