Nuṉka shiiram ajasun aénts yajauch aínia emesrarat tusa, Jehová tsaṉkatkashtatui. Nuiṉkia aya ni amikríṉ pujuartatui. ¿Aénts yajauchisha urukawartatua? Nu nekatasar Noé tsawantin naṉkamasmiania nu iístai. Noé nukapee uwí pujúyayi, péṉker aéntsuyayi, tura tuke Yuúsa wakéramurin najanatniuyayi, túmaitkiusha aéntska aya yajauchiniak najaniarmiayi. Túmainiakui Jehová, Noén chicharuk juú nuṉkanam ashí aénts yajauch aínia nuna amúktasan, tí yutumtikian entsan aímkiattajai timiayi. Tura, aíntsaṉk Noén chicharuk ámeka uunt kanu najanam ameé shuarmijiai eṉkemaata jákaim timiayi (Génesis 6:9-18).

Noé ni shuarjai uunt kanun najanawarmiayi. Tí yutuktatui tusa Noé etserkamiayi, tumaitkiusha aéntska yaáksha anturkachmiayi aya yajauchiniak najanki wearmiayi. Uunt kanun najana amik, iwiáru aínia nuna eṉkéa, Noésha ni shuarjai eṉkemamiayi. Turamtai Jehová tí yutumtikiamiayi. Aintiuk nawe tsawant tura aintiuk nawe kashi yuta yutakua, entsa piak ashí nuṉkanam aimnakmiayi (Génesis 7:7-12).

 Noé ni shuarjai uwemprarmiayi, antsu aénts yajauch ármia nu jákarmiayi. Uunt kanunam nukapee tsawant eṉkemiarmia nui Jehová péṉker wainmiayi. Tura urum juú nuṉkanam yajauchikia amúkamunam apujsarmiayi (Génesis 7:22, 23). Yuús Papii tawai: Jehová ataksha juú nuṉkanam aénts yajauchin najanainia nuna amúktatui. Antsuka aénts péṉker aínia nuka, nuṉka iwiaramunam tuke iwiáku pujusartatui (2 Pítiur 2:5, 6, 9).

Yamai tsawantai, nukapee aénts yajauchin najanainiawai. Juú nuṉkanam tí itiurchat awai. Jehová, niniun etserin aínia nuna, awakeki awakeki akupeawai aéntsun nekamtikiawarat tusa. Túmaitkiusha Jehován anturkatniun nakitiainia asar, ni iwiákmarin yapajiatniun nakitiainiawai. ¿Aénts tumainia nu urúkawartatua? ¿Iwiákmarin yapajiawartimpiash? Atsaa, nukapee aénts iwiákmarin peṉké yapajiachartatui. Nuú aénts tuke amuukartin, ishichik tsawant taasai (Salmo 37:10, 11).

Nuṉkaka amuukashtatui, shiiram ajastatui. Yuúsa amikrí ajasaruka, nuṉka shiiram ajasmanum tuke iwiáku pujusartatui (Salmo 37:27-31).