Uwishniujai takakmasarat tusa Íwianch wakérawai. Jákaru aínia itit amajtiaraiṉk tusa warínkisha najatin aíniawai. Jaka iwiáku pujuiniawai tusa ashamainiak, warínkisha uwishint ampuárman takuu aíniawai. Tura uwishint ampuárma tsuakan úmin aíniawai, túruskesha yakaáma aíniawai, yaiṉkiat tusa. Aíntsaṉk chíkichkia, yajauchiniam ayamprutkat tusa warínkisha jé̱a uúk takuu aíniawai, nuinchuka jé̱a ipiknawar takakainiawai. Tura kuitrintin ajastasa, aíntsaṉk unuímiamunam túruskesha anajmanaiyamunam yaiṉkiat tusa, uwishint ampuárma tsuakan yakaáma aíniawai.

Íwianch arant ajasat takurkia, Yuúsa amikrí átiniaitji. Íwianch suntaríjiai, tura Yuús Jehová suntaríjiai apatkar iíyamka, Jehová ni suntaríjiai imía kakarmaiti (Sántiak 2:19; Apukarípsis [Revelación] 12:9). Jehová ni amikrí peṉké ikiukratcha aínia núnaka, ni kakarmarijiai yaiṉtasa tí wakérawai (Salmo 9:10).

Yuúsa chichame tawai: ‘Uwishniujai’ takakmasairap. Uwishniu takatríṉkia Jehová peṉké nakitiawai, Íwianchi ewejen iniarmin asamtai (Levítico 19:26).