1. Yuús juú nuṉkan ¿urukamtai najánamia?

Juú nuṉkanka aénts pujusarat tusa Jehová najánamiayi. Adán nuya Eva naártinian nayaimpiniam matsamsarat tusanka najánachmiayi. Nayaimpinmanka ni suntari pujusarat tusa najánkamiayi (Job 38:4, 7). Nuṉka shiiram Edén naártinnium Adán nuyá Eva naártinian Jehová apujsarmiayi (Génesis 2:15-17). Adán nuyá Eva, ni uchiríjiai juú nuṉkanam waras tuke matsamsarat tusa wakerimiayi. Salmo 37:27-31; 115:16, aujsata.

Nuṉka shiiram Edén naártinkia ashí nuṉkachuyayi. Adán nuyá Eva naártinjiai pampaki wenak ashí nuṉkan shiiram amajsartiniuyayi (Génesis 1:28). Juú nuṉkaka meserchatniuiti, aénts matsamsartin tuke átiniaiti. Salmo 104:5, aujsata.

2. Juú nuṉka ¿urukamtai shiiram nuṉkachuit?

Adán nuyá Eva naártinjiai umikcharmatai Yuús, Edén nuṉkanmania jiiki akupkarmiayi. Shiiram nuṉkan emenkakman yaaksha iwiarachuiti. Juú nuṉkanka nin enentaimtuiniatsna nuna iiktusuiti tawai Yuús Papii (Job 9:24). Génesis 3:23, 24, aujsata.

Shiiram nuṉka najánatniun enentaimmiania nuna ¿Jehová kajinmatkiniashit? Atsaa kajinmatkichuiti, ninkia tí kakaram asa chichakmarinkia ímiatrusaṉk umíniaiti (Isaías 46:10). Yama juaruk aénts itiúr pujuarmia, áintsaṉk ati tusa Yuús juú nuṉkan iwiarattawai. Salmo 37:10, 11, aujsata.

3. Juú nuṉkasha ¿itiúrak shiiram ajasat?

Yuúsa akúpeamurin, Jesús anáikiamu asa juú nuṉkan shiiram amajsattawai. Yuúsa mesetri, jeattana nuú tsawantinkia,  Jesús, Yuúsa suntarijiai, Yuúsan umirainiatsna nuna mashiniu amuktatui. Tura Iwianchnaka mil uwí jinkiar apujsattawai. Nuyá Yuúsa umirin ainiaka, Jesús uwemtikram juú nuṉkanam tuke iwiáku pujusartatui. ​Apukarípsis [Revelación] 20:1-3; 21:3, 4, aujsata.

4. ¿Waitiamush urutain amukat?

Yajauchia nuna Yuús ¿urutain amukat? Waitiamu amukatin nuntumsamunam warí ‘turunatniuya’ nuna Jesús timiayi. Yamai tí itiurchat nankamamu wainiaj nu, aénts yajauchin Yuús amuktatna nu nuntumsamun iniakmawai. Mateu 24:7-14, 21, 22, aujsata.

Jesús nayaimpiniam mil uwí juú nuṉkanam Akupin atatna nui, itiurchat yamai, iruneana nunaka mash amuktatui (Isaías 9:6, 7; 11:9). Aénts, Yuúsan umirainiaṉka ni tunaarin Jesús tsankurartatui. Tura waitiamun, jákatniuncha, sunkurnash, uuntach ajamuncha Yuús amukta timia asa Jesús amuktatui. Isaías 25:8; 33:24 aujsata.

5. ¿Shiiram nuṉkanmasha ya pujuartata?

Testigos de Jehová iruntai Jeen, nui irunkumka, áents Yuús wakéramun najánatniun unuimiania tura Yuúsan anena nekawartatme

Shiiram nuṉkanmaka aénts Yuúsan umirainia nu pujuartatui (Salmo 37:9). Kristu aénts áinian Jesús, chicharuk aénts péṉker enentain achiakainiana nu Yuúsa amikri ajasarat tusarum eakrum unuiniartarum timiayi. Yamai tsawantai Jehová, untsurí aéntsun shiiram nuṉka ajasmanum pujuarat tusa unuiniawai (2 Pítiur 2:9). Testigos de Jehová iruntai Je̱e̱n, ni shuarijiai irunainiaka warawarat Yuúsan enentaimtuiniawai. Tumainiak shiir chicham itiura iin yainmakminiaitiaj nuna unuimiainiawai. Miqueas 4:1-4, aujsata.