1. Yuús ¿urukamtai enentaimtustiniaitiaj?

Ashí irunna nuna Yuús najánkaiti. Uwír uwír tuke pujú asa tuke pujutniuiti (1 Timiutéun 1:17). Yuús Papiinium péṉker chicham ana nuka Yuúsnumia winiawai (1 Timoteo 1:11, Traducción del Nuevo Mundo [NM]). Yuús ii iwiákmarin amakrattsa asamtai aya ni enentaimtakur umirkatniuitji. Apukarípsis [Revelación] 4:11, aujsata.

2. ¿Yuússha urukuit?

Yuúska nasea ainis wainkiachmin asamtai yaaksha peṉkesh wainkiachuiti. Ninkia iiya ainis namaṉktin, ukunchtinchaiti tuma asa iincha nankamakuiti (Salmo 11:4; Juaṉ 1:18). Ni najánkamu iiyakur ni urukuit nu nekattaji. Yuús tí enentaimtairin nuyá anenkratmarin iniakmak kukuj weantu nuyá yurank weantu, nankamas najankaiti. Nuyásha mash nayaimpiniam tura juú nuṉkanam irunna nuna najana asa tí kakarmarin iniakmameawai. Rúmanam 1:20, aujsata.

Áintsaṉk, Yuús Papii aujkur Yuús urukuit nu nekattaji. Tura, Yuús aéntsun itiúr iiniait, warínia péṉker iiniait, warínia nakitniuit tura warinkish nankamakui urukniuit nuna mash aujmateawai. Salmo 103:7-10, aujsata.

3. ¿Yuússha naári takakuak?

Jesús timiayi: “Ii aparí nayaimpiniam pujamna nu, ame naáram péṉker ujukamu ati” (Mateo 6:9, NM). Yuúska “ii Uuntri” turutskesh “Uunt Yuús” tutainti túmaitkiusha nuka naárinchuiti, ninkia nekás naárin achiakeawai. Yuús Papiinmaka Jehová turutskesh Yavé tawai. Aénts chíkich chichaman chichakuka ni chichamejain Yuúsa naári tiniu áiniawai. Yuús Papii tawai: “Jehová naártiniaitme, aya amek ashí nuṉkanam Tí Nankamaku Yuúsaitme”. Salmo 83:18, aujsata.

 Chíkichkia Yuúsa naári Yuús Papiinium aárman jurusar Uunt Yuús, ii Uuntri tu aáraruiti. Yaunchu aénts yama nankamtaik Yuús Papiin aárarmiania nuinkia 7 mil íniankasan Yuúsa naári aárma amiayi. Jesús aéntsun unuiniak Yuúsa naárin nukapé pachis unuikiartimiayi. Juaṉ 17:26, aujsata.

4. ¿Yuús iin enentaimturmajik?

Juú apa ni uchirín aneana aintsank, Yuussha aéntsun anena asa pénker pujuarat tusa wakérawai

Yuús anenkratayatsha waitiamu ati tusa ¿urukamtai iniaiya? Untsurí aénts Yuúska enentaimprarat tusa waitkiarmaji, tiniu áiniawai túmaitkiusha nuka nekáschaiti. Sántiak 1:13, aujsata.

Yuúska, ni iwiákmarin tuit péṉker turutskesh tuit yajauchia nuna ninki nekawarat tusa ankant iniaitiamsaitji. Tuma asamtai Yuús tana nu najanatin imiá péṉkeraiti (Josué 24:15). Yuús ankant sukartusuana nujai nukapé aénts yajauchin najánainiawai, nu akui waitiamu awai. Péṉker najánchamun Yuús iiyak kúntuts nekapeawai. Génesis 6:5, 6, aujsata.

Jehová anenkratin asa péṉker pujuarat tusa wakérawai, tuma asa najaimiamun, yajauch irunna nuna wárik amuktatui. Nuú tsawant jeamam waitiamun ati tusa iniaiyawai. Waitiamu ati tusa urukamtai iniaiya nuna, akankamu 8 nui aujmattsattawai. 2 Pítiur 2:9; 3:13, aujsata.

5. ¿Yuúsnum itiúr weamkamniaitiaj?

Jehová winii weamkar aujtusarat tusa ipiatmaji. Ninkia chikichkimias iin enentaimturmaji (Salmo 145:18). Tura ii tunaarín tsankurkarturtasa wakérawai. Yuús ni wakéramun najánatasar kakamun péṉker iiyawai. Makchartiniaitiatar Yuúsa amikrí ajasminiaitji. Salmo 103:12-14; Sántiak 4:8, aujsata.

Yuús ii iwiákmarin sukartusu asamtai aneastiniaitji (Rúkas [Lucas] 10:27). Yuús aneamu iniakmamsattsar ¿warí itiúrkatniuitiaj? Ni urukuit nu nekaar umirkatniuitji. Nu turakur Yuúsa amikrí ajastatji. 1 Timiutéun 2:4; 1 Juaṉ 5:3, 4, aujsata.