¿WARÍ NEKÁSAIT? Aénts juní animiasaru aíniawai. Amesha aintsamek animiaschashitiam:

  • ¿Yuús iin anenmajiash?

  • ¿Máaniamu nuyá waittiamu ukunmasha amúkatniuashit?

  • ¿Jakársha uruktain?

  • ¿Ii shuar jákaru aínia nú ataksha wainkiartajiash?

  • ¿Yuús anturtukat tusar itiúr seatniuitiaj?

  • ¿Nekás warasma itiúr wainkiamniait?

¿Juú aníntramu aíniana nuna ayamuri tui eakminiaitiam? Nukapé aénts anintrakmesha, metekrákka airmakchartatui. Aénts Yuúsa enentáimtajai tuiniana nú anintrakmesha, ímiattruska airmakchartatui.

Tumaitkiusha, chikíchik papí aírmaji nekása nuna nekátniun. Jesús, Yuúsan tímiayi: “Ame chichamen nekásaiti” (Juan 17:17NM). Nú chicham Yuús Papínium aújjeaji. Yamai istatji Yuús Papínium nakak ayamu nuyá paant ana nu.

 ¿Yuús iin anenmajiash?

¿URUKAMTAI NUNA ANINTRUINIA? Yajauch tí núkap akui aénts waittiainiawai. Untsurí aénts Yuúsan enentáimtaji tuiniayat, waittiamuka Yuús wakéramuiti nii aitkiarmaji tu jintinkrattainiawai.

YUÚS PAPÍ JINTINKRATMA. “Yuúska yajauchin najanchaiti” tawai Job 34:12, NM. Yuúska anenkratin asa aéntsnan ukunam tí péṉkeran najanatniun enentáimiui, tuma asamtai Jesús juní seatarum tusa jintinkrattamiayi: “Ii aparí nayaimpiniam pujamna nú, [ . . . ] Nayaimpiniam nuyá nuṉkásha ame wakéramna aíntsank najannati” (Mateo 6:9, 10NM ). Yuús nekás anenkrata asa uchirin chikichkiniak akupturmakmiaji ju nuṉkánam ni wakéramuri umínkiat tusa (1 Juan 4:9).

Juisha aujsatarum Génesis 1:26 -28, NM; Santiago 1:13; 1 Pedro 5:7.

¿Máaniamu nuyá waittiamu ukunmasha amúkatniuashit?

¿URUKAMTAI NUNA ANINTRUINIA? Núkap aénts máaniamunam jainiawai. Turuskesh warínmansha waittiainti.

YUÚS PAPÍ JINTINKRATMA. Yuús nuṉkán péṉker amajsattajai tímiayi. Yuúsa ikratmari juareakui aénts mesetnasha unuimiatrachartatui. “Yuús ashí nuṉka tepakmanum mai máania ajamuncha amúktatui” (Salmo 46:9NM ). Nuyásha Yuús yajauchin tura waittiamun amúktatui. Yuús Papínium turamji: “Yus ni neajkin ujujturartatui. Tura nuik amia nuka ashí amuukarmatai jákatniusha, uuttincha, wáitsatniusha, tura najaimiatniusha atsuttawai” (Revelación 21:4).

Juisha aujsatarum Salmo 37:10, 11, NM; Miqueas 4:1- 4, NM.

¿Jakársha uruktain?

¿URUKAMTAI NUNA ANINTRUINIA? Núkap aénts Yuúsan enentáimtaji tuiniayat jakakrincha wakankia iwiaku pujúwiti, nuyá péṉkerka nayaimpiniam wenawai tura yajauchikia jinium wenawai túu jintinkrattainiawai. Untsurí aénts jákaruka itiurchat amajtamsamniaitji tiniu aíniawai.

YUÚS PAPÍ JINTINKRATMA. Jákaruka iwiakmari amunawai antichuiti, chichachuiti, wainmachuiti. Yuús Papí tawai: “Jákaruka peṉké enentáimcha aíniawai” (Eclesiastés 9:5NM ). Tuma ásar, yaínkiachmin nuyá iwiakuncha yajauch amajcha aíniawai (Salmo 146:3, 4NM ).

Juisha aujsatarum Génesis 3:19, NM; Eclesiastés 9:6, 10, NM.

 ¿Ii shuar jákaru aínia nú ataksha wainkiartajiash?

¿URUKAMTAI NUNA ANINTRUINIA? Ii shuarijiai ju nuṉkánam mash warasar pujústasar wakéraji. Aínis asamtai ii shuar jákaru aínia nú ataksha wainkiatasar wakéraji.

YUÚS PAPÍ JINTINKRATMA. Untsurí aénts jákaru aíniana aú nantakiartatui. Yuús Papí tawai: ‘Pénker aents nútiksan yajauch aents nantakiartatui’ (Hechos 24:15). Aénts nantainiaka juú nuṉkánam matsamsartatui nuyá, Yuús emka timia aíntsank nuṉka yapajnian wainkiartatui (Isaías 65:21-25NM ). Ukunam nuṉka péṉker ajasmanum aénts Yuúsa umirainiaka sunkurmatsuk tuke iwiaku warasar pujusartatui. Yuús Papí tawai: “Yuúsan umirainia ju nuṉkánam tuke iwiaku matsamsartatui” (Salmo 37:29, NM).

Juisha aujsatarum Job 14:14, 15, NM; Lucas 7:11-17.

¿Yuús anturtukat tusar itiúr seatniuitiaj?

¿URUKAMTAI NUNA ANINTRUINIA? Untsurí aénts Yuúsan seainiaksha anturtamtsuji tiniu aíniawai.

YUÚS PAPÍ JINTINKRATMA. Jesús unuikiarturmiayi: “Yuús seakum nú chichamak awakeki, awakeki tip tímiayi” (Mateo 6:7NM ). Yuús anturtukat takurkia ni wakérana aíntsank seatniuitji. Tura tuit ni wakéramuri nu nekátniuitji nuyá ímiattrusrik seatniuitji. “Warínkish ni wakéramuri seamka, ni anturtamji” tawai 1 Juan 5:14, NM.

Juisha aujsatarum Salmo 65:2, NM; Juan 14:6; 1 Juan 3:22.

¿Nekás warasma itiúr wainkiamniait?

¿URUKAMTAI NUNA ANINTRUINIA? Untsurí aénts kuittrinniaitkiur, shirmaitkiur nuyá paant ajamujai warasminiaitji tu enentáimin aíniawai. Tumaitkiusha, waras pujú aíniatsui.

YUÚS PAPÍ JINTINKRATMA. Nekás itiurá warasar pujusminiaitiaj nuna Jesús tímiayi: “Yuúsa chichamen antukar, umíniana nú waraú aíniawai” (Lucas 11:28NM ). Aya Yuúsna unuimiatkur warastatji. Yuús Papínium nuka awai, nu nekárkia péṉker nuyá péṉkercha nekátniun yaínmaktatji. Yuús Papí unuimiattrar umiakríkia ii iwiakmari péṉker atatui.

Juisha aujsatarum Proverbios 3:5, 6, 13 -18, NM; 1 Timoteo 6:9, 10.

 Yuús Papínium iisar ujúk aníntramu aímkiaji. ¿Nú núkap nekátasa wakéramek? Amesha Yuúsa chichame antukam nuyá umiktasam wakérakmeka, núkap nekáttsa wakéruktatme. Amesha anímiatsmeash nekás Yuús anenkratniuitkiunka urukamtai yajauch nuyá waittiamu ati tusa iniaiya. Turuskesh nekáttsa wakératsmeash ameé shuarmijiai warasam pujústasmea. Yuús Papí péṉker aírmaji ashí aníntramuncha.

Tumaitkiusha núkap aénts Yuús Papín aujsatniun nakitin aíniawai, nu papíkia nekáshmin itiurchat esarmaiti tiniu aíniawai. ¿Yuús Papí nekátin yaínkiarat tusa wakérukainmeash? Yuús Jeuwánun etsérin aínia yaínmakartasa wakeruiniawai. ¿Itiurá yaínmakarminiait?

Nií papí aárman achiakainiawai ¿Qué enseña realmente la Biblia?, taman, Yuús Papí nekátniun yaínmaktasar najanawaruiti. Yuús Jeuwánun etsérin unuitiamramniaiti Yuús Papín kuitchajai tuke atsakamutin ame je̱emin turuskesh tui ame wakéramna nui. Urutaimpia tsáwant achiakam nui. Núkap aénts Yuúsa Papírin unuimiarar péṉker yaínkiam, nekása nuna nekáwar warasaruiti.

Yuús Papí tí yaínmajnia nú amesha nekámniaitme. Yaunchuka uwishin nuyá warínkish ashámtai, yamaikia Yuús Papí unuimiarar ashámatsji. Nuyá ukunam péṉker atatna nú nakakur warasar pujáji. Jesús ninki tímiayi: “Nekas ana nu nekaattarme tura nekas ankant ajastatrume” (Juan 8:32).