Islandia nunkánmaiti.

México nunkánmaiti.

Guinea-Bissau nunkánmaiti.

Filipinas nunkánmaiti.

Juú papiinium nakumkamu waínmena aintsar, Testigos de Jehovátikia ii irúntairin Yuús enentáimtustasar wéakur pénker iwiármamprar wéaji. Urúkamtai pushí pénker entsártiniaitiaj? Tura urúkamtai ii iniashisha pénker iímiastiniaitiaj?

Yuús arántakur pénker iwiármamniuitji. Yuuska aentsu iírkarinkia iírchaiti, antsu aentsu enentaín Yuús pénker nékareawai (1 Samuel 16:7). Túmaitkiuisha Yuús enentáimtustasar ii irúntairin pénker iwiármamprar wéaji. Nu túrakur Yuús Jehová tura ii yachisha arántuiniaji. Watskea jui enentáimsatai: uunt alcáldejai chichástasar wéakur, nánkamsar entsarar wéatsjiapi. Antsu arántakur pénker iwiármamprar wéajiapi. Áintsarik, ii Yuusri Jehová arántakur, ii irúntairin pénker iwiármamprar wéaji (1 Pítiur 2:17).

Yuús Papiinium pushí júnisrum entsártiniaitrume tana nu umíakur pénker iwiármamji. Yuús Papií tawai: “Iwiarmamuk nekasmiancha péṉker enentáiji̱a̱i̱ entsararti” (1 Timiutéun 2:9, 10). “Nekasmiancha” tana nuka, kaki tura sumpít entsárchatniun, tura pushí shiirmach entsákrisha iírsarat tusar entsárchatniun tawai. Tura “péṉker enentáiji̱a̱i̱” tana nuka, pushí entsákrisha nánkamsar entsárchatniun tawai. Antsu pushí pénker iisár tura pénker enentaimprar iwiármampratniun tawai. Tura pushí entsákrisha pénker iwiármamprattsar iik iímiastinian Yuús Papií tana nu yaínmaji. Tura aintsank, ‘ii Uwemtikramin Yusri̱ chichame̱ shíiraiti, tu enentáimtikrattaji’, tura Yuussha ‘shiir awajsáttaji’ (Titiun [Tito] 2:10; 1 Pítiur 2:12). Irúntramunam pushí pénkera nu entsarár wéakur, nekás Kristu aéntsuitji tusar iniákmameaji.

Testigos de Jehová irúntairin wétinian pushí pénkeran achíaktsujai tiip. Pushí ti kuitjiai sumákchamuitkiusha, wapikcha, pénker nijiamu átiniaiti.

  • Yuús enentáimtustasar irúntrattsar wéakur urúkamtai pénker iwiármamprar wétiniaitiaj?

  • Iwiármampratniuncha Yuusa chichame itiúr jintínkratea?