‘Yuús ni nea̱jkin u̱ju̱kturartatui.Tura nuik amia nuka ashí amuukarmatai jákatniusha, úttincha, wáitsatnuisha tura najaimiatniusha atsuttawai.’ (Apukarípsis 21:3, 4, Yusa Chichame Aarma.)

Yuúska itiurchat amajkartichuiti titiatji  (Sántiak 1:13).

Yuús íi waitiamun nékana nu nekaar warastatji  (Sakarías 2:8).

Ukunmatainkia waitiamuka atsuttawai tana nu nekár, péṉker enentaímprattaji  (Yus Kanta 37:9-11).

Juú enentai ákui nekásaiti timiniaitji:

• Waitiamun tura nakakea nu najanchamun Yuús peṉké nakitniuiti. Yaunchuk Yuús Jeuwá, ni aéntsrin tí waitkiainiakui ¿itiúr nekapramia? Yuús Papii tawai, Yuús Jeuwá waitmiayi, ni aéntsrin, Yuúsan enentaímtichu armia nu, ‘waitkiainiakui’ (Sumamtikin 2:18).

  Aénts, ni ain waitkiana nunaka Yuús suir iíyawai.Yuús Papii tawai “mankartamunka” peṉké nakitiawai (Nekatai̱n Jintinkiartin 6:16,17).

• Yuúska chikichkimias tí enentaímturmaji. Yuús Jeuwá itiurchatrum ashí iktusta, ninkia ‘amín ti enentaímturmawai’ (1 Pítiur 5:7).

Ashí aéntsu waitiamurin Yuúsa iíkratmari amuktatui (Matéu 6:9, 10). Nu tsawant jeamam yamaiya jui, péṉker enentaijiai, Yuús ninin weamainianka, waitnentamujai atsankainiawai (Túramuri̱ 17:27; 2 Kurintiunam 1:3, 4).