Wa de iina dis

•  Wa it miin wen wan man an wan uman a taak?

•  Yu tingk yu redi fi staat taak tu sumadi?

 Wa it miin wen wan man an wan uman a taak?

 Som piipl fiil se wen wan man an wan uman a taak, a sitn we piipl dis du fi enjai demself. Bot wi a-go a taak bout wen wan man an wan uman a taak an a spen taim wid dem wan aneda fi si ef it wuda gud fi di tuu a dem marid. So wen dem a taak, a no plie ting dat, an dem no fi jos a du it kaa dem waahn sumadi iina dem laif fi mek dem fiil gud.

 Afta a taim, di tuu a dem afi go mek op dem main ef dem a-go marid tu dem wan aneda ar ef dem a-go tap taak. So sins eni giem kyan plie, bifuo yu an sumadi staat taak mek shuor se yu redi.

 Di mien ting: Ef yu fiil se yu redi fi staat taak tu sumadi, yu afi mek shuor se yu redi fi marid tu.

 Yu tingk yu redi fi staat taak tu sumadi?

 Wen yu an sumadi staat taak, unu mait-a en op marid. So yu afi tingk bout di kain-a wiez dem we yu av an ou dat kyan elp unu ar mek tingz wos fu’unu. Tingk bout dem ya:

•   Ou yu diil wid yu fambili. Di wie ou yu diil wid yu fambili, wos wen yu schres out, kyan elp yu fi si ou yu mait-a en op diil wid di sumadi we yu marid tu.

   Sitn fram di Baibl we yu kyan riizn pan: “Tap kyari beli fi unu wan aneda, an beks op beks op an a get mad wid unu wan aneda—tap it. Tap kos out an tier dong unu wan aneda an unu no fi wikid tu unu wan aneda niida.”—Ifiijan 4:31.

   Aks yuself: ‘Mi mada an faada, an mi breda an sista dem wuda se mi rispek dem? Wen mi an non a dem beks, mi taak tu dem iina wan nais wie ar mi gwaan laik mi a at ed?’

•   Ou yu fiil wen yu afi gi op tingz. Wen yu marid, nof a di taim yu a-go afi tingk bout wa di ada sumadi waahn fi du insted-a wa yu waahn fi du.

   Sitn fram di Baibl we yu kyan riizn pan: “Nobadi fi a luk out fi demself wan, dem fi a luk out fi dem nieba dem tu.”—1 Korintiyan 10:24.

   Aks yuself: ‘Mi lov mi uon wie? Piipl tingk se mi aad an faas? Wa mi du fi shuo se mi a tingk bout ada piipl muor dan mi uona self?’

•   Yu a ombl yuself? Ef yu a-go bi wan gud ozban ar waif, yu gweehn afi nuo ou fi uon op tu it wen yu du sitn rang an se yu sari.

   Sitn fram di Baibl we yu kyan riizn pan: “Aal a wi du rang sitn nof taim.”—Jiemz 3:2.

   Aks yuself: ‘Wen mi du sitn rang, mi uon op tu ar mi eva a fain ekskyuuz fi wa mi du? Wen mi get jraa op, mi get beks ar av aaf di sumadi?’

•   Ou yu anggl moni. Wan a di mien ting we kaaz prablem fi marid piipl a moni. So ef yu nuo ou fi anggl yu moni gud, dat wi elp yu wen yu marid.

   Sitn fram di Baibl we yu kyan riizn pan: “Supuoz wan a unu waahn fi bil wan towa. Yu no wi sidong fos an chek out umoch it a-go kaas yu, so yu wi nuo ef yu av inof moni fi bil it.”—Luuk 14:28.

   Aks yuself: ‘Mi eva a spen we mi no av an eva a uo piipl moni? Wa mi du we shuo se mi kyan anggl moni gud?’

•   Di sitn dem we yu fi du fi kip kluos tu Gad. Ef yu a wan Jeuova Witnis, yu fi mek shuor se yu a mek taim fi stodi di Baibl aafn an yu a go a di miitn dem.

   Sitn fram di Baibl we yu kyan riizn pan: “Di piipl dem we nuo se dem niid Gad iina dem laif, a dem Gad a-go bles.”—Matyu 5:3.

   Aks yuself: ‘Mi a chrai mi bes fi du di sitn dem we mi fi du fi kip kluos tu Gad? A dem sitn de kom fos iina mi laif, ar mi fain se eni an eniting kyan mek mi no du dem?’

 Di mien ting: It onggl fier fi di sumadi we yu a luk fi marid tu get wan gud waif ar ozban. So ef yu a du evriting we yu kyan du fi bi da kain-a sumadi de, yu mait-a en op fain sumadi we a chrai fi du di sed ting tu.