Yu Kyan Av Piis Iina Yu Aat Iivn Duo Waar A Gwaan
Gary we a did wan suoja se: “Bifuo mi staat stodi di Baibl, mi neehn nuo wa mek so moch wikidnis a gwaan iina di worl. Bot nou mi av piis iina mi aat an main. Mi nuo se Jeuova Gad a-go mek da worl ya wan beta plies we evribadi fiil sief.”
A no Gary wan fiil da wie de. Kom mek wi luk pan ou di Baibl a elp ada piipl tu.
DI BAIBL SE: “Jeuova, yu gud an yu eva redi fi paadn piipl.”—Saam 86:5.
OU DIS A ELP PIIPL: “Da vors ya mek mi si ou gud an kain Jeuova bi. Mi nuo se im paadn mi fi aal a di bad sitn dem we mi du wen mi did a fait iina waar.”—Wilmar, Kolombiya.
DI BAIBL SE: “Di evn dem an di ort, mi a-go mek dem nyuu; an di sitn dem we did apm bifuo, unu naa go memba dem at aal, an dem naa go mek unu fiil no pien iina unu aat niida.”—Aizaiya 65:17.
OU DIS A ELP PIIPL: “Kaaz a wa mi go chuu iina di waar, mi stil schres out nof a di taim an mi av di siknis we mek mi sad bad. Bot wen mi riid da skripcha ya, it elp mi fi si se Jeuova suun mek mi figet aal a dem bad sitn de, an di taim a-go kom wen mi naa go fiil no pien iina mi aat kaaz a dem niida. Dat nais iihn!”—Zafirah, Merika.
DI BAIBL SE: “Di piipl we du wa Gad se rait a-go get nofa an nofa an dem gweehn get nof blesn tu, an jos laik ou di muun aalwiez a-go de de, a siem so piis a-go de evriwe an naa go en.”—Saam 72:7.
OU DIS A ELP PIIPL: “A nof taim mi tingk bout wa da vors ya se. Suun suun, waar naa go de bout no muor an wi naa go afi wori se notn a-go apm tu di piipl dem we wi lov.”—Olena, Yuukrien.
DI BAIBL SE: “Yu piipl dem we ded ya nou a-go kom bak alaiv. . . . Yu si aal a unu we ded an beri iina di dort, mi waahn unu git op an shout out kaa unu api!”—Aizaiya 26:19.
OU DIS A ELP PIIPL: “Wen wan neda chraib did a chrai fi kil aaf aal a di Tutsi piipl dem, dem kil aaf nieli aal a mi fambili dem. Bot da vors ya mek mi nuo se mi a-go si dem agen. Mi kyaahn wiet fi ier dem a laaf an a taak wen dem kom bak alaiv!”—Marie, Ruwanda.
DI BAIBL SE: “Likl fram dis, no muo wikid piipl naa go de bout agen . . . Bot di wan dem we ombl demself, yu si di ort, a dem piipl de a-go kom get it. An dem a-go api so til, kaa piis a-go de evriwe.”—Saam 37:10, 11.
OU DIS A ELP PIIPL: “Iivn duo di waar don, yu stil av wikid piipl bout di plies an tingz stil a apm we no fier. Bot dem vors ya elp mi uol iip. Dem elp mi fi memba se Jeuova si evriting we a gwaan an im nuo wa mi a go chuu. Im pramis wi se suun suun im a-go get rid a aal a di sitn dem we kaaz piipl fi sofa, an wi naa go memba dem no muo.”—Daler, Tajiikistan.
Dem piipl ya we wi jos taak bout iina da magaziin ya a Jeuova Witnis. Di Baibl a elp dem an wol iip a ada Jeuova Witnis fi av piis iina dem aat an main. Di sitn dem we dem lorn a elp di wol a dem fi liv tugeda az wan, no mata di kola a dem skin, di konchri we dem kom fram, ar notn laka dat. (Ifiijan 4:31, 32) Di Jeuova Witnis dem no tek said wen it kom aan tu palitiks an dem no fait iina waar niida.—Jan 18:36.
Di Jeuova Witnis dem aal uova di worl komiin laik wan big fambili we de de fi dem wan aneda. (Jan 13:35) Yu memba Olena we wi did taak bout aredi? Shi an ar sista did afi ron we fram dem konchri kaaz a waar. Shi se: “Wen wi kech a di baada, som Jeuova Witnis fram da konchri de did de de a wiet pan wi an dem did so api fi si wi. Dem riili elp wi fi saat out tingz so dat wi kuda liv iina da konchri de.”
Wi wel waahn yu fi kom a wi miitn dem. Wen yu kom, yu a-go get fi si ou wa wi lorn fram di Baibl a elp piipl fi liv iina piis wid dem wan aneda. Go pan jw.org fi fain out we wan miitn a kip nier yu ar fi sain op fi di Baibl stodi we di Jeuova Witnis dem du wid di buk we niem Yu Kyan Bi Api Nou An Fi Eva!
