Wah Matthew Did Write Dung Bout Jesus 5:1-48

  • DI SERMON PON DI MOUNTAIN (1-48)

    • Jesus start fi teach pon di mountain (1, 2)

    • Di one dem weh happy (3-12)

    • Salt an lite (13-16)

    • Jesus come yah fi mek everyting weh di Law seh fi happen, happen fi tru (17-20)

    • Wah Jesus teach bout wen people get bex (21-26), sleep wid smaddy weh dem nuh married to (27-30), divorce (31, 32), swear an tek oath (33-37), wah fi do wen smaddy hurt yuh (38-42), how yuh fi luv yuh enemy (43-48)

5  Wen Jesus si di big crowd a people, him go up pon di mountain an siddung an him follower dem come to him 2  an him start fi teach dem seh, 3  “Di people dem weh know seh dem need God inna dem life inna every way, a dem happy, caa a dem people deh ago get God Govament weh ago rule from heaven. 4  “Di people dem weh feel sad yah now, a dem happy, caa smaddy ago hush dem. 5  “Di people dem weh humble demself, a dem happy, cause a dem ago come get di earth. 6  “Di people dem weh well waah fi si di sitt’n dem weh God seh rite happen suh bad, dat it come een like seh dem a dead fi hungry an dem throat dry like seh dem nuh drink nuh wata fi how long, a dem happy, caa God ago mek sure seh dem get everyting weh dem waah. 7  “Di people dem weh ready fi pardon other people, a dem happy, cause a dem ago get pardon. 8  “Di people dem who fah heart clean, a dem happy, cause a dem ago get fi si God. 9  “Di people dem weh luv fi mek peace, a dem happy, caa people ago call dem God pickney. 10  “Di people dem weh other people a mek tings hard fi dem caa dem a do wah rite inna God yeye, a dem happy, caa a dem people deh ago get God Govament weh ago rule from heaven. 11  “Wen people shame unuh an treat unuh bad an tell all kind a lie pon unuh an dem talk all kind a bad sitt’n bout unuh caa unuh a fala mi, a unuh happy. 12  Unuh fi mek unuh self happy suh til, caa God have whole heap a nice sitt’n pudung fi unuh. Caa di same way how dem a treat unuh bad an a mek tings hard fi unuh, a same suh dem use to treat di prophet dem weh did deh bout before fi unuh time. 13  “Unuh come een like di salt weh deh inna dah worl yah. But if di salt nuh taste like salt again, yuh tink it have nuh use? No sah! Di ongle ting yuh can go do wid it a dash it outta door fi people walk up an dung pon it. 14  “Unuh come een like lite inna dah worl yah. Yuh cyaa hide wan city weh deh pon tap a wan mountain. 15  Wen people lite wan lamp, dem nuh put it unda wan basket, dem put it pon wan table suh das it can lite up di house fi everybody. 16  A same way suh unuh fi mek unuh lite shine suh dat everybody can si it. An wen dem si di good sitt’n dem weh unuh a do, dem wi big up unuh Fada weh deh a heaven. 17  “Nuh tink seh mi come yah fi get rid a di Law* or di ting dem weh di prophet dem did write dung. Mi nay come yah fi get rid a dem, a come mi come yah fi mek everyting weh dem seh fi happen, happen fi tru. 18  Mi a tell unuh enuh, it wudda easier fi heaven an earth go weh dan fi even one letta outta one a di wud dem, or fi even piece a one a di letta dem, weh di Law seh wudda happen nuh happen fi tru. Suh everyting weh deh inna God Wud ago happen jus like how him seh it wudda happen. 19  Suh if anybody bruk none a God Law dem, all di one dem weh people might a nuh tink suh important, an a teach other people fi bruk it tuh, dem nah go get fi be part a God Govament weh ago rule from heaven. But anybody weh a do wah di Law seh dem fi do an a teach other people fi do wah it seh, dem people deh ago be part a God Govament weh ago rule from heaven. 20  Mi a tell unuh seh if unuh nah do wah rite inna God yeye more dan di Pharisee dem an di law teacher dem, unuh nah go get nuh blessing from God Govament weh ago rule from heaven. 21  “Yuh did hear seh dem tell unuh fada fada dem seh, ‘Yuh nuh fi kill nobody, an anybody weh kill nobody, dem ago carry dem go a court house, an dem haffi go answer fi wah dem do.’ 22  But mi a tell yuh, anybody weh always bex wid dem bredda or sista* haffi go answer inna di court fi wah dem do. An anybody weh tell dem bredda or sista hot wud, dem ago judge dem inna di highest court weh deh inna di country. An anybody weh call nobody ‘ole eediat,’ ago dun fah fi good.* 23  “Suh if yuh a carry wan offering go a di altar, an yuh memba seh yuh bredda or sista have sitt’n gainst yuh, 24  pudung yuh offering in front a di altar an tun back go mek peace wid yuh bredda or yuh sista, an den come back an gi up yuh offering. 25  “If smaddy a carry yuh go court, try fi sort out tings quick quick wen unuh a go deh, caa if yuh nuh do dat him might a carry yuh in front a di judge, an den di judge might a sentence yuh an gi yuh to di officer fi him fling yuh inna prison. 26  An mi a tell yuh, yuh nah go come out til yuh pay up every last cent. 27  “Yuh did hear seh, ‘If yuh married yuh nuh fi sleep wid smaddy weh yuh nuh married to.’ 28  But mi a tell yuh seh if yuh gwaan look pon wan ooman weh yuh nuh married to like seh yuh waah fi sleep wid har, it wudda come een like seh yuh dun sleep wid har aready inna yuh heart. 29  Suh if yuh rite yeye a mek yuh sin, tear it out an dash it weh, caa it better yuh lose part a yuh body dan fi di whole a yuh dun fah fi good.* 30  An if yuh rite han a mek yuh sin, chop it off an dash it weh, caa it better yuh lose part a yuh body dan fi di whole a yuh dun fah fi good.* 31  “An yuh did hear seh, ‘If wan man waah fi divorce him wife, him fi gi har di paper weh show seh dem nuh married again.’ 32  But mi a tell yuh enuh, wan man nuh fi divorce him wife unless him find out seh shi sleep wid smaddy else or gwaan wid some other kind a sex sin. Caa if him divorce har an shi nay do nuttn, it might a cause har fi go sleep wid smaddy else an sin. An if smaddy go married to har, a sin him wudaana sin tuh caa him wudaana sleep wid wan nedda man wife. 33  “An unuh did hear seh dem tell unuh fada fada dem seh, ‘Unuh nuh fi swear seh unuh ago do sitt’n an den nuh dweet. But anyting weh yuh promise Jehovah* seh yuh ago do, yuh fi dweet.’ 34  Mi a tell unuh enuh: Unuh nuh fi swear an tek nuh oath at all at all, an nuh swear an call pon heaven fi mek people si seh wah yuh a seh a suh it go fi tru, caa a deh suh God throne deh, 35  an nuh badda swear an call pon di earth needa, caa di earth a God foot stool. An nuh badda swear an call pon Jerusalem needa, caa dah city deh a fi di tap a tap king. 36  An nuh swear pon yuh owna life, caa yuh cyaa mek one strand a hair pon yuh head tun black or white. 37  Suh if a ‘Yes’ yuh a seh, a yes, an if a ‘No,’ a no. Caa if yuh nuh do wah yuh seh yuh ago do, den dat mean seh a Satan* yuh a fala. 38  “Yuh did hear seh, ‘If smaddy jook yuh inna yuh yeye, smaddy fi jook dem back inna fi dem yeye tuh. An if smaddy lick out smaddy teeth, smaddy fi lick out back fi dem teeth tuh.’ 39  But mi a tell yuh: If smaddy weh wicked waah fi fight yuh, nuh fight dem back. An if smaddy bax yuh pon one side a yuh face, den tun di other side gi dem tuh. 40  An if smaddy waah carry yuh go a court house fi tek weh piece a clothes weh yuh have on, den all gi him di other piece tuh, 41  an if di smaddy weh in charge ask yuh fi go one mile, den go two mile wid him. 42  An if smaddy ask yuh fi supm, yuh fi gi dem it. An if smaddy waah fi borrow sitt’n from yuh, yuh fi len dem it. 43  “Yuh did hear seh, ‘Yuh fi luv yuh neighbor dem an yuh fi hate yuh enemy dem.’ 44  But mi a tell yuh seh: Yuh fi gwaan luv yuh enemy dem an yuh fi pray fi di one dem weh a mek tings hard fi yuh caa yuh a fala mi. 45  Yuh si if unuh do dat, unuh a show seh unuh a God pickney an unuh a do di sitt’n dem weh him seh unuh fi do, caa him mek him sun shine pon good people an wicked people tuh, an him mek di rain fall pon di people dem weh do wah good an di one dem weh do wah bad tuh. 46  If yuh ongle luv di one dem weh luv yuh, yuh tink seh yuh ago get nuh blessing fi dat? Caa a nuh dat di tax collector dem a do tuh? 47  An if unuh ongle tell fi unuh people dem howdy, dat a nuh nuttn big, caa di people dem weh nah serve God a do dat tuh. 48  Yuh si jus like how yuh Fada inna heaven show luv inna wan perfect way, a same suh yuh fi show luv inna wan perfect way tuh.

Di Side Point Dem

^ Or yuh can seh “di Law weh God gi Moses.”
^ Inna di Greek language, it wudda seh “bredda,” an it a talk bout smaddy weh yuh an dem a worship Jehovah.
^ Inna di Greek language, it wudda seh “Gehenna.” Look pon Some Wud An Wah Dem Mean.
^ Inna di Greek language, it wudda seh “Gehenna.” Look pon Some Wud An Wah Dem Mean.
^ Inna di Greek language, it wudda seh “Gehenna.” Look pon Some Wud An Wah Dem Mean.
^ Or yuh can seh “di wicked one.”

Copyrights for this publication