Wah Matthew Did Write Dung Bout Jesus 2:1-23
2 Jesus did born inna Bethlehem weh deh inna Judea wen King Herod* a rule. Afta him born, some reader man weh come from di East weh use di star dem fi tell wah ago gwaan inna di future, come a Jerusalem
2 come ask, “A which part di pickney deh weh born, weh ago tun di Jew people dem king? Caa wen wi did deh inna di East wi si him star, suh wi come yah fi come show him respect.”
3 An afta King Herod hear wah a gwaan, it start fi badda him, an it did a badda di people dem inna Jerusalem tuh.
4 Suh him call all a di tap a tap priest dem an di man dem weh teach God law fi find out from dem a which part di Christ* did fi born.
5 An dem answer him an seh, “A inna Bethlehem weh deh inna Judea, caa di prophet did write dung seh,
6 ‘An yuh, Bethlehem weh deh inna Judah, none a di other leader dem weh deh inna Judah nuh fi feel seh fi dem town more dan yuh, cause a from outta yuh wan leader ago come weh ago rule an tek care a mi people weh deh inna Israel.’”
7 Suh Herod call di reader man dem unda di quiet fi mek sure him find out di time wen dem si di star.
8 An wen him a sen dem go a Bethlehem him tell dem seh, “Gwaan go look fi di pickney, an look fi him good tuh, an wen yuh find him, come back come tell mi suh dat mi can go show him mi respect tuh.”
9 Afta dem hear weh di king a seh, dem lef go a Bethlehem an wen dem deh pon dem way, guess wah! Dem nuh si di same star weh dem did si wen dem did deh inna di East a go in front a dem. Den it go tap ova di house which part di pickney deh.
10 Wen dem si di star, dem did happy suh til!
11 An wen dem go inna di house dem si di pickney wid him madda Mary, an dem go pon dem knee an show him respect. Den dem go inna dem treasure bax an tek out gold, frankincense, an myrrh an gi him.
12 But caa God did warn dem inna wan dream seh dem nuh fi go back to Herod, dem go back a dem country wan nedda way.
13 Afta dem lef deh suh, yuh waah know seh Jehovah* angel dream Joseph an tell him seh, “Get up, an tek di pickney an him madda an run weh go a Egypt, an tan deh til mi tell yuh wen yuh can go back, caa Herod ago look fi di pickney fi kill him.”
14 Suh Joseph get up inna di nite an tek di pickney an him madda an go a Egypt.
15 An him tan deh til Herod dead, suh dat wah Jehovah did mek him prophet seh wudda happen, happen fi tru, wen him seh, “Mi call mi bwoy pickney outta Egypt.”
16 Caa Herod did feel seh di reader man dem did trick him, him get bex bad. Suh him sen people fi go kill off all a di bwoy pickney dem who a two year ole an unda weh deh inna Bethlehem an di other place dem weh deh near deh, base pon di time weh di reader man dem did tell him.
17 Den wah di prophet Jeremiah did seh wudda happen, happen wen him did seh,
18 “Dem hear smaddy a halla an a bawl inna Ramah. An a did Rachel a bawl fi har pickney dem, an shi nay deh mek nobody hush har cause har pickney dem nuh deh bout nuh more.”
19 Afta Herod dead, Jehovah angel dream Joseph again wen him deh a Egypt
20 an tell him seh, “Get up an tek di pickney an him madda an go back a Israel caa di people dem who did waah fi kill di pickney, dem dead.”
21 Suh him get up an tek di pickney an him madda an go back a Israel.
22 But wen him hear seh a Archelaus, dat a Herod bwoy pickney, a rule inna Judea, him did fraid fi go back deh. An pon tap a dat, caa God did warn him inna wan dream, him go a Galilee.
23 An him go a wan town weh name Nazareth go liv, an a suh comes wah di prophet dem seh wudda happen, happen fi tru, weh seh, “Dem ago call him wan Nazarene.”
Di Side Point Dem
^ Look pon Some Wud An Wah Dem Mean.
^ Or yuh can seh “di Messiah” weh mean “Di King Weh God Pick.”
^ Look pon Some Wud An Wah Dem Mean.
