Skip to content

Yeˆhoˆwaa nyei Zorng-Zengx

Select language Iu-Mienh

Meih Oix Hiuv Duqv Zien Waac Nyei Fai?

Meih Oix Hiuv Duqv Zien Waac Nyei Fai?

ZIEN waac gorngv taux haaix nyungc? Gorngv taux maaih deix jienv nyei waac mbuo baamh mienh duqv naaic jiex daaih. M’nziex meih ganh mv baac duqv hnamv taux naaiv deix waac-naaic nyei:

  • Tin-Hungh za’gengh nzauh heix taux mbuo nyei fai?

  • Guoqv mborqv jaax nyei jauv caux kouv naanc haih yietc liuz maiv maaih nyei fai?

  • Mbuo daic mingh mbuo benx haaix nyungc?

  • Se maaih lamh hnamv dorngx bun daic mingh nyei mienh nyei fai?

  • Yie oix zuqc hnangv haaix nor daux gaux Tin-Hungh cingx muangx yie?

  • Yie hnangv haaix nor haih lorz duqv buatc njien-youh nyei jauv?

Meih mingh haaix lorz naaiv deix waac-naaic nyei waac-dau? Se gorngv meih mingh sou-lamz fai sou-poux, m’nziex meih haih lorz buatc ziex cin buonv sou nyiemc gorngv maaih waac-dau nyei. Mv baac, camv nyei, naaiv buonv caux wuov buonv gorngv waac daaih maiv doix-dongh. Maaih deix yaac gorngv daaih minc zinh hnangv jangx longc duqv nyei mv baac maiv lauh zungv longc maiv zuqc aqv, liuz a’zuqc goiv waac fai zungv zuqc ganh zoux siang nzengc.

Mv baac, maaih buonv sou se maaih waac-dau mbuo haih kaux duqv nyei. Naaic buonv sou se maaih zien waac. Yesu Giduc daux gaux bun Tin-Hungh gorngv: “Meih nyei waac se zien leiz.” (Yoˆhan 17:17) Ih zanc hnoi, mbuo hiuv duqv dongh Yesu gorngv wuov Waac se dongh Ging-Sou. Jiex mingh yiem naaiv i ziex minc, meih duqv deix Ging-Sou gorngv daaih nyei zien waac dau gu’nguaaic wuov deix waac-naaic. Ging-Sou dau daaih yaac cing nyei.

 Tin-Hungh Za’gengh Nzauh Heix Taux Mbuo Nyei Fai?

WEIC HAAIX DIUC NAAIV JIOUX WAAC NAAIC CUOTV DAAIH: Mbuo yiem nyei lungh ndiev se maaih orqv sic caux maiv baengh fim nyei jauv buangv nzengc. Camv-nyungc buoqc zangc nyei jauv njaaux gorngv mbuo zuqc siouc kouv se weic yiem Tin-Hungh nyei eix cuotv daaih.

GING-SOU HNANGV NAAIV NJAAUX: Orqv nyei jauv se maiv zeiz Tin-Hungh zoux cuotv daaih. Yopv 34:10 gorngv: “Tin-Hungh za’gengh! maiv haih zoux orqv sic. Nernh Jiex Wuov Dauh zungv maiv haih zoux dorngc.” Tin-Hungh maaih longx haic nyei mouz deic bun baamh mienh weic ninh hnamv mbuo. Hnangv naaic, Yesu cingx njaaux mbuo daux gaux: “Yie mbuo nyei tin-dorngh Diex aah! . . . Tov bun meih zoux Ziouv gunv mienh nyei hnoi taux. Tov bun yiem naaiv baamh gen nyungc-nyungc ei meih nyei eix cuotv daaih, hnangv yiem tin-dorngh nyungc-nyungc ei meih nyei eix cuotv daaih nor.” (Matvˆtaai 6:9, 10) Tin-Hungh nzauh heix taux mbuo camv gau, ninh cuotv hnyouv koi jauv daaih bun ninh nyei mouz deic zoux ziangx yaac oix cuotv daaih benx zien.Yoˆhan 3:16.

Yaac koi mangc Tin Deic Douh 1:26-28; Yaagorpc 1:13; caux 1 Bide 5:6, 7.

Guoqv Mborqv Jaax Nyei Jauv Caux Kouv Naanc Haih Yietc Liuz Maiv Maaih Nyei Fai?

WEIC HAAIX DIUC NAAIV JIOUX WAAC NAAIC CUOTV DAAIH: Mienh camv haic zuqc ndortv maengc weic laaix guoqv mborqv jaax. Mbuo yietc zungv da’dauh duqv siouc jiex kouv naanc nyei.

GING-SOU HNANGV NAAIV NJAAUX: Tin-Hungh gorngv ziangx maaih norm ziangh hoc ninh oix zoux bun naaiv norm baamh gen baengh orn nzengc. Zuov taux ninh nyei Guoqv, dongh ninh nyei hungh jaa yiem tin-dorngh wuov, gunv jienv baamh gen nor, baamh mienh “maiv hoqc linc mborqv jaax nyei jauv aqv.” Div mborqv jaax, “ninh mbuo ziouc zorqv ninh mbuo nyei nzuqc ndaauv daav benx laih bieiv.” (Iˆsaaˆyaa 2:4) Tin-Hungh oix zorqv guangc nzengc yietc zungv kouv naanc caux maiv baengh fim nyei jauv yaac maiv bun maaih aqv. Ging-Sou laengz jienv hnangv naaiv: “[Tin-Hungh] oix sortv ninh mbuo nyei m’zing diemv-diemv wuom-mueic. Yangh naaiv jiex maiv maaih haaix dauh daic, maiv maaih haaix dauh nzauh, maiv maaih haaix dauh nyiemv, yaac maiv maaih haaix dauh mun, weic zuqc loz nyei [liemh jienv ih jaax hnoi nyei kouv naanc caux maiv baengh fim nyei jauv] yietc zungv jiex nzengc.”Laauc Yaangh 21:3, 4.

Yaac koi mangc Singx Nzung 37:10, 11; 46:9; caux Mikaa 4:1-4.

Mbuo Daic Mingh Mbuo Benx Haaix Nyungc?

WEIC HAAIX DIUC NAAIV JIOUX WAAC NAAIC CUOTV DAAIH: Maaih camv-nyungc buoqc zangc nyei jauv njaaux gorngv mienh yietv dangx qiex liuz, ninh ca’lengc maaih wuonh mbaeqv fai lingh wuonh corc ziangh jienv mingh. Maaih deix sienx daic mingh nyei mienh aengx haih zoux doqc bun nangh nyei mienh. Maaih deix yaac sienx orqv mienh zuqc mingh deic nyuoqc dingc zuiz, yietc liuz zuqc zeix siouc kouv.

GING-SOU HNANGV NAAIV NJAAUX: Baamh mienh yietv dangx qiex nor, ninh mbuo ziang naaic maiv maaih maengc ziangh aqv. Gorngv Seix Zaangc 9:5 hnangv naaiv gorngv: “Daic mingh nyei mienh maiv hiuv haaix nyungc.” Hnangv naaic, daic mingh nyei mienh maiv haih hiuv, maiv haih haiz, fai maiv haih zoux haaix nyungc aqv nor, ninh mbuo ziouc m’daaih maiv haih zoux doqc fai tengx ziangh jienv nyei wuov deix aqv.Singx Nzung 146:3, 4.

Yaac koi mangc Tin Deic Douh 3:19 caux Gorngv Seix Zaangc 9:6.

 Se Maaih Lamh Hnamv Dorngx Bun Daic Mingh Nyei Mienh Nyei Fai?

WEIC HAAIX DIUC NAAIV JIOUX WAAC NAAIC CUOTV DAAIH: Mbuo oix maaih maengc ziangh yaac oix caux mbuo hnamv nyei mienh yiem, oix duqv maaih ziangh hoc caux ninh mbuo nziaauc. Se gorngv mbuo hnamv nyei mienh ndortv liuz, ziux baamh mienh nyei hnyouv nor, mbuo m’daaih gengh! aengx oix duqv buatc nzunc ninh mbuo.

GING-SOU HNANGV NAAIV NJAAUX: Daic mingh nyei mienh maaih camv nyei aengx haih duqv nangh daaih. Yesu laengz jienv “yiem zouv nyei yietc zungv . . . cuotv daaih.” (Yoˆhan 5:28, 29) Ei dongh zinh ndaangc Tin-Hungh oix bun wuov, aengx duqv nangh daaih wuov deix haih duqv yiem nzueic haic nyei orn-lorqc baamh gen. (Iˆsaaˆyaa 65:21-25) Naaiv laengz jienv nyei hoz nqaang se liemh jienv bun muangx waac nyei baamh mienh duqv dunh yunh wangc siangx nyei yaac duqv yietc liuz nyei maengc. Ging-Sou gorngv: “Kuv mienh zungv oix nzipc naaiv norm baamh gen yaac duqv yiem naaiv yietc liuz.”Singx Nzung 37:29, New World Translation.

Yaac koi mangc Yopv 14:14, 15; Lugaa 7:11-17; caux Gong-Zoh 24:15.

Yie Oix Zuqc Hnangv Haaix Nor Daux Gaux Tin-Hungh Cingx Muangx Yie?

WEIC HAAIX DIUC NAAIV JIOUX WAAC NAAIC CUOTV DAAIH: Maanc mienh yiem nyungc-nyungc buoqc zangc nyei jauv heuc taux ninh mbuo nyei zienh nyei. Mv baac camv-dauh nyei haiz heuc gau yaac maiv duqv haaix nyungc.

GING-SOU HNANGV NAAIV NJAAUX: Yesu njaaux mbuo maiv dungx dorh mienh fiev daaih nyei waac daaih paan mingh puoqv nzuonx daux gaux hnangv zoux benx daux gaux nyei leiz a’zuqc kungx gorngv naaic deix waac hnangv nor. Yesu gorngv: “Meih mbuo daux gaux nyei ziangh hoc, maiv dungx paan mingh puoqv nzuonx nyei gorngv.” (Matvˆtaai 6:7) Da’faanh mbuo oix Tin-Hungh muangx mbuo daux gaux nyei waac nor, mbuo a’zuqc daux gaux daaih horpc ninh. Wuov nyungc, hnangv haaix nor haih daux gaux daaih horpc ninh? Mbuo a’zuqc hoqc hiuv duqv ninh nyei eix se haaix nyungc, liuz gan jienv ninh nyei eix daux gaux. Da’yietv Yoˆhan 5:14 porv mengh: “Mbuo hiuv duqv mbuo ei jienv [Tin-Hungh nyei] eix tov haaix nyungc, ninh ziouc muangx mbuo.”

Yaac koi mangc Singx Nzung 65:2; Yoˆhan 14:6, 14; caux 1 Yoˆhan 3:22.

Yie Hnangv Haaix Nor Haih Lorz Duqv Buatc Njien-Youh Nyei Jauv?

WEIC HAAIX DIUC NAAIV JIOUX WAAC NAAIC CUOTV DAAIH: Mienh camv sienx maaih zinh nyaanh, maaih mengh hoc, fai duqv hmien-mueic sin-pei nzueic se bun ninh mbuo haih duqv njien-youh. Hnangv naaic, ninh mbuo longc hnyouv qaqv zorqv ziangh hoc daaih lorz jauv bun ninh mbuo haih duqv naaic deix ga’naaiv, mv baac lorz ndongc haaix yaac maiv haih njien-youh.

GING-SOU HNANGV NAAIV NJAAUX: Yesu bun mbuo hiuv duqv haaix nyungc zoux gorn bun mienh njien-youh dongh ninh gorngv: “Ganh hiuv duqv ganh qiemx zuqc Tin-Hungh wuov deix, maaih njien-youh aqv.” (Matvˆtaai 5:3) Gengh haih lorz duqv buatc zien njien-youh nyei jauv se dongh mbuo zorqv ziangh hoc daaih lorz dongh mbuo gengh qiemx zuqc gauh camv jiex nyei ga’naaiv. Mbuo gengh qiemx zuqc gauh camv jiex nyei ga’naaiv se dongh mbuo nyei hnyouv ngorc lorz oix hiuv duqv zien Tin-Hungh se haaix dauh yaac hnangv haaix, ninh yaac zeix mbuo daaih zoux haaix nyungc. Naaiv deix jauv-louc nyei zien waac se yiem Ging-Sou. Hiuv duqv naaiv deix jauv-louc nyei zien waac se haih tengx mbuo zieqv duqv haaix nyungc ga’naaiv se gengh maaih lamh longc fai maiv lamh longc. Bun Ging-Sou nyei zien waac tengx mbuo hnamv duqv tong caux dorh mbuo zoux nyei nyungc-nyungc se bun mbuo nyei seix gauh maaih jaax-zinh.Lugaa 11:28.

Yaac koi mangc Cong-Mengh Waac 3:5, 6, 13-18 caux 1 Tiˆmoˆtai 6:9, 10.

 Naaiv se deix baav Ging-Sou nyei waac dau juqv jioux waac-naaic hnangv. Meih oix hiuv gauh camv naaiv nyei fai? Se gorngv meih benx dauh dongh “hiuv duqv ganh qiemx zuqc Tin-Hungh wuov deix” nor, meih m’daaih oix nyei. Nzunc baav meih zungv aengx hnamv taux ganh deix waac-naaic nyei, hnangv: ‘Se gorngv Tin-Hungh nzauh heix taux mbuo nyei nor, weic haaix diuc yiem zinh ndaangc daaih taux ih zanc ninh bun baamh gen maaih orqv sic caux kouv naanc camv gau? Yie hnangv haaix nor haih tengx yie nyei hmuangv-doic duqv aengx gauh njien-youh?’ Ging-Sou maaih waac dau naaiv deix waac-naaic bun mbuo buangv hnyouv nyei, yaac aengx maaih dau dieh deix waac-naaic camv nyei.

Mv baac, ih zanc hnoi maaih mienh camv nyei maiv oix mangc taux Ging-Sou. Ninh mbuo buatc Ging-Sou hoz haic yaac aqc duqv bieqc hnyouv. Meih oix mienh tengx jienv meih lorz waac-dau yiem Ging-Sou nyei fai? Yeˆhoˆwaa nyei Zorng-Zengx bun i nyungc jauv haih tengx meih.

Da’yietv nyungc, maaih buonv sou heuc Muangx Tin-Hungh Ziouc Duqv Ziangh Yietc Liuz se zoux daaih tengx maiv maaih ziangh hoc nyei mienh zaah mangc cing nyei caux hec duqv bieqc hnyouv nyei Ging-Sou waac daaih dau jienv nyei waac-naaic. Da’nyeic nyungc, se tengx mienh hoqc bieqc hnyouv Ging-Sou yiem biauv yaac maiv longc nyaanh. Njaaux nyei mienh se yiem nitv fatv meih yiem nyei dorngx. Ninh se yietc dauh Yeˆhoˆwaa nyei Zorng-Zengx. Ninh hiuv Ging-Sou nyei jauv-louc yaac haih njaaux mienh. Yietc norm aaˆtitv ninh zorqv deix ziangh hoc daaih meih nyei biauv fai yiem horpc meih nyei dorngx porv mengh Ging-Sou nyei waac bun meih muangx. Ziex laanv mienh yiem gormx lungh ndiev hnangv naaiv hoqc Ging-Sou, liuz haiz tengx duqv ninh mbuo ganh camv nyei. Camv-dauh nyei hoqc liuz, bieqc hnyouv daaih, a’hneiv nyei gorngv naaiv deix waac: “Yie lorz buatc zien leiz mi’aqc loh!”

Maiv maaih haaix nyungc aengx gauh maaih jaax-zinh jiex daaih bun mbuo haih lorz duqv buatc. Ging-Sou nyei zien waac bungx nqoi mbuo ziex nyungc gec nyei caux guaix nyei jauv, maiv mengh baeqc nyei jauv, haeqv mbuo zuqc gamh nziex haic nyei jauv. Ging-Sou nyei zien waac bun mbuo maaih lamh hnamv, maaih mouz deic, caux maaih njien-youh hnyouv. Yesu gorngv: “Meih mbuo ziouc hiuv duqv zien leiz. Zien leiz yaac oix bungx nqoi meih mbuo.”Yoˆhan 8:32.