NEW YORK—Nọ egọmeti ọ kẹ Isẹri Jihova udu nọ a rẹ rọ bọ oria okpokpọ nọ u wuzou iruo rai no evaọ Warwick, New York, a te mu ebabọ họ evaọ Ẹdọvo-Oka, edẹ 29 amara Ahrẹ, 2013.

Evaọ Edesa-Oka, edẹ 17 amara Ahrẹ, 2013, utu nọ u re rri omaa iwou nọ a re se Town of Warwick Planning Board o rọwo fihọ omaa iwou nọ Isẹri Jihova a gwọlọ bọ na, yọ a re ru onana no taure egọmeti o tẹ kẹ ae udu nọ a rẹ rọ bọ iwou na. Isẹri Jihova a dẹ otọ obọ Warwick na evaọ edẹ 17 amara Ahrẹ, 2009, yọ ikpe ene e vrẹ taure utu nọ u re rri omaa iwou na u te ti kuenu kẹ ae. Nọ egọmeti ọ kẹ ae udu no evaọ Edisoi-Oka, edẹ 26 amara Ahrẹ, a te mu iruo họ evaọ Ẹdọvo-Oka, edẹ 29 amara Ahrẹ.

Oware jọ nọ o mae lẹliẹ utu nọ u re rri omaa iwou na rọwo kẹ Isẹri na re a bọ iwou na họ, a te bọ iwou na evaọ oghẹrẹ nọ i ti ro nwene okegbe na tere he. Wọhọ oriruo, a ti ru eware jọ fihọ otọ na nọ ẹkẹre ame-oso o gbe ro kporo raha ẹbe gbe ire nọ e rrọ otọ na ha, re erao wọhọ eyiwhẹ nọ e rrọ otọ na e sae zọ, yọ eraomuomu na e te kẹle oria nọ a be jọ bọ iwou na ha.

Richard Devine nọ ọ rrọ ọtota kẹ Isẹri na ọ ta nọ: “Eva e were omai nọ ma bi ro ru iruo kugbe utu nọ u re rri omaa iwou na, je bi wo ẹnyaharo evaọ iruo na. Utu nana nọ u kuenu kẹ omai na yọ oware ulogbo evaọ ebabọ oria nọ u wuzou iruo mai nọ ma be kwa no Brooklyn kpohọ Warwick na.” Enrique Ford nọ avọ Devine nọ a gbẹ rrọ ogbẹgwae ebabọ na ọ ta nọ: “Udu ebabọ nọ ahwo na a kẹ omai evaọ amara Ahrẹ na yọ obọdẹ owojẹ nọ u ti ru omai sae bọ uwou na re evaọ ikpe ene nọ ma fihọ kẹ ebabọ na.”

International Nickel Company họ enọ i wo oria nọ ma dẹ na, yọ o jọ oria nọ u wuzou iruo rai nọ a jẹ jọ ru ekiakiẹ kpahe iruo rai, no ukpe 1960 rite 1987. Nọ ekọmpene na e kwa no etẹe te ikpe ene no, King’s College o tẹ dẹ otọ na avọ ẹjiroro inọ a ti fi isukulu họ etẹe. Uwhremu na a gbe fi isukulu na họ iẹe he. Otọ na o tẹ jọ ere evaọ etoke nọ o vrẹ udhukpe bẹsenọ Isẹri Jihova a rọ dẹe evaọ ukpe 2009.

Inọmba nọ Whọ rẹ Sai Se:

International: J. R. Brown, Office of Public Information, tel. +1 718 560 5000