Kpohọ eme nọ e riẹ eva

Ẹkpẹlobọ: Oria nọ a rẹ rọ ruọ eva ọgwa nọ a jọ ru okokohọ ologbo na. Obọze: Ahwo nọ a kpohọ okokohọ na a be gaviezọ

AKPEGBỌVO 1, 2023
INDIA

Isẹri Jihova Evaọ India A be Sasa Ohwohwo Oma je Fiobọhọ kẹ Ohwohwo nọ Ebọmbo E Sa Evaọ Okokohọ Ologbo Jọ

Isẹri Jihova Evaọ India A be Sasa Ohwohwo Oma je Fiobọhọ kẹ Ohwohwo nọ Ebọmbo E Sa Evaọ Okokohọ Ologbo Jọ

Wọhọ epanọ ma niyẹrẹ vẹre evaọ jw.org evaọ oria iyẹrẹ ekpokpọ na, ebọmbo e sa evaọ okokohọ ologbo nọ a ru evaọ Kerala, obọ India, evaọ Ẹdoka, Akpe 29, 2023. O da omai gaga nọ u te no inievo-emetẹ ivẹ jọ nọ e kaki whu evaọ etẹe no, ọmọtẹ ikpe ikpegbivẹ jọ o whu no re fiki oma nọ ọ nwa. Inievo emezae gbe erọ emetẹ udhuvẹ gbe ikpegbisoi efa a nwoma, yọ oma ejọ e to gaga.

Ma be ta ẹme na, inievo-emetẹ esa gbe inievo-emezae ivẹ a gbẹ rrọ ọspito, ma riẹ hẹ sọ a te zọ. Ahwo egọmeti a ta nọ ebọmbo esa hayo bu viere eye ohwo jọ ọ sa evaọ okenọ a jẹ lẹ olẹ emuhọ evaọ enwenọ ighọjọ ikpe ohiohiẹ. Ipolisi a mu ohwo nọ a roro nọ o ru oware na no, yọ ma be ta ẹme na a be kiẹ otọ ẹme na.

Ma yere ahwo egọmeti nọ a dhogbo ze vẹrẹ vẹrẹ ti fiobọhọ kẹ inievo mai evaọ okokohọ na gbe edọktọ avọ enọso nọ e be rẹrote inievo mai nọ e nwoma.

Uyoyou nọ Isẹri Jihova efa a dhesẹ kẹ ahwo nọ a jọ okokohọ na gbe obọ nọ a fihọ kẹ ae u duobọte ai gaga. Oniọvo-ọmọtẹ jọ nọ ọ jọ ọgwa okokohọ na okenọ ebọmbo na e rọ sa ọ ta nọ: “Mẹ tẹ nwane lẹ se Jihova vẹrẹ vẹrẹ. Inievo nọ e rẹ ruẹrẹ ahwo họ gbe inievo-emezae efa a rẹrote omai gaga. A fiobọhọ kẹ omai re a ruẹ nọ ma no etẹe vẹrẹ vẹrẹ. Onana u dhesẹ nọ Jihova o you omai gaga yọ ọ be daezọ mai omomọvo.”

Inievo nọ i bi ru iruo evaọ uwou ogha India, esẹro okogho, gbe ekpako ukoko nọ e rrọ oria na, a be rọ Ẹme Ọghẹnẹ tuduhọ inievo na awọ je fiobọhọ kẹ ae. Ọkpako ukoko jọ nọ o bi ru iruo evaọ uwou ogha India nọ o weze kpohọ Kerala nyae tuduhọ inievo mai nọ oware okpẹtu nana o via kẹ na awọ, ọ ta nọ: “Dede nọ a sae ruẹ unu gbiku edada gbe uweri nọ okpẹtu nana o wha ze he, ẹrọwọ inievo mai nọ oware na o via kẹ na o tuduhọ omẹ awọ. Me lele inievo na buobu ta ẹme. Nọ mẹ ruẹ epanọ a fievahọ Jihova te, onana u ru ẹrọwọ mẹ ga.”

Mai kpobi ma be lẹ roro iviuwou nọ ahwo rai a whu gbe enọ e nwoma gbe amọfa kpobi nọ okpẹtu nana o te oma evaọ India. Eyaa nọ Ọghẹnẹ ọ ya evaọ Ebaibol inọ ozighi, uye-oruẹ gbe uwhu e te gbẹ jọ họ na, o be sasa omai oma. Ma gba riẹ mu no inọ ma re gbe fievahọ Jihova jẹ rẹroso ẹe riẹriẹriẹ.​—Olezi 56:3.