Kpohọ eme nọ e riẹ eva

Ekọ nọ a re se Armada nọ e kpahe Rouen evaọ France. Iwoho esese na: Eware nọ a re fi ebe họ ghelie nọ e rrọ kẹle oria nọ a bi jo ru ehaa na

ARIA 18, 2023
FRANCE

A Ta Usi Uwoma Ẹgbede Evaọ Etoke Ehaa International Tall Ship Festival Evaọ Rouen, France

A Ta Usi Uwoma Ẹgbede Evaọ Etoke Ehaa International Tall Ship Festival Evaọ Rouen, France

Evaọ ikpe ene kpobi, a rẹ jọ Rouen evaọ France ru ehaa kẹ ahwo nọ a bi bi ekọ ilogbo nọ a re se Armada. Ahwo nọ a bi bi ekọ nana a re bi no eria sa-sa ze evaọ akpọ na. A ru ehaa na evaọ ukpe nana evaọ amara Azeza, no edẹ 8 rite edẹ 18, yọ ahwo nọ a no erẹwho sa-sa ziọ ehaa na a bu te oware wọhọ ima ezeza (6,000,000). Kẹdẹ kẹdẹ, Isẹri Jihova a re fi ebe họ eware nọ a re ghelie, a ve dikihẹ eria nọ i bu te ikpegbivẹ evaọ okpẹwho na soso. Iwhowho-uvie nọ e ta usi uwoma ẹgbede evaọ etoke ehaa na a bu vi egba ezeza (600), yọ a ta usi uwoma kẹ ahwo buobu.

Ohwo jọ nọ ọ jẹ hai fi ahwo họ ifoto, o kpohọ oria ebe mai na jọ nọ inievo mai a dikihẹ, ọ tẹ ta kẹ ae nọ evaọ eria kpobi nọ ọ be jọ ruẹ Isẹri Jihova, ovao rai o rẹ jọ ohwohwẹ yọ a rrọ whẹtiẹ whẹtiẹ. Fiki oware nọ ọ ta na, inievo na a te lele iei ta ẹme oke lelehie kpahe eware nọ ahwo a bi ru nọ i dhesẹ nọ a wo uyoyou ho. Kẹsena a te se obe 2 Timoti 3:1-5 kẹe, jẹ ta ẹme kpahe iẹe. Ọ tẹ rehọ ibroshọ na Reawere Uzuazọ Bẹdẹ Bẹdẹ! Ọ tẹ kẹ ae inọmba ifonu riẹ, yọ ọ ta nọ eva e te were iẹe re ọ wariẹ lele Isẹri Jihova ta ẹme.

Evaọ oke ọfa, aye jọ ọ tẹ nyabru inievo mai nọ i dikihẹ oria ebe mai, ọ tẹ nọ ae nọ: “Otẹrọnọ Jesu o whu, yọ a kpare riẹ ze, kọ fikieme a gbẹ re kpare ahwo mai nọ i whu no ze he? Ọsẹ gbe oni ologbo mẹ a whu no, yọ mẹ gwọlọ wariẹ ruẹ e rai.” Oniọvo-ọmọtẹ mai o te dhesẹ ividio na Oware nọ O rẹ Sasa Ahwo nọ A Rrọ Uweri Oma rọkẹ aye na. Nọ a lele iei ta ẹme no, ọ tẹ rehọ ibroshọ jọ jẹ rọwo nọ a wuhrẹ iẹe Ebaibol.

Eva e were omai nọ inievo mai nọ e rrọ France a fialoma ze ‘re a sai whowho usi uwoma na kẹ amọfa.’—1 Ahwo Kọrint 9:23.