Kpohọ eme nọ e riẹ eva

ARIA 22, 2023
DOMINICAN REPUBLIC

A Rovie Oria Ugheriwo Ọkpokpọ Fihọ Uwou Ogha Dominican Republic

A Rovie Oria Ugheriwo Ọkpokpọ Fihọ Uwou Ogha Dominican Republic

Evaọ edẹ 14 Aria, 2023, Isẹri Jihova a rovie oria ugheriwo ọkpokpọ fihọ uwou ogha Dominican Republic nọ o rrọ Santo Domingo. A jariẹ dhesẹ eware nọ e via evaọ oke nọ u kpemu, yọ odẹ nọ a se oria nana họ “Epanọ A ro Kru Ẹrọwọ Rai No Anwae Ze.” A jọ eware nọ a dhesẹ na ta kpahe epanọ Isẹri Jihova nọ e rrọ Dominican Republic a be rọ gọ Jihova avọ oghọghọ ghelọ ukpokpoma gbe edawọ, wọhọ idibo Jihova efa.

Akwa nana ahwo a rẹ rọ nya kpohọ oria ugheriwo na evaọ uwou ogha na

A gbiku eware nọ Isẹri Jihova a je ru evaọ Dominican Republic oke nọ a ro muhọ obọ. Eware nana jọ họ, epanọ Isẹri Jihova a jẹ rọ rehọ ebe mai gbe egramafonu ta usi uwoma Uvie na. Ofariẹ, a dhesẹ epanọ a jẹ rọ rehọ ebe-usi gbe irediyo whowho usi uwoma na re ahwo buobu a sae riẹ uzẹme na. Ahwo nọ a kpohọ ugheriwo evaọ oria na a rẹ ruẹ epanọ imishọnare ọsosuọ a ro mu usi uwoma họ ẹta evaọ Dominican Republic evaọ 1945.

Imishọnare ọsosuọ a jẹ ta usi uwoma kẹ ahwo evaọ idhu iti, yọ oghẹrẹ imoto nọ a rẹ dhẹ evaọ edhere itreni, wọhọ ọnọ ọ rrọ ekọlọ iyẹlo na a jẹ hae rro nya; a re se ai speeders

Ofariẹ, a jọ oria ugheriwo na dhesẹ epanọ Isẹri Jihova a jẹ rọ ta usi uwoma evaọ ikpe buobu nọ egọmeti o ro fi awhaha họ iruo rai evaọ Dominican Republic. Dede nọ ukpokpoma ogaga o je te ai, inievo emezae gbe erọ emetẹ mai evaọ Dominican Republic a wo udu, a jẹ rọ obọ kere ebe mai rọ kẹ ahwo. Nọ oke o be nya na, ahwo buobu a te wuhrẹ uzẹme na, a te kurẹriẹ. Ukuhọ riẹ, a te dhesẹ iruo Isẹri Jihova evaọ oke mai, gbe idhere sa-sa nọ inievo emezae gbe erọ emetẹ mai a be rọ ta usi uwoma evaọ Dominican Republic.

Brọda Leonel Peguero, nọ o bi ru iruo evaọ uwou ogha Dominican Republic ọ ta nọ: “A jọ oria ugheriwo na dhesẹ eware nọ a ru evaọ oke nọ u kpemu gbe erọ oke mai na. Whọ rẹ ruẹ eware anwae, iwoho, eware nọ a rekọdo gbe ividio. O wọhọ ẹsenọ ohwo ọ be jọ iroro riẹ ruẹ epanọ iruo usi uwoma ota na u ro muhọ evaọ oke nọ u kpemu gbe epanọ iruo na e be rọ nyaharo enẹna. Ma zizie ahwo kpobi re a nyaze te ruẹ eware nọ e rrọ oria ugheriwo nana kẹ omarai.”