Kpohọ eme nọ e riẹ eva

Inievo nọ i ru iruo evaọ uwou ogha Colombia na

AZIE 29, 2023
COLOMBIA

Ugheriwo O Wariẹ Muhọ no Evaọ Uwou Ogha Colombia nọ A Ruẹrẹ no Obọ

Ugheriwo O Wariẹ Muhọ no Evaọ Uwou Ogha Colombia nọ A Ruẹrẹ no Obọ

Kẹle na a ruẹrẹ uwou ogha Colombia na soso. A mu iruo na họ evaọ Ava 2019, yọ a ku iruo na họ evaọ Asa 2023. Inievo-emezae gbe erọ emetẹ nọ e fialoma ze kẹ iruo na i bu vi egba ivẹ (200). Inievo nana jọ a no Australia, Canada, Chile, Dominican Republic, England, gbe United States ze.

Aye jọ avọ ọmọzae riẹ nọ a ziọ ugheriwo evaọ uwou ogha Colombia nọ a ruẹrẹ obọ na

Ugheriwo u muhọ evaọ ẹdẹ ọsosuọ Azeza, 2023. Onana o jọ orọ ọsosuọ nọ ahwo a ro kpohọ ugheriwo evaọ uwou ogha na nọ a ruẹrẹ iẹe no obọ. Oniọvo-ọmọzae jọ nọ a re se John Rodriguez, nọ ọ họ-ame evaọ etoke okpẹyao COVID-19 na o ri kpohọ ugheriwo evaọ uwou ogha na ẹdẹvo ho. Ọ ta nọ: “Iruo nọ a bi ru evaọ etenẹ na i bi dhesẹ oruaro Jihova gbe epanọ o you omai te. Eva e were omẹ gaga, me yere Jihova nọ mẹ rọ rrọ ukoko nana.” Oniọvo-ọmọzae ọfa jọ ọ ta nọ: “Oghẹrẹ nọ inievo na a be rọ rehọ eware ekpokpọ nọ a ku ze ru iruo evaọ etẹe o were omẹ gaga. Uwou ogha na nọ a ruẹrẹ na u fiobọhọ kẹ omẹ ruẹ nọ ukoko Ọghẹnẹ o be ginẹ nyaharo.”

Uwou ogha na o rehọ ikilomita udhuvẹ gbivẹ thabọ no Bogotá, nọ ọ rrọ okpẹwho esuo Colombia evaọ ofẹ obọze ẹkpẹlobọ ovatha-ọre. Uwou ogha na o be rẹrote iruo usi uwoma ota gbe iruo efa evaọ Bolivia gbe Colombia. Uwou ogha Colombia na a be jọ printi ebe rọkẹ erẹwho Ecuador, Peru, gbe Venezuela. Uwou ogha na nọ a ruẹrẹ na u ti fiobọhọ re inievo na a sae rẹrote iruo usi uwoma ota na ziezi evaọ ekwotọ yena. Ibriwou nọ a be rria gbe ifisi nọ a ruẹrẹ i bu vi egba esa gbe udhuvẹ gbikpe (350), a tẹ jẹ bọ ifisi ekpokpọ efa nọ i te udhuhrẹ gbe ikpegbezeza (156). A bọ iwou nọ a re jo ru isukulu re, gbe iwou efa nọ a rẹ jọ gbẹgwae. A te je ru edhere nọ ahwo nọ a ziọ ugheriwo a rẹ rọ nya ogba na wariẹ kẹre vi epaọ ọsosuọ.

Ọgwa nọ a re kokohọ nọ a ruẹrẹ obọ evaọ uwou ogha Colombia na. Egbara egba ene gbe udhe (420) eye e rrọ eva riẹ. Uwoho ọsese na: Inievo-emezae nọ e be ruẹrẹ ọgwa nọ a re kokohọ na

Brọda Tait Boulais nọ ọ jọ ọnọ o re koko iruẹru ogbẹgwae ebabọ na họ ọ ta nọ: “Jihova ọ ghale iruo na o make rọnọ ebẹbẹ buobu e jọ otọ fiki okpẹyao COVID-19. Dede nọ a ta kẹ ahwo jọ buobu inọ a seba re umutho ahwo jọ ọvo a ru iruo na, inievo nọ i kiọkọ a jẹ rọ evawere fiobọhọ evaọ iruo nọ a ri ru ẹdẹvo ho hayo iruo nọ a ri wuhrẹ kpahe ziezi hi. Wọhọ epanọ o via kẹ idibo Jihova buobu evaọ okenọ u kpemu, ma ruẹ epanọ Jihova ọ rọ rehọ ẹzi riẹ fiobọhọ kẹ inievo nana wuhrẹ eware ekpokpọ je wo onaa ziezi evaọ iruo na.”

Ma riẹ nọ uwou ogha na nọ a ruẹrẹ na u ti fiobọhọ kẹ inievo na re a sae rẹrote iruo usi uwoma ota na evaọ ofẹ akpọ nana nọ iruo na e be jọ nyaharo ziezi na.—Iruẹru Ikọ 1:8.