Kpohọ eme nọ e riẹ eva

Okọto Izi Orẹwho Colombia

AZEZA 9, 2021
COLOMBIA

Okọto Izi Orẹwho Colombia O Bruoziẹ Jọ nọ U Wuzou Gaga Inọ Ọmọ nọ Ọ Riẹ Oware no Rekọ O ri Te Ọkpako Ho O Wo Udu nọ Ọ rẹ rọ Jiroro kẹ Omobọriẹ

Okọto Izi Orẹwho Colombia O Bruoziẹ Jọ nọ U Wuzou Gaga Inọ Ọmọ nọ Ọ Riẹ Oware no Rekọ O ri Te Ọkpako Ho O Wo Udu nọ Ọ rẹ rọ Jiroro kẹ Omobọriẹ

Evaọ Ane 7, 2021, Okọto Izi Orẹwho Colombia o bruoziẹ kẹ ọmọ jọ nọ ọ rrọ Osẹri Jihova. Okọto o ta nọ dede nọ o ri te ọkpako ho rekọ ọ riẹ oware no na, o wo udu nọ ọ sae rọ jiroro kẹ omobọriẹ kpahe oghẹrẹ usiwo-imu nọ ọ gwọlọ. Oware nọ o via họ, ọmọ na ọ ta nọ usiwo-imu nọ ọ gwọlọ họ, onọ a re jo se azẹ fihọ ohwo oma ha. Okọto Izi Orẹwho na o rọwo inọ efọmo durable power of attorney (DPA) nọ ọmọ na ọ whobọhọ na o rọwokugbe uzi. Okọto na o tẹ jẹ ta nọ orọnikọ esẹgbini emọ nana a bi gbabọkẹ usiwo-imu emọ rai hi.

Sista Daniela Caicedo avọ ọsẹgboni riẹ

Evaọ Asoi 27, 2020, a ta nọ Sista Daniela Caicedo, nọ ọ jọ ikpe 16 oke yena, o wo ẹyao nọ a re se B-cell acute lymphoblastic leukemia (ẹyao egẹgẹ azẹ-ọfuafo nọ i bu oma na hrọ). Ahwo ọspito na a gwọlọ nọ a re se azẹ fihọ iẹe oma je ru oghẹrẹ usiwo-imu jọ nọ a re se chemotherapy kẹe. Dede nọ oke yena ẹyao na ọ da ruọ iẹe oma gaga no jẹ lẹliẹ oma lọhọ iẹe no, Daniela ọ romakpotọ ta kẹ ahwo ọspito na nọ a se azẹ fihọ iẹe oma vievie he fiki oware nọ ọ rọwo evaọ Ebaibol na.​—Iruẹru Ikọ 15:29.

Evaọ Azeza 24, 2020, the Colombian Institute of Family Welfare (ICBF) o tẹ kẹ ahwo ọspito na udu inọ a se azẹ fihọ Daniela oma dede nọ ọ rọwo ho. Ogbẹgwae ICBF na o tẹ jẹ ta nọ jọ a ru etẹste ẹvori kẹ Daniela sọ oware jọ o thọ kugbe ẹvori riẹ nọ o be lẹliẹe se nọ a se azẹ fihọ iẹe oma ha. Evaọ okenọ a je ru etẹste na, oniọvo-ọmọtẹ mai na o dhesẹ nọ o te ohwo nọ ọ rẹ jiroro kẹ omariẹ kpahe oghẹrẹ usiwo-imu nọ ọ gwọlọ gbe ọnọ ọ gwọlọ họ. Etẹste na o te je dhesẹ nọ orọnikọ ẹgba a gba Daniela họ họ, nọ ọ rọ se nọ a se azẹ fihọ iẹe oma ha, ukpoye, fiki oware nọ ọ rọwo evaọ Ebaibol na ọ rọ se.

Oguẹdhọ okọto ọsese ẹwho na o bruoziẹ kẹe inọ dede nọ o ri te ọkpako ho rekọ ọ riẹ oware no na, o wo udu nọ ọ sae rọ se nọ a se azẹ fihọ iẹe oma ha. Rekọ, okọto nọ u kpehru vi orọ ọsosuọ na nọ a kpare ẹdhọ na kpohọ, ọ tẹ ta nọ otẹrọnọ edọktọ riẹ ọ ta nọ u kiehọ re a se azẹ fihọ iẹe oma, jọ a se azẹ fihọ iẹe oma. Avọ obufihọ ọsẹgboni riẹ, Daniela ọ tẹ kpare ẹdhọ na kpohọ Okọto Izi Orẹwho na.

Evaọ oziẹ urere nọ Okọto Izi Orẹwho na o bru, okọto na o bruoziẹ kẹ Daniela inọ o wo udu nọ ọ rẹ rọ se nọ a se azẹ fihọ iẹe oma ha. Okọto na o tẹ jẹ ta nọ ohwo kpobi o wo udu nọ ọ rẹ rọ salọ egagọ nọ e were e riẹ, onọ o rẹ “thọ usu nọ ohwo na o wo kugbe Ọghẹnẹ riẹ je wọe yoẹme kẹe.” U te no ere no, okọto na o ta nọ, nọ a tẹ gba Daniela họ re a se azẹ fihọ iẹe oma, o rẹ raha usu nọ o wo kugbe Ọghẹnẹ riẹ, o tẹ jẹ wọso uzi nọ o ta nọ ohwo kpobi o wo udu nọ ọ rẹ rọ jiroro kẹ omobọriẹ na. Okọto na o tẹ jẹ ta nọ Daniela o wo udu nọ ọ rẹ rọ salọ oghẹrẹ usiwo-imu nọ ọ rẹ rehọ, onọ a re jo se azẹ fihọ iẹe oma ha.

Oziẹ nana nọ okọto na u bru na o gba edọktọ gbe enọso kpobi họ re a rọ adhẹẹ kẹ udu nọ emọ nọ e rrọ Isẹri Jihova nọ i ri te ekpako ho rekọ a riẹ oware no a wo, nọ a rẹ rọ salọ oghẹrẹ usiwo-imu nọ a gwọlọ fiki oware nọ a rọwo no Ebaibol ze. Elọya jọ evaọ usu elọya nọ i guẹdhọ na ọ ta nọ: “Okọto Izi Orẹwho na o ruẹ vuhumu nọ, dede nọ emọ nana i ri te ekpako ho rekọ a riẹ oware no na, a wo udu nọ a re ro yeri uzuazọ nọ o were e rai, onọ o rẹ wha evawere se ai. Fikiere, re emọ nana a sai yeri emamọ uzuazọ, o gwọlọ nọ a rẹ rọ adhẹẹ kẹ oware nọ a rọwo fiki egagọ rai o tẹ make rọnọ iguẹdhọ hayo edọktọ a rọwo fihọ ai hi.”

Nọ Okọto Izi Orẹwho na o bruoziẹ kẹ Daniela no, ọ tẹ ta nọ: “Oware nọ o be mae kẹ omẹ evawere họ, oziẹ nana o wha orro se odẹ Jihova. Oware nọ o via na u wuhrẹ omẹ nọ, Jihova ọ sai zihe odawọ kpobi nọ u te omai ruọ uvẹ nọ ma sai ro dhesẹ nọ ma you rie.”

Oma Daniela o dina kẹe uvẹ no, yọ ọ gbẹ be rehọ imu riẹ. O ti kpohọ isukulu ekobaro evaọ Aria 2021. Ma riẹ nọ eva e rẹ were Jihova Ọghẹnẹ mai, nọ ọ be ruẹ izoge nọ e be rọ uruemu rai wha orro sei.​—Olezi 148:12, 13.