Kpohọ eme nọ e riẹ eva

Uwou efafa ọkpokpọ nọ a ro mudhe evaọ Riohacha, evaọ Colombia

ASOI 30, 2023
COLOMBIA

Inievo nọ E be Fa Ẹvẹrẹ Wayuunaiki A Kwa Kpohọ Oria Ọfa Evaọ Colombia

Inievo nọ E be Fa Ẹvẹrẹ Wayuunaiki A Kwa Kpohọ Oria Ọfa Evaọ Colombia

Evaọ edẹ 18 amara Asa, 2023, a rọ uwou efafa ọkpokpọ koyehọ remote translation office (RTO) evaọ ẹvẹrẹ Wayuunaiki ro mudhe evaọ Riohacha, nọ ọ rrọ Colombia. Ahwo nọ a be ta ẹvẹrẹ Wayuunaiki a bu te oware wọhọ idu egba ihrẹ (700,000). Ẹvẹrẹ nana họ ẹvẹrẹ nọ emotọ evaọ Colombia gbe Venezuela a be hae mae ta.

Evaọ oke ọsosuọ, iwou ivẹ nọ a haya nọ e rro tere he a jẹ jọ ru efafa, yọ ikpẹ gbe itanẹte e jariẹ tere he. Fikiere ifonu e jẹ hae nya ha. Fiki onana, inievo nọ e rrọ uwou ogha evaọ Colombia a tẹ dẹ uwou ologbo jọ nọ o wo iwou ezeza, a tẹ ruẹrẹ ae. A rọ eria jọ evaọ iwou nana ru ifisi, a tẹ be rria eria jọ. A kuenu kẹ ae re a mu iruo na họ evaọ Akpe 2022, yọ a ku iruo na họ evaọ Ọvo 2023.

Brọda Juan Felipe Rodríguez, nọ ọ rrọ utu Ẹko-Iruo Ebabọ (Local Design/Construction Department) ọ ta kpahe ohẹriẹ nọ o rrọ uwou okpokpọ na. Ọ ta nọ: “Iwou ekpokpọ na i wo emamọ eria nọ a rẹ jọ rekọdo, eria nọ a re jo ru efafa, emamọ itanẹte gbe ẹjini nọ a re ro tu ikpẹ nọ ikpẹ e gbẹ riẹ hẹ.”

Inievo esa nọ i bi ru iruo evaọ uwou efafa ọkpokpọ ọrọ ẹvẹrẹ Wayuunaiki

Ukpe 1998 a ro mu ebe ukoko na họ ẹfa fihọ ẹvẹrẹ Wayuunaiki. Obọnana inievo 14 ae a bi ru iruo efafa na. Iwhowho-uvie nọ e be ta ẹvẹrẹ Wayuunaiki a bu te oware wọhọ egba ene (400), yọ a rrọ ikoko nọ i bu te 20.

Eva e were omai gaga inọ Jihova ọ be rọ ukoko riẹ fiobọhọ kẹ ahwo nọ a be ta evẹrẹ sa-sa re a “si kẹle [iẹe].”—Jemis 4:8.