Kpohọ eme nọ e riẹ eva

Inievo nọ e rẹ ta ẹvẹrẹ Emberá (Chamí) gbe Guambiano a bi dede inievo nọ e ziọ okokohọ rehọ. Uwoho nọ ọ rrọ ẹkpẹlobọ evaọ obehru: Henry Carrasco nọ ọ rrọ ikpe ikpegbivẹ nọ ọ rrọ ohwo Emberá (Chamí) nọ ọ jẹ họ-ame. Uwoho nọ ọ rrọ ẹkpẹlobọ evaọ obotọ: Inievo-emezae ivẹ nọ e be fa eme okokohọ na fihọ ẹvẹrẹ Guambiano

AZEZA 9, 2023
COLOMBIA

A Ru Okokohọ Obọdẹ Jọ Evaọ Ẹvẹrẹ Guambiano gbe Emberá (Chamí)

A Ru Okokohọ Obọdẹ Jọ Evaọ Ẹvẹrẹ Guambiano gbe Emberá (Chamí)

Evaọ Ẹdoka nọ ọ jọ edẹ 26 Asa 2023, a ru okokohọ obọdẹ jọ evaọ evẹrẹ sa-sa evaọ okpẹwho Cali nọ ọ rrọ Colombia. Onana họ okokohọ ọsosuọ nọ a jọ fa ẹvẹrẹ Spanish fihọ ẹvẹrẹ Guambiano gbe Emberá (Chamí). Ahwo nọ a kpohọ okokohọ na a bu vi odu ọvo gbe egba ezeza (1,600). Yọ ahwo ẹvẹrẹ Guambiano nọ a bu te udhuvẹ gbe eree, gbe ahwo ẹvẹrẹ Emberá (Chamí) nọ a bu te udhosa gbe ikpegberee, a jọ usu ahwo na.

Ma be ta ẹme na, evaọ Colombia, ahwo nọ a be ta ẹvẹrẹ Guambiano a bu vi idu udhegbọvo (21,000), yọ ahwo nọ a be ta ẹvẹrẹ Emberá (Chamí) a bu vi idu udhosa gbe ikpegbihrẹ (77,000). Evaọ okenọ u kpemu, eware nọ a sae rọ fa ẹme fihọ ẹvẹrẹ ọfa evaọ etoke okokohọ e jọ Egwa Ikokohọ nọ e rrọ Colombia ha. Fikiere ikokohọ ẹvẹrẹ Spanish ahwo nọ a be ta ẹvẹrẹ ọfa a jẹ hai kpohọ, o tẹ make rọnọ a bi wo otoriẹ Spanish tere he.

Nọ ahwo nọ a be ta evẹrẹ nana a yo kpahe okokohọ obọdẹ nana, a te mu ugho họ ekokohọ. Oware nana imaree nọ e rrọ uviuwou Carrasco a ru. Oria nọ a be rria u thabọ gaga no Ọgwa Okokohọ na. Re a sai te Ọgwa Okokohọ na, a rẹ kake nya otọ evaọ euwa esa, a vẹ jẹ ruọ omoto evaọ euwa ikpegbivẹ. Rekọ, makọ epanọ okokohọ na o thabọ te na, gbe epanọ ugho nọ a te raha u ti bu te na, onana o lẹliẹ e rai nwene iroro ho. Fikiere emerae buobu taure oke okokohọ na o te ti te, a tẹ be hai ru eware nọ a rẹ zẹ re a sae ruẹ ugho jẹ ofa kpohọ okokohọ na. Evaọ etoke okokohọ na, ọmọzae rai nọ a re se Henry, nọ ọ rrọ ikpe ikpegbivẹ ọ jọ usu imava nọ e họ-ame nọ a rẹ ta ẹvẹrẹ Emberá (Chamí). Ofariẹ, imava jọ nọ e rẹ ta ẹvẹrẹ Guambiano a họ-ame re.

Inievo nọ e rẹ ta ẹvẹrẹ Emberá (Chamí) gbe Guambiano nọ a be gaviezọ kẹ eme okokohọ evaọ ẹvẹrẹ rai

Oniọvo-ọmọtẹ jọ nọ a re se Adrianin Morales, nọ ọ jẹ fa ẹvẹrẹ Spanish fihọ ẹvẹrẹ Guambiano evaọ okokohọ na ọ ta nọ: “U woma gaga inọ a fa eme okokohọ na fihọ ẹvẹrẹ mẹ. Eva e were omẹ gaga nọ ohwo kpobi nọ ọ ziọ okokohọ na o ti wo otoriẹ eware nọ Jihova o bi wuhrẹ omai evaọ ẹvẹrẹ obọriẹ.”

Oniọvo-ọmọzae jọ nọ a re se Diomedes Velasco nọ ọ jẹ fa ẹvẹrẹ Spanish fihọ ẹvẹrẹ Guambiano ọ ta re nọ: “Oke ọsosuọ nọ a vuẹ omẹ nọ mẹ te jọ usu ahwo nọ a te fa eme evaọ okokohọ na, ozọ u je mu omẹ. Rekọ nọ mẹ jẹ ruẹ ikpeware nọ Jihova o bi ru kẹ ahwo nọ a be ta evẹrẹ efa, udu o tẹ jọ ọmẹ awọ. Mẹ tẹ te riẹ nọ iruo nana yọ uvẹ ọghọ ulogbo nọ u no obọ Jihova ze.”

Eva e were omai gaga inọ ahwo ẹvẹrẹ kpobi a be ta nọ: “Wha nyaze re ma kpobọ ugbehru Jihova.”—Aizaya 2:3.