Kpohọ eme nọ e riẹ eva

Inievo-emetẹ mai nọ a bi dhesẹ ibroshọ Reawere Uzuazọ Bẹdẹ Bẹdẹ! na kẹ ahwo, yọ whọ rẹ jọ obemu rai ruẹ uke Uwou-Eroro nọ uzoẹme riẹ o ta nọ, “Ebaibol na Ọ Sai Fiobọhọ kẹ Ahwo nọ A be Mọ Ẹyao Iroro”

AZIE 19, 2023
BOLIVIA

A Fiobọhọ kẹ Ahwo Riẹ Kpahe Ẹyao Iroro Ziezi Evaọ International Book Fair Evaọ Bolivia

A Fiobọhọ kẹ Ahwo Riẹ Kpahe Ẹyao Iroro Ziezi Evaọ International Book Fair Evaọ Bolivia

A thueki nọ a re se International Book Fair of Santa Cruz evaọ okpẹwho Santa Cruz de la Sierra, evaọ Bolivia, no edẹ 31 Asoi rite edẹ 11 Azeza, 2023. Ahwo nọ a ziọ eki na a bu vi idu udhozeza (120,000). Evaọ oria nọ inievo mai a fi ebe mai họ, Uwou-Eroro Na Ọrọ 1 2023, a mai dhesẹ kẹ ahwo. Uzoẹme riẹ o ta nọ, “Ebaibol na Ọ Sai Fiobọhọ kẹ Ahwo nọ A be Mọ Ẹyao Iroro.”

Uwou-Eroro Na Ọrọ 1 2023, ọrọ ẹvẹrẹ Spanish nọ uzoẹme riẹ o ta nọ, “Ebaibol na Ọ Sai Fiobọhọ kẹ Ahwo nọ A be Mọ Ẹyao Iroro”

Enwenọ inievo emezae gbe erọ emetẹ nọ i bu te egba ivẹ (200) ae a wobọ evaọ usi uwoma ota nana. Ahwo nọ a ziọ oria ebe mai evaọ etoke eki na a bu vi idu udhe (20,000). Inievo mai a je dhesẹ ividio nọ e rrọ oria itanẹte mai evaọ etẹlẹvishọno, yọ a fiobọhọ kẹ ahwo riẹ epanọ a sae rọ kiẹ kpahe izoẹme sa-sa evaọ oria itanẹte mai, jw.org. Ebe nọ a kẹ ahwo i bu te enwenọ idu isoi gbe egba isoi (5,500), yọ ividio nọ a dhesẹ kẹ ahwo i bu te oware wọhọ egba ezeza (600). Ofariẹ, ahwo udhuvẹ gbisoi nọ a ziọ oria ebe mai, a jọ oria itanẹte mai jw.org fi odẹ hotọ re Isẹri Jihova a nyai wuhrẹ ae Ebaibol.

Nọ aye jọ ọ ruẹ uzoẹme nọ o ta kpahe ẹyao iroro evaọ oria ebe mai, ọ tẹ nyabru oniọvo-ọmọtẹ jọ, ọ tẹ vuẹe nọ ẹyao iroro o be kẹ oni riẹ uye. Ọ tẹ jẹ ta nọ ọye omariẹ o re roro iroro gaga yọ ọ rẹ jọ ọkọkora. Oniọvo-ọmọtẹ na o te fiobọhọ kẹe re ọ danlodu Uwou-Eroro nọ a jọ ta kpahe ẹyao iroro na fihọ ifonu riẹ, gbe ibroshọ Reawere Uzuazọ Bẹdẹ Bẹdẹ! Aye na o te je kere odẹ fihotọ evaọ oria itanẹte mai jw.org ababọ okioraha, re Isẹri Jihova a nya kpobọ uwou riẹ re a wuhrẹ iẹe Ebaibol na.

Inievo emezae gbe erọ emetẹ mai a dikihẹ oria nọ a fi ebe mai họ evaọ International Book Fair na

Ohwo jọ nọ o re fiobọhọ kẹ ahwo nọ a be mọ ẹyao iroro, ọ rehọ Uwou-Eroro nọ o ta kpahe ẹyao iroro na. Ọ ta nọ: “Mẹ gwọlọ nọ me re dhesẹ uzoẹme nana kẹ ahwo nọ me bi siwi re a sei. Mẹ riẹ nọ eware nọ a ta kpahe gbe eria Ebaibol nọ a fodẹ evaọ eva riẹ i ti fiobọhọ kẹ ae.” Aye ọfa jọ nọ oni riẹ o whu kẹle na ọ nyaziọ oria ebe mai na. Nọ a jọ jw.org dhesẹ uzoẹme nana kẹe, “When a Parent Dies” nọ o rrọ oria “Peace and Happiness,” o tuduhọ iẹe awọ gaga.

Evaọ akpọ na, ahwo nọ a be mọ ẹyao iroro gbe ahwo nọ a be ruawa a bu wumuo ho, fikiere eva e were inievo mai nọ e rrọ Bolivia re a fiobọhọ kẹ ahwo wo omosasọ no emamọ ehrẹ nọ e rrọ Ebaibol na ze.—Olezi 34:18.