Kpohọ eme nọ e riẹ eva

Ahwo nọ a mu fihọ uwou-odi na nọ a be rọ Ebaibol Efafa Akpọ Ọkpokpọ na evaọ ẹvẹrẹ Spanish ru ewuhrẹ

AZIE 9, 2020
ARGENTINA

Ahwo nọ A Mu Fihọ Uwou-Odi A bi Wuhrẹ Ebaibol na Evaọ Udevie Okpẹyao Na

Ahwo nọ A Mu Fihọ Uwou-Odi A bi Wuhrẹ Ebaibol na Evaọ Udevie Okpẹyao Na

Evaọ ubrotọ San Luis, Argentina, inievo mai a be jọ itanẹte rọ ividio thuru kugbe ahwo nọ a mu fihọ uwou-odi jọ nọ ogba riẹ u kpehru gaga ru iwuhrẹ ukoko koka koka je bi wuhrẹ Ebaibol na kugbe ai. Onana họ orọ ọsosuọ nọ inievo mai a rọ rehọ edhere utionana ta usi uwoma kẹ ahwo nọ a mu fihọ uwou-odi no evaọ Argentina.

Anwọ ikpe jọ ze na, inievo mai nọ e rrọ San Luis a be hai kpohọ uwou-odi nana kẹse kẹse, re a ru iwuhrẹ ukoko je wuhrẹ Ebaibol na kugbe ahwo nọ a mu fihọ uwou-odi na. Rekọ anwọ Asa 2020 ze, inievo mai a gbẹ be nya kpobọ uwou-odi na ha fiki uzi nọ a jọ orẹwho na fihọ inọ ahwo a du no oria ruọ oria ha na. Ahwo egọmeti nọ a be rẹrote uwou-odi na a kẹ inievo mai uvẹ re a jọ itanẹte rehọ ividio thuru kugbe ahwo nọ a mu fihọ uwou-odi na re a ru iwuhrẹ ukoko je wuhrẹ Ebaibol na kugbe ae wọhọ epanọ a jẹ hai ru vẹre na.

Nọ ohwo nọ o wuzou ahwo nọ a be rẹrote uwou-odi na ọ ruẹ epanọ iwuhrẹ nana i bi ro fiobọhọ kẹ ahwo nọ a mu fihọ uwou-odi na nwene, ọyomariẹ avọ aye riẹ a te mu iwuhrẹ na họ ẹnya re. Ọ ta nọ: “Iwuhrẹ nana i wuzou gaga, keme i bi fiobọhọ kẹ ahwo nọ a mu fihọ uwou-odi na si kẹle Ọghẹnẹ jẹ jọ sasasa evaọ oke nana nọ ahwo a be sai weze ziọ uwou-odi na te ruẹ e rai hi na. U te no ere no, oghẹrẹ nọ iwuhrẹ nana i bi ro fiobọhọ kẹ ai yerikugbe ohwohwo dhedhẹ, u woma gaga. Uzẹme riẹ họ, uwuhrẹ Ebaibol na u bi fiobọhọ kẹ omai nọ ma be sai ro le utee mai tobọ, koyehọ, re ma fiobọhọ kẹ ahwo nọ a mu fihọ uwou-odi na jọ emamọ ahwo evaọ ẹwho na.”

Ọzae jọ nọ a mu fihọ uwou-odi na o kere ileta se inievo nọ i bi ru iwuhrẹ na inọ: “Ẹdẹ kpobi nọ me te nọ ubruwou uwou-odi nọ a fi omẹ họ na kpohọ iwuhrẹ, . . . mẹ rẹ kpairoro vrẹ ebẹbẹ gbe awaọruọ mẹ kpobi, oma o rẹ gbẹ jọ omẹ ọkọkora hayo goli hi, eva ọvo e rẹ were omẹ. Wha kobiruo gaga.”

Nọ okpẹyao nana ọ gbẹ rrọ otọ evaọ akpọ na soso na, eva e be were omai inọ inievo mai a bi fiobọhọ kẹ ahwo re a wo erere no ovuẹ nọ o rrọ Ebaibol na ze.—Aizaya 48:17, 18.