Kpohọ eme nọ e riẹ eva

AKPE 18, 2023
ANGOLA

A Siobọno Obe Matiu gbe Iruẹru Ikọ Evaọ Ẹvẹrẹ Obọ rọ t’Ẹme Angola

A Siobọno Obe Matiu gbe Iruẹru Ikọ Evaọ Ẹvẹrẹ Obọ rọ t’Ẹme Angola

Evaọ okokohọ obọdẹ jọ nọ a ru evaọ edẹ 23 Azie, 2023, Brọda Johannes De Jager, nọ ọ rrọ Ogbẹgwae Uwou Ogha Angola o siobọno obe Matiu gbe obe Iruẹru Ikọ evaọ ẹvẹrẹ Obọ rọ t’Ẹme Angola nọ a re se Angolan Sign Language (LAS). Ahwo nọ kpohọ okokohọ na a bu te odu ọvo gbe egba eree gbe udhone gbe ọvo (1,881), yọ Ọgwa Okokohọ nọ ọ rrọ Luanda evaọ Angola a jo ru ei. Nọ a nwani siobọno ae no, a te fi ae họ itanẹte evaọ jw.org gbe JW Library Sign Language app re a danlodu rai.

Ahwo nọ a diezọ evaọ Angola a bu te oware wọhọ idu egba esa gbe udhosa (360,000). Ukpe 2010 a rọ to ukoko ọsosuọ ọrọ ẹvẹrẹ obọ rọ t’ẹme họ evaọ Angola. Rekọ enẹna, ikoko ẹvẹrẹ obọ rọ t’ẹme nọ e rrọ Angola i bu te ọgbagbihrẹ, itu ihrẹ gbe ẹko-ahwo nọ a ri te utu hu ọvo. Yọ iwhowho-uvie nọ e rrọ e rai i bu vi odu ọvo (1,000).

Onana họ orọ ọsosuọ nọ a rọ fa ebe Ebaibol na jọ fihọ ẹvẹrẹ obọ rọ t’ẹme Angola. Nọ oniọvo-ọmọzae jọ o rri obe Iruẹru Ikọ nọ a fa na no, ọ ta nọ: “Oghẹrẹ nọ a rọ fa oria nọ Filip ọ rọ dhẹ nyai fiobọhọ kẹ ọwharọ Ẹtiopia na evaọ obe Iruẹru Ikọ 8:​26-30 na, u fiobọhọ kẹ omẹ ruẹ nọ u fo nọ mẹ rẹ gbẹ daoma ziezi evaọ iruo usi uwoma ota na.”

Ma riẹ nọ obe Matiu gbe obe Iruẹru Ikọ nọ a siobọno evaọ ẹvẹrẹ obọ rọ t’ẹme Angola na u ti ru nọ ahwo buobu a te rọ riẹ nọ Jihova o gine you rai keme ‘ovao riẹ o be ghariẹ kẹ ae.’​—Ikelakele 6:25.