Kpohọ eme nọ e riẹ eva

ỌVO 8, 2021
IYẸRẸ AKPỌ SOSO

Usi Uvie na nọ Ma Whowho Evaọ 2020 Yọ Oware nọ “O rẹ Thọrọ Ẹro Vievie He” Evaọ Akpọ-Soso

Usi Uvie na nọ Ma Whowho Evaọ 2020 Yọ Oware nọ “O rẹ Thọrọ Ẹro Vievie He” Evaọ Akpọ-Soso

Usi Uvie na nọ Isẹri Jihova nọ e rrọ akpọ na soso a whowho evaọ amara Akpegbọvo 2020 yọ oware nọ ma te kareghẹhọ oke lelehie. Evaọ oke yena, mai ahwo buobu ma je no uwou ze he fiki ẹyao COVID-19 nọ o je vo gaga nọ o kpe ahwo buobu na. Ma gbẹ jẹ nyabru ahwo kpohọ obọ uwou hayo eria nọ i re zurie he re ma ta usi uwoma kẹ ae, wọhọ epanọ ma re ru vẹre. Ghele na, Isẹri Jihova a jọ akpọ na soso whowho usi Uvie Ọghẹnẹ. Mai ima ahwo buobu evaọ erẹwho sa-sa, ma daoma kpobi re ma rọ Uwou-Eroro uvitha ẹgbede Ọrọ avọ 2, 2020 kẹ ahwo buobu. Ma rehọ emagazini nana kẹ ahwo evaọ eria nọ a be jọ zẹ eki, ifisi sa-sa, te ifisi egọmeti, ahwo uviuwou mai, gbe amọfa buobu. Usi nana u fiobọhọ kẹ ahwo kpobi nọ a gaviezọ kẹ omai gaga. O tẹ jẹ wha evawere se omai kpobi nọ ma whowho usi na.

Rri epanọ o jọ kẹ umutho Isẹri Jihova jọ.

AUSTRALASIA

Sista Lucinda Furkin

Oniọvo-ọmọtẹ jọ evaọ obọ Australia nọ a re se Lucinda Furkin, nọ ọ rrọ ikpe ikpegberee, ọ họ-ame obọ. O kere nọ: “Oma mẹ o ga vievie he evaọ oke nọ ma jọ udevie usi uwhowho na. Rekọ o wọhọ ẹsenọ Jihova ọ be ta kẹ omẹ nọ jọ oma o rrọ omẹ hẹ. O wọhọ ẹsenọ o kru omẹ obọ jẹ be kẹ omẹ ẹgba nọ mẹ rẹ rọ ruabọhọ iruo na.”

Oniọvo-ọmọzae jọ evaọ obọ New Zealand nọ o wo aye gbe emọ ọ ta nọ usi Uvie nọ a whowho evaọ amara yena u fiobọhọ kẹ uviuwou rai gaga. Ọ ta nọ: “Ma wo emetẹ ene nọ e gbẹ maha nọ e rrọ ikpe ihrẹ, ikpe izii, ikpe ikpegbọvo, gbe ikpe ikpegbesa. Rekọ fikinọ ma rehọ usi uwhowho amara nana wọhọ iruo nọ Jihova Ọsẹ oyoyou mai na ọ kẹ uviuwou mai, ma rehọ iruo na zaharo ho. U ru nọ ma jẹ rọ ta usi uwoma na kẹdẹ kẹdẹ evaọ amara yena.”

BOTSWANA

Ọsẹro okogho jọ nọ a re se Kagiso Marumo avọ aye riẹ Lydia a rọ itanẹte vi Uwou-Eroro nọ ma ghale evaọ amara yena se imoni rai nọ e rrọ Isẹri Jihova ha. Ibuobu rai a yere i rai kẹ emagazini nọ a vi se ai na. Omoni Kagiso jọ nọ ọ rrọ edọkita ọ ta nọ oke nọ emagazini na o ro tei obọ, nwanọ oke nọ ọ rọ gwọlọ ovuẹ utioye gaga. Anọ ahwo jọ nọ e be mọ nọ o je siwi a jẹ nọe enọ kpahe Ọghẹnẹ. Emọ riẹ a te je duwu abọ họ eware imizi. Brọda Marumo avọ aye riẹ a tẹ nwane rọ ifonu sei, je mu Ebaibol họ ewuhrẹ kugbei owọwọ ẹdẹ yena. Enẹna, isiava ẹkpoka a bi wuhrẹ.

Brọda Kagiso Marumo avọ aye riẹ, Lydia

CANADA

Sista Soroya Thompson

Oniọvo-ọmọtẹ jọ nọ a re se Soroya Thompson nọ ọ rrọ ọkobaro evaọ obọ Ontario o kere nọ: “Usi Uvie na nọ ma whowho evaọ amara yena o lẹliẹ omẹ tẹrovi oware nọ o mai wuzou vi epaọ anwẹdẹ. U te je ru nọ mẹ rọ riẹ nọ iruo na e gbẹ rrọ otọ gidigba. O lẹliẹ omẹ kareghẹhọ re inọ Jihova o you ahwo-akpọ gaga, yọ ọ gwọlọ nọ a raha ohwo ọvo ho. Onana o soriẹ nọ mẹ rọ dawo ẹgba mẹ kpobi re mẹ ta usi uwoma na vi epaọ anwẹdẹ evaọ amara yena.”

Oniọvo-ọmọtẹ jọ nọ ọ rrọ obọ British Columbia ọ ta nọ: “Oke yena uzou u je dhe ohwo kpobi. Fikiere mẹ tẹ rehọ ọkobaro obufihọ sọ mẹ sai si iroro no ebẹbẹ mẹ omojọ. U fiobọhọ kẹ omẹ gaga, yọ o wha evawere se ahwo uviuwou mẹ re.”

Uwou ogha obọ Canada o niyẹrẹ nọ usi Uvie nọ ma whowho evaọ amara yena o lẹliẹ ahwo uviuwou si kẹle ohwohwo ziezi. Emaha na a ruẹ nọ iruo usi uwoma ota na i te rai re. A je kere ileta ekpẹkpẹ se ahwo. Ejọ i je fiobọhọ kẹ ahwo uviuwou rai kere edẹ ahwo fihọ ẹnvẹlopu nọ a bi ro vi ileta, rehọ estampo tamu ai, jẹ gwọlọ adrẹse ahwo nọ a ti vi ileta se.

FINLAND

Brọda Tuomisto nọ ọ rrọ ọsẹro okogho avọ aye riẹ a ta nọ: “Amara Akpegbọvo ebi ọ rẹ mae jọ evaọ ofẹ nọ ma rrọ na. Fikiere eva e were inievo na gaga, maero kọ ekobaro na, keme usi Uvie na nọ a whowho evaọ amara yena o wọhọ elo nọ o lo via evaọ ebi.”

Brọda Timo Tuomisto avọ aye riẹ, Eeva

Oniọvo jọ avọ aye riẹ a vi Uwou-Eroro na se ohwo jọ nọ a riẹ. Ohwo na o te kere ileta se ai ro yere ai. Ọ jọ ileta na ta nọ: “Nẹnẹ na, [me je se obe Ebaibol nọ a re se] Jemis. O ta nọ ẹrọwọ ababọ iruo o whu no. Ẹsikpobi Isẹri Jihova a be nyabru ahwo nyae ta usi uwoma kẹ ae je wuhrẹ ai Ebaibol. Iruo nọ i re ru ẹrọwọ ga eye a bi ru na.”

GREECE

Uwou ogha obọ Greece o ta nọ: “Ofu o bi dhe ahwo buobu fiki ẹyao na nọ o bi vo na gbe uzi nọ egọmeti o fihọ inọ jọ ahwo a daji uwou. Usi Uvie na nọ ma whowho na o sasa inievo na oma gaga. Ahwo buobu a ta nọ o wọhọ ame odhedhẹ nọ a kẹ ohwo nọ uruame u kpe gaga no.”

Sista Suzie Kontargiri

Sista Suzie Kontargiri ọ rehọ ọkobaro obufihọ dede nọ oma o jariẹ hẹ, yọ ọzae riẹ ọ rrọ ukoko na ha. Ọ ta nọ: “Usi Uvie na nọ ma je whowho na u ru nọ me gbe je roro iroro ho. Mẹ tẹ rọwo ze evaọ ohiohiẹ, eva ọvo e rẹ were omẹ, me ve mu iruo uwou mẹ họ eru, me ve there emu, je ru eware nọ u fo nọ me re ru kẹ ọzae mẹ. Kẹsena me ve mu usi uwoma họ. Ọzae mẹ nọ ọ rrọ ukoko ho dede ọ jẹ hae nọ omẹ ẹsibuobu nọ: ‘Kọ wha be ta usi uwoma nẹnẹ?’ Ọ ruẹ nọ eva e rẹ were omẹ ẹsikpobi nọ me te bi lele inievo-emetẹ efa ta usi uwoma.”

JAPAN

Sista Tamaki Hirota o kere ileta se ahwo egọmeti. Ọ ta nọ: “Jihova họ ohwo ọsosuọ nọ o kere ileta rọ ta usi uwoma kẹ ahwo. O kere ileta udhosa-gbezeza se ahwo-akpọ. U kri gaga no nọ a bi ro dhe ileta nana esese, yọ u bi fiobọhọ kẹ ae si kẹle iẹe. Jihova ọ riẹ nọ oghẹrẹ utiona nọ a rẹ rọ ta usi uwoma u re fiobọhọ gaga. Usi Uvie nana nọ ma whowho na o rẹ thọrọ ẹro vievie he.”

Sista Tamaki Hirota

SRI LANKA

A ta kẹ Sista Meharaja Vijaya avọ Sista Imayanathan Amutha inọ a kere ileta se ohwo jọ. Ethobọ a rọ rehọ adrẹse omọvo na kẹ aimava na. Nọ ileta ọsosuọ o te ohwo na obọ, o du rovie iei hi, o te ku ei kufiẹ. Kẹsena ileta avọ ivẹ i te tei obọ. Ohwo na ọ tẹ ta nọ o wohọ nọ oware nọ a kere fihọ ileta na u wuzou gaga, oye a ro vi ei isiava na. Fikiere o te se emagazini nọ a vi sei na. Ọ tẹ rehọ ifonu se oniọvo-ọmọtẹ nọ o vi ileta avọ ivẹ na. Kọ ere a ro mu ei Ebaibol họ ewuhrẹ.

No ẹkpẹlobọ kpohọ obọze: Sista Meharaja Vijaya avọ Sista Imayanathan Amutha

U wo aye jọ nọ o bi ru iruo egọmeti nọ a vi emagazini na se. Nọ emagazini na o tei obọ, o te se uwou ogha Sri Lanka. Ọ ta nọ dede nọ ọyomariẹ Oleleikristi, ọ re ruẹ Isẹri Jihova ẹdẹvo ho. Ọ tẹ jẹ ta nọ eware nọ e rrọ emagazini na gbe oria evuẹ itanẹte mai na e were riẹ gaga. Ọ tẹ nọ nọ: “Ẹvẹ mẹ sae rọ jọ Osẹri Jihova?” Inievo na a tẹ nwane ta kẹ oniọvo jọ re o wuhrẹ iẹe Ebaibol.

UNITED STATES OF AMERICA

Owhowho-uvie jọ nọ ọ rrọ ikpe ikpegbesa ọ rrọ isukulu nọ a rẹ jọ ta ẹme kpahe esuo-ohrowo gaga. O dhesẹ epanọ usi nọ ma whowho evaọ amara Akpegbọvo na o fiobọhọ kẹe te. Ọ ta nọ: “Mẹ vuẹ iticha mai oware nọ o soriẹ nọ me gbe bi ro dhomahọ ẹme isuẹsu hu. O te gbẹ bẹ omẹ re mẹ ta usi uwoma kẹ ae ẹdẹfa ha. Usi na nọ ma whowho na u ru ẹrọwọ mẹ ga ziezi no.”

Sista Margit Haring

Sista Margit Haring ọ ta ọkpọ ẹme ọvona. O kere nọ: “Usi Uvie na nọ ma whowho na o lẹliẹ omẹ wo udu gbe ajọwha ziezi. Oke ọsosuọ ozọ u je mu omẹ inọ, ‘Ẹvẹ mẹ te sae rọ ta usi uwoma kẹ ahwo nọ a be zẹ eware, enọ e rrọ ifisi sa-sa, gbe ahwo egọmeti?’ Usi nọ ma whowho na o lẹliẹ omẹ riẹ oghẹrẹ nọ mẹ rẹ rọ rehọ unu uwowolẹ ta usi uwoma kẹ ahwo. Yọ onana u ti fiobọhọ kẹ omẹ gaga evaọ obaro.”

Ọkpako ukoko jọ ọ ta nọ: “Nọ mẹ ruẹ inievo buobu nọ e be mọ okpẹyao nọ i ru ọkobaro obufihọ evaọ amara yena, akpọ o gbe omẹ unu. A hae sae ta nọ a wo ẹgba nọ a re ro ru ọkobaro ho. Rekọ a ta ere he. A fi oma họ iruo na ziezi. Ẹsikpobi nọ inievo nana a tẹ be ta epanọ eva e were rai te, je bi yere Jihova avọ inievo rai, aro o re su ohwo kpobi ame.”

Eme nọ inievo mai sa-sa evaọ akpọ na a ta kpahe usi Uvie nọ ma whowho na i bu wo umuo ho. Ma sai ti gbiku rai kpobi evaọ etenẹ hẹ. Eva e were omai gaga inọ ma whowho usi Uvie na kẹ ima ahwo buobu evaọ akpọ na soso.​—Jọn 15:11.