Kpohọ eme nọ e riẹ eva

ARIA 31, 2020
IYẸRẸ AKPỌ SOSO

Eware Obọdẹ Jọ nọ E Via Evaọ Ukpe Iruo 2020

Eware Obọdẹ Jọ nọ E Via Evaọ Ukpe Iruo 2020

Evaọ ukpe iruo 2020 na, Isẹri Jihova wariẹ akpọ na soso họ a rẹriẹ ovao dhe ebẹbẹ ilogbo nọ i kpomahọ egagọ rai. Rekọ ebẹbẹ nana i ru nọ inievo-emezae gbe erọ emetẹ mai a rọ gbaemu nọ a rẹ gbẹ talamu Jihova jẹ jọ okugbe ọvo.

Okpẹyao COVID-19 na họ oware nọ o mae wha ebẹbẹ na ze. Yọ ẹyao nana ọ wha oghẹrẹ ebẹbẹ buobu nọ a re ruẹ anwọ ikpe buobu ze he fihọ oria kpobi evaọ akpọ na soso.

Nọ okpẹyao nana ọ nwani du lawhe, Isẹri Jihova a tẹ nwani ru inwene kpata kpata. Enẹna a be rọ idhere efa kuomagbe kẹ egagọ rai, tuduhọ ohwohwo awọ, jẹ ta usi uwoma na.

Joma ta kpahe ‘emamọ iyẹrẹ’ jọ nọ i no ukpe iruo nana nọ a rẹ ruẹ obọ riẹ ha na ze.—Itẹ 15:30.

Ebaibol nọ A Siobọno

Evaọ ukpe iruo 2020 na, Isẹri Jihova a siobọno oma Ebaibol Efafa Akpọ Ọkpokpọ ọrọ Ikereakere Efuafo Na hayo abọ riẹ jọ evaọ evẹrẹ ọgbagbezeza. Awhaha nọ a fihọ fiki ẹyao COVID-19 na, u ru nọ a ro siobọno ibuobu Ebaibol nana evaọ itanẹte evaọ oghẹrẹ nọ a sai ro rovie ae evaọ ifonu gbe ekọmputa. Enẹna ma wo Ebaibol Efafa Akpọ Ọkpokpọ na hayo abọ riẹ jọ evaọ evẹrẹ nọ i bu te udhuzii gbe ikpegbesa (193).

Iyẹrẹ nọ I No Obọ Utu Ẹruorote na Ze

No anwọ Asa 18, 2020 ze, inievo nọ e rrọ Utu Ẹruorote na a be hae jọ ividio nọ a be hai ru kamara kamara ta kpahe oghẹrẹ nọ eware e rrọ rọkẹ inievo mai wariẹ akpọ na soso họ fiki okpẹyao COVID-19 na evaọ jw.org gbe JW Library.

Evaọ ividio ọsosuọ nọ a ru, Brọda Stephen Lett ọ ta nọ dede nọ okpẹyao nana o ru nọ eware e rọ rrọ gaga, onana yọ imuẹro inọ “ma be rria evaọ abọ urere edẹ urere na. Ababọ avro, ma sae ta nọ ma be rria abọ urere ọrọ abọ urere edẹ urere na!”

Dede nọ ma riẹ oware nọ o te via evaọ obaro ho, Brọda Lett ọ ta nọ: “Mai idibo Jihova ma re guegue vievie he.”

A jọ ividio nana ọvuọvo niyẹrẹ kpahe oghẹrẹ nọ eware e rrọ rọkẹ inievo mai wariẹ akpọ na soso họ. Iyẹrẹ nana i dhesẹ nọ u wuzou gaga re ma ru lele ekpọvio nọ i bi no obọ Utu Ẹruorote na ze. Evaọ eria buobu, ahwo egọmeti a jiri inievo mai rọkẹ owọ nọ a jẹ kpata kpata fiki okpẹyao nana nọ o du lawhe na.

Ekareghẹhọ nọ A re Ruẹ Obọ Riẹ Hẹ

Evaọ ikpe buobu, Isẹri Jihova a be hai kuomagbe re a ru ehaa Emu Owọwọ Olori na kukpe kukpe. Rekọ ukpe nana evaọ eria buobu, o lọhọ vievie he re a kuomagbe. Yọ evaọ eria jọ a fi uzi họ nọ ahwo buobu a kokohọ oria ovo ho. Fiki onana, inievo buobu gbe iviuwou sa-sa a te ru ebrẹdi Ekareghẹhọ na jẹ dẹ enwaene kẹ omobọ rai, kẹsena a te rri ovuẹ Ekareghẹhọ na nọ a rekọdo no evaọ itanẹte.

Rekọ evaọ erẹwho jọ a sae jọ itanẹte rri ovuẹ Ekareghẹhọ na ha. Wọhọ oriruo, iwou ogha ikpegbọvo evaọ Africa a ru ọruẹrẹfihotọ re a jọ etẹlẹvisiọno gbe iredio whowho ovuẹ Ekareghẹhọ na. Ọruẹrẹfihotọ nana u ru nọ inievo mai nọ i bu vi idu egba ene gbe ihrẹ (407,000) gbe amọfa buobu nọ a sai kele he a rọ gaviezọ kẹ ovuẹ Ekareghẹhọ na.

Etẹlẹvisiọno gbe Iredio nọ A bi Jo Ru Iwuhrẹ Ukoko

Utu Ẹruorote na o kẹ iwou ogha jọ uvẹ re a jọ etẹlẹvisiọno gbe iredio ru iwuhrẹ ukoko wọhọ epanọ a ru evaọ etoke Ekareghẹhọ na. Onana u ru nọ inievo mai nọ e rrọ ekwotọ nọ i wo igho tere he a be sae rọ gaviezọ kẹ iwuhrẹ ukoko evaọ etẹlẹvisiọno gbe iredio koka koka. Rite enẹna, iwou ogha udhegbesa evaọ Africa, Europe, North America, gbe South America a be rehọ etẹlẹvisiọno gbe iredio ru iwuhrẹ ukoko koka koka.

Egbẹgwae Obufihọ kẹ Ahwo nọ Eware Okpẹtu E Via Kẹ

Fiki okpẹyao COVID-19 na, eware e rrọ gaga kẹ inievo-emezae gbe erọ emetẹ mai buobu. Wariẹ akpọ na soso họ, a rehọ Egbẹgwae Obufihọ kẹ Ahwo nọ Eware Okpẹtu E Via Kẹ nọ i bu vi egba ene (400) mu no re a fiobọhọ kẹ inievo mai wo emu nọ a rẹ re, ibi-imu, gbe eware itieye na efa nọ a gwọlọ. Evaọ ukpe iruo 2020 na, Utu Ẹruorote na o siobọno ugho nọ u bu vi $18 million, (koyehọ ₦7,002,000,000) re a ro fiobọhọ kẹ inievo mai nọ i bu vi idu egba esa gbe ọgba (330,000) evaọ etoke COVID-19 na.

Ikokohọ nọ A Rekọdo No Fihọ Itanẹte

Onana họ orọ ọsosuọ nọ a ro rekọdo eme okokohọ ubrotọ fihọ itanẹte nọ inievo na a rọ jọ iwou obọrai rri rai. Inievo nọ e rrọ Utu Ẹruorote na gbe inievo nọ i bi fiobọhọ kẹ ae họ enọ i ru eme okokohọ na kpobi, a te rekọdo rai fihọ ividio. Kẹsena a tẹ fa ividio nana kpobi fihọ evẹrẹ nọ i bu vi egba isoi (500). A fi ividio eme okokohọ na kpobi fihọ jw.org gbe JW Library rọkẹ inievo na kpobi gbe amọfa re a sai rri rai evaọ iwou obọrai.

A bi Gbe Kpokpo Inievo Mai

Ute no ẹyao COVID-19 na nọ u ru eware rrọ gaga rọkẹ inievo mai no, ukpokpoma nọ u bi te inievo mai evaọ ekwotọ jọ u bi dhe ẹgẹga.

Evaọ ukpe nọ o vrẹ na evaọ obọ Russia, ahwo egọmeti a vẹ ro iwou Isẹri Jihova buobu a te je mu ibuobu rai. Nọ ma be ta ẹme na, inievo-emezae gbe erọ emetẹ mai nọ i bu te udhuvẹ-gbivẹ eye e rrọ uwou-odi evaọ Russia, yọ ivẹ efa e rrọ uwou-odi evaọ Crimea. No anwọ 2017 ze nọ Russian Supreme Court o ro bruoziẹ na, ahwo egọmeti a vẹ ro iwou inievo mai nọ i bu vi odu ọvo (1,000) no.

Isẹri Jihova nọ e rrọ uwou-odi evaọ Eritrea họ enọ e mai bu, enẹna Isẹri Jihova nọ e rrọ uwou-odi evaọ orẹwho yena a bu te udhuvẹ gbe ikpegbivẹ. Paulos Eyasu, Isaac Mogos, gbe Negede Teklemariam, a rrọ usu inievo nọ a fihọ uwou-odi evaọ Eritrea na, a fi inievo esa nana họ uwou-odi anwọ Azie 17, 1994, fikinọ a se nọ a re ru iruo isoja. Inievo-emezae gbe erọ emetẹ udhegbezeza efa e tẹ jẹ rrọ uwou-odi vrẹ ikpe ikpe no.

Ma be lẹ roro inievo mai nọ a fihọ uwou-odi na kpobi, inọ Ọghẹnẹ ọ kẹ ae udu re a gbe thihakọ. Ma riẹ nọ a bi kru ẹrọwọ rai evaọ otọ edawọ nana kpobi.—Eviavia 2:10.

Ma bi Thihakọ avọ Udu

Evaọ ukpe iruo nọ o vrẹ na, Isẹri Jihova wariẹ akpọ na soso họ a be rọ idhere efa ta usi uwoma na, a be rọ idhere ekpokpọ tuduhọ ohwohwo awọ, a bi ru lele ekpọvio nọ i no obọ Utu Ẹruorote na ze, a te je bi koko izi nọ ahwo egọmeti a fihọ. Enana kpobi i dhesẹ nọ a talamu Jihova.

Eware kpobi nọ inievo-emezae gbe erọ emetẹ mai a bi ru evaọ egagọ Ọghẹnẹ, i bi dhesẹ nọ a you Jihova Ọghẹnẹ, Ọmemama na. Yọ onana u ti fiobọhọ kẹ ai thihakọ ebẹbẹ ilogbo nọ e rrọ obaro tha.—Jemis 1:2, 3.