Kpohọ eme nọ e riẹ eva

AKPEGBIVẸ 3, 2020
IYẸRẸ AKPỌ SOSO

Ahwo Egọmeti A Yere Omai Rọkẹ Usi Uvie na nọ Ma Whowho Evaọ 2020

Ahwo Egọmeti A Yere Omai Rọkẹ Usi Uvie na nọ Ma Whowho Evaọ 2020

Evaọ amara Akpegbọvo, Isẹri Jihova nọ e rrọ eria sa-sa akpọ na a daoma kpobi re a rọ Uwou-Eroro uvitha ẹgbede Ọrọ avọ 2, 2020 kẹ ahwo buobu. A rehọ e riẹ kẹ ahwo evaọ eria nọ a be jọ zẹ eki, ifisi, te ahwo uviuwou rai, gbe amọfa nọ a be hai lele ta ẹme Ebaibol. U wo oware jọ nọ ma ru re, nọ ma be hai ru anwẹdẹ hẹ. Ma rọ emagazini nana kẹ ahwo egọmeti buobu. Ma be ta ẹme na, ahwo egọmeti buobu a kere ileta se iwou ogha sa-sa no, bi ro yere Isẹri Jihova.

U wo ọzae jọ nọ a re se Rex Bhonapha evaọ obọ Sierra Leone. Ọye họ ethabọ ohwo nọ o wuzou ọfisi egọmeti nọ a rẹ jọ ma omaa epanọ a rẹ bọ iwou jẹ zẹ etọ evaọ orẹwho na. Ọzae nana o kere ileta se inievo na ro yere ai inọ a riẹ ru nọ a ro vi emagazini na sei. Ọ ta re inọ: “Uzẹme na họ, emagazini rai na ọ lẹliẹ udu te omẹ otọ gaga, yọ mẹ jariẹ wuhrẹ eware buobu. Me bi sei kẹdẹ kẹdẹ.”

Osu Samoa jọ o kere ileta se inievo na ro yere ai fiki emagazini na nọ o te rie obọ. Ọ tẹ jẹ vuẹ ae nọ Olẹ Olori na nọ a ta ẹme kpahe na o wuzou gaga. U te no ere no, osu ọfa evaọ orẹwho yena nọ a re se Tuimalealiifano Vaaletoa Sualauvi II, ọ ta nọ Ebaibol nọ Isẹri Jihova a bi ro wuhrẹ ahwo na o da riẹ ẹro fia. Ọ ta nọ “u bi fiobọhọ kẹ ahwo, o be lẹliẹ ahwo riẹ eware nọ e rrọ Ebaibol re a sai siobọno iruemu nọ i fo ho.” O te je yere Isẹri Jihova nọ a rọ siọ obọ Ọgwa Uvie ba ẹnya, jẹ siọ usi uwoma no uwou ruọ uwou ba fiki ẹyao COVID-19 nọ o bi vo gaga na.

Ohwo ologbo jọ evaọ obọ Chile nọ a re se Osvaldo Cartagena García, ọ ta nọ: “Ajọ ahwo kpobi nọ a rrọ ekwa ilogbo evaọ egọmeti orẹwho mai na a wuhrẹ obọdẹ oware no emamọ usi nana nọ wha bi whowho na ze. Jọ u duobọte ai re a hai ru eware ezi kẹ ahwo kpobi nọ a rrọ ẹwho rai, maero kọ oke nana nọ ẹbẹbẹ nana ọ rrọ otọ evaọ orẹwho mai gbe akpọ na soso na.”

Evaọ obọ Germany, ohwo jọ nọ ọ rrọ ogbẹgwae esuo orẹwho na (Deutscher Bundestag) o kere ileta se uwou ogha mai nọ o rrọ Germany. Ọ jọ ileta na ta nọ: “Me yo kpahe egagọ rai kri no. Egagọ rai na ọ rẹ were omẹ gaga keme mẹ riẹ nọ ahwo rai a re dhesẹ oma via evaọ oria kpobi inọ ae yọ Isẹri Jihova. A rẹ dhozọ họ. . . . Mẹ tẹ jẹ riẹ nọ egagọ rai họ onọ a mai gboja kẹ evaọ oke esuo Nazi.”

A tẹ jẹ jọ ọfisi ologbo egọmeti jọ evaọ Germany yere Isẹri Jihova gaga fikinọ a be tuduhọ ahwo awọ jẹ sasa ae oma anwẹnọ ẹyao COVID-19 na ọ rọ rrọ otọ na. A ta nọ: “Oware nana nọ wha bi ru na o be lẹliẹ okugbe jọ orẹwho mai.”

Ahwo ologbo egọmeti ivẹ evaọ obọ Colombia a kere ọvuọ ileta riẹ se uwou ogha nọ o rrọ Colombia. Aimava na a yere Isẹri Jihova ziezi nọ a rọ kẹ ae emagazini na, a tẹ jẹ ta nọ a te rehọ iẹe kẹ amọfa re, re a sei. Ohwo ologbo ọfa evaọ orẹwho yena, nọ ọ rrọ ọfisi nọ o wuzou orufuọ gbe ẹruorote ẹwho o kere ileta se omai re inọ: “Wha ru kẹhẹ nọ wha ro vi Uwou-Eroro nana se omẹ. Ovuẹ nọ o riẹe eva u re siwi ohwo!”

Ohwo ẹro egọmeti Ghana evaọ obọ Japan nọ a re se Frank Okyere ọ ta nọ: “Eware nọ mẹ jọ emagazini nana se e were omẹ gaga keme o ta kpahe epanọ a sai ro ku ebẹbẹ buobu nọ e rrọ akpọ na họ.”

Ohwo ẹro egọmeti Azerbaijan ọ tẹ jẹ ta nọ: “Me yere owhai gaga nọ wha ro vi Uwou-Eroro obọdẹ nana se omai evaọ ọfisi mai. Me se emagazini na no, yọ o were omẹ gaga.”

Brọda Amaro Teixeira nọ ọ rrọ ọsẹro ofẹ evuẹ kpahe Isẹri Jihova (Public Information Desk) evaọ uwou ogha Mozambique ọ ta nọ: “Iwou nọ ahwo a vi ze no ọvo dede, i tube dhesẹ nọ usi Uvie nọ ma whowho na o were ahwo vi epanọ ma roro. Ma whowho usi na kẹ ahwo buobu nọ ma rẹ kaki te oma ha.” Ẹme yena ọ gba kerọ ọka!

Ma riẹ nọ ahwo egọmeti efa gbe amọfa nọ a yo usi na a te ta epanọ o were rai te, nọ ma gbe bi whowho emamọ usi na kẹ “ahwo kpobi nọ a rrọ ekwa ikpehru” na.​—1 Timoti 2:2.