Kpohọ eme nọ e riẹ eva

Epanọ uwou Ramapo nọ a te jọ ru ividio na ọ te jọ nọ a tẹ bọe re no. Uwoho ọsese na: Ẹgwae nọ ma gba kugbe Town of Ramapo Planning Board evaọ Azeza 28, 2023

AHRẸ 3, 2023
IYẸRẸ AKPỌ SOSO

Iruo Ebabọ Ramapo

A Kuenu kẹ Omai no re Ma Mu Iruo Ebabọ Ramapo na Họ

A Kuenu kẹ Omai no re Ma Mu Iruo Ebabọ Ramapo na Họ

Evaọ edẹ 28 Azeza, 2023, ma yo emamọ usi jọ kpahe uwou nọ ma gwọlọ bọ fihọ Ramapo na, nọ ọ rrọ New York, U.S.A. Enọ e rrọ ogbẹgwae ebabọ iwou evaọ ẹwho na, nọ a re se The Town of Ramapo Planning Board, a kuenu kẹ omai nọ ma sai mu iruo ebabọ na họ. Dede nọ u wo eware efa jọ nọ a ta nọ ma ti ru, a rọwo nọ ma sai mu iruo ebabọ na họ.

Eva e were omai gaga nọ, te emotọ ẹwho na gbe ahwo egọmeti a ta ekpehre ẹme ọvo kpahe ebabọ mai na ha, evaọ okenọ ma jẹ gba ẹgwae kugbe enọ e rrọ ogbẹgwae ebabọ iwou evaọ ẹwho na. Brọda Keith Cady nọ ọ rrọ omọvo ogbẹgwae Construction Project Committee (CPC), ọ ta nọ: “Taure ma tẹ te rehọ omaa-uwou na kẹ enọ e rrọ ogbẹgwae ebabọ iwou evaọ ẹwho na, o rehọ omai emerae buobu, keme ma gwọlọ nọ ma re ru eware kpobi nọ a ta, je ru lele izi ebabọ evaọ ẹwho na. Ma gwọlọ nọ a rẹ ruẹ ẹbẹbẹ ọvo evaọ omaa-uwou na ha, re a sai kuenu kẹ omai lọlọhọ.” Enọ e rrọ ogbẹgwae ebabọ iwou evaọ ẹwho na a ta nọ ma daoma ziezi, fikiere a te je kuenu kẹ omai evaọ oware kpobi kpahe ebabọ na nọ ma ro se ai. Brọda David Soto nọ ọ rrọ ogbẹgwae Construction Project Committee (CPC) na re ọ ta nọ: “Oke nọ ma ro lele ae ta ẹme gbe oke nọ a ro kuenu kẹ omai, u te auwa ọvo dede he!” Ọ tẹ jẹ ta nọ, “Ma yere enọ e rrọ ogbẹgwae ebabọ iwou evaọ ẹwho na rọkẹ iruo nọ a bi ru, osegboja rai, gbe epanọ a bi ro lele omai ru eware kugbe dhedhẹ. Eva e te were omai re ma lele ahwo nọ a rrọ ẹko-iruo ebabọ evaọ ẹwho na ru eware kugbe evaọ obaro.”

Nọ orọnọ a kuenu kẹ omai no na, ma sai mu iruo sa-sa họ evaọ iruo ebabọ Ramapo na. Brọda Cady ọ ta nọ, “Nọ ma tẹ nwane kwa ire nọ ma ko fihọ otọ na no, ma vẹ haya ahwo nọ a rẹ bọ iwou re a mu iruo na họ. Nọ iruo na i te muhọ no, o te gwọlọ nọ inievo buobu a rẹ fialoma via re a fiobọhọ evaọ iruo na evaọ ubrobọ ekuhọ ukpe notha. Eva e were omai kpobi nọ ma jọ etẹe evaọ ẹdẹ yena gaga, nọ enọ e rrọ ogbẹgwae ebabọ iwou evaọ ẹwho na a kuenu kẹ omai nọ ma sai mu ebabọ na họ.”

Ma yere Jihova nọ ọ sai ro ru ei lọhọ re a kuenu kẹ omai. Ma be lẹ nọ jọ Jihova ọ gbẹ ghale ahwo kpobi nọ a ti wobọ evaọ iruo na re a “kru oma ga kẹ iruo iwoma” nọ ma ti ru na.—Nehemaya 2:18.