Evaọ Akpe 25, 2016, prẹsidẹnte Turkmenistan ọ kẹ udu nọ a siobọno ahwo 1,500 nọ e jọ uwou-odi. Nọ a siobọno ahwo na, a rọwo siobọno Bahram Hemdemov gbe Mansur Masharipov nọ e rrọ Isẹri Jihova ha, enọ a fihọ uwou-odi LBK-12 evaọ Seydi.

Anwọ Asa 2015 a ro fi Hemdemov họ uwou-odi fikinọ a je ru ewuhrẹ Isẹri Jihova evaọ uwou riẹ nọ o rrọ Turkmenabad. Ekọto Turkmenistan a bọwo e riẹ ota inọ o bi ru iruẹru egagọ nọ e wọso egọmeti, fiki oyena a te fi ei họ uwou-odi ikpe ene soso. Evaọ Azeza 2016, a mu Masharipov evaọ Ashgabad fiki erue nọ a gu họ iẹe uzou, a te fi ei họ uwou-odi ukpe ovo. O kẹ iviuwou ahwo nana gbe Isẹri Jihova nọ e rrọ akpọ na soso uye gaga inọ a siobọno ai hi, rekọ a bi rẹro nọ evaọ oke ofa nọ a te wariẹ kẹ udu nọ a siobọno ahwo uwou-odi, a ti siobọno ai.