Eva e were ezae esa nana Hye-min Kim, Lak-hoon Cho, gbe Hyeong-geun Kim, gaga inọ a be nya no okọto na ruọ otafe ababọ oware ovo nọ a ru rai, yọ a ti fi ai họ uwou-odi gbe he. Oziẹ na o gbe rai unu gaga keme a rehọ e rai guẹdhọ fikinọ obruoziẹ-iroro rai o kẹ rai uvẹ kuomagbe iruo isoja ha, yọ egọmeti ọ be hae rọ fiki onana fi ezae udhusoi buobu họ uwou-odi kukpe kukpe evaọ South Korea. Ezae esa nana a roro vievie he inọ a ti fi ai họ uwou-odi hi, keme a rehọ fiki ẹme nana nọ o kri otọ no na nọ o bi wo ekuhọ họ na fi esẹ rai gbe amọfa nọ i bu vi idu ikpegbizii (19,000) họ uwou-odi no. Oziẹ nọ okọto Gwangju nọ a rẹ wariẹ tu ẹdhọ kpohọ o bru inọ “a reabe he” na họ orọ ọsosuọ kpobi, yọ oziẹ na o ti ru nọ ẹme nana nọ o kri otọ no na o ti ro kuhọ ẹdẹjọ.

Okọto Gwangju nọ A rẹ Wariẹ Tu Ẹdhọ Kpohọ O Bru “Oziẹ nọ Ọ Mai Woma Evaọ Ukpe Na”

O tẹ kawo, ebe-usi egba ivẹ e niyẹrẹ kpahe ẹme nana no, a ta kpahe oware nọ u ti no oziẹ nana ze gbe epanọ ahwo buobu a be rọ gwọlọ riẹ oghẹrẹ nọ ẹme na ọ rrọ enẹna. Obe-usi jọ o se oziẹ na “oziẹ nọ ọ mai woma nọ a bru no evaọ ukpe na,” yọ obe-usi ofa jọ o kele oziẹ nana kugbe iziẹ isoi nọ e mai woma nọ a bru no evaọ 2016 evaọ South Korea.

Oziẹ nọ okọto nọ a rẹ wariẹ tu ẹdhọ kpohọ na o bru na u dhesẹ nọ oghẹrẹ nọ eriẹ-izi gbe ibruoziẹ a rri ẹme nana o muhọ enwene no. Evaọ edhọ jọ nọ a gu kẹle na, ibruoziẹ na a ruẹ nọ uvi uyoyou gbe ọdawẹ oye o be wọ ezae nana ru oware nọ a bi ru na, fikiere ma te bruoziẹ inọ o rrọ oware ọgbahọ re a kuomagbe iruo isoja hayo inọ ma te kẹ ohwo nọ ọ rọwo kuomagbe iruo isoja ha uye, o te wọso udu nọ ezae nana a wo nọ a rẹ rọ rehọ obruoziẹ-iroro rai salọ oware nọ a gwọlọ ru. Ibruoziẹ na a te ku ẹme na họ inọ ezae nana a wo “emamọ ẹjiroro” nọ a be rọ siọ iruo isoja na. Fikiere ukpenọ a rri rai wọhọ ahwo nọ a be gwọlọ unoma nọ a rẹ rọ siọ iruo isoja ba eru, isia ikpegbezeza soso ibruoziẹ na a bruoziẹ kẹ ahwo inọ a reabe he evaọ emerae udhe nọ i kpemu na.

Ọriẹ-izi nọ a re se Du-jin Oh nọ o dikihẹ kẹ ahwo nọ obruoziẹ-iroro rai o kẹ uvẹ inọ a ru iruo isoja ha ọ ta nọ: “Emamọ oziẹ nọ a bi bru enẹna u woma kẹhẹ.” Ọ tẹ jẹ ta nọ: “Eva e were omẹ gaga nọ mẹ be ruẹ iziẹibro efa buobu nọ a bi jo kuenu kẹ ahwo inọ a reabe he maero evaọ okọto ukpehru. Evaọ iziẹibro nana kpobi, ọnọ o re fi ẹme họ okọto na o wo uvẹ nọ ọ rẹ rọ wariẹ tu ẹdhọ na, rekọ o ru ere he, onọ u dhesẹ nọ oghẹrẹ nọ ibruoziẹ South Korea a bi rri ẹme na enẹna o wha riẹ ze nọ ahwo buobu a bi ro rẹro oghẹrẹ oziẹ nọ Okọto Izi orẹwho na u ti bru kpahe edhọ nọ e rrọ otọ anwẹdẹ kpahe udu nọ ohwo o wo nọ ọ rẹ rọ rehọ obruoziẹ-iroro riẹ salọ oware nọ ọ gwọlọ ru.”

Epanọ Edhọ na Kpobi I Ti ro Notọ

Orẹwho na soso o be hẹrẹ oziẹ nọ Okọto Izi South Korea u ti bru. Okọto yena nọ o mai kpehru na o be kiẹ sọ izi orẹwho na e kẹ ahwo uvẹ nọ a rẹ rọ rehọ obruoziẹ-iroro rai salọ sọ a re kuomagbe iruo isoja re a ruẹ sọ u fo re a kẹ ohwo uye fikinọ egagọ riẹ hayo eware efa jọ nọ ọ rọwo e wha riẹ ze nọ ọ rọ se nọ o re kuomagbe iruo isoja ha.

Dae-il Hong nọ ọ rrọ ọtota kẹ Isẹri Jihova obọ South Korea ọ ta nọ: “Iviuwou buobu gbidi gbidi evaọ South Korea a gwọlọ oziẹ nọ o re dhesẹ adhẹẹ kẹ egagọ izoge nọ a rẹ sae gba họ re a ru oware nọ o wọso obruoziẹ-iroro rai hi na. Ma bi rẹro nọ Okọto Izi orẹwho na o ti bru oziẹ nọ u re fi ọghọ họ emoha nana oma.”