Isẹri Jihova nọ e rrọ Russia a tu ẹdhọ se Okọto Russia nọ O Mai Kpehru fikinọ oziẹ nọ a bru na o whaha Isẹri Jihova egagọ rai. Oziẹ nọ Yuriy Ivanenko o bru evaọ Ane 20, u fi awhaha họ udu nọ Isẹri Jihova a wo nọ a re ro ruiruo egagọ rai evaọ orẹwho na soso. Abọjọ Okọto Russia nọ O Mai Kpehru na nọ ibruoziẹ esa a ru via a te wariẹ keria kẹ ẹme na evaọ Ahrẹ 17, 2017.

Isẹri Jihova a tu ẹdhọ na re a wariẹ oziẹ na bru. Oware nọ a ro tu ẹdhọ na họ, eme atanọ a ro bruoziẹ na keme Isẹri Jihova a be wọso egọmeti hi, a rẹ romakpotọ kẹ egọmeti. Oware ofa họ, Okọto Russia nọ O Mai Kpehru a bruoziẹ na fiki eku nọ a wọ họ Isẹri Jihova uzou nọ a ro gu ẹdhọ no vẹre evaọ etoke Soviet. Rekọ uwhremu na a te wounu kẹ ae evaọ oke Soviet je si eku na no ai uzou. U te no ere no, oziẹ nọ a bru na o wọso izi Russia inọ ohwo o wo udu nọ ọ rẹ rọ salọ egagọ nọ u je rie evaọ akpọ na soso.

Fiki oziẹ nọ a bru na, a bi kpokpo Isẹri Jihova evaọ Russia wọhọ epanọ a je kpokpo ai evaọ etoke Esuo-Ọgbahọ. Elakpa egọmeti a bi kpokpo Isẹri Jihova inọ “iruẹru rai e wọso egọmeti,” ega iruo a bi si Isẹri Jihova no iruo, iticha isukulu a bi kpomovuọ họ emọ Isẹri Jihova oma evaọ iraro emọ-eklase rai, yọ ahwo nọ a mukpahe Isẹri Jihova a be raha iwou egagọ rai, a tubẹ mahe iwou Isẹri Jihova ivẹ muotọ no.

Isẹri Jihova nọ e rrọ akpọ na soso a bi rẹro nọ Abọjọ Okọto Russia nọ O Mai Kpehru na a te ruẹ uzẹme ẹme na je nwene oziẹ nọ a bru vẹre na, re a rọ ere thọ Isẹri Jihova nọ e rrọ Russia a ve je wo uvẹ nọ a rẹ rọ gọ Ọghẹnẹ rai ziezi.