Kpohọ eme nọ e riẹ eva

OBUFIHỌ RỌKẸ UVIUWOU

Epanọ Whọ Sae rọ Kpọ Ofu Ra

Epanọ Whọ Sae rọ Kpọ Ofu Ra

 Ma rehọ iẹe nọ ọrivẹ-orọo ra ọ ta ẹme jọ hayo ru oware jọ nọ o dha owhẹ eva gaga, ofu na ọ tẹ rrọ owhẹ eva. Kẹsena nọ ọrivẹ-orọo ra o muẹrohọ nọ oware jọ o be thọ, ọ tẹ be daoma riẹ oware nọ o be kẹ owhẹ uye na. Onana o tẹ lẹliẹ eva dha owhẹ ga vi epaọ ọsosuọ. Ẹvẹ whọ sae rọ kpọ ofu ra evaọ oghẹrẹ uyero utiona?

 Oware nọ whọ rẹ riẹ

  •   Whọ tẹ be hai mu ofu ẹsikpobi, o rẹ sae lẹliẹ owhẹ mọ. Ekiakiẹ sa-sa nọ ahwo a ru no i dhesẹ nọ ahwo nọ a re mu ofu gaga a rẹ sai wo ebẹbẹ sa-sa, wọhọ ẹyao BP, ẹyao udu, ọkora, gbe eyao eva sa-sa. Ofu ọ rẹ sae jẹ whaha ohwo owezẹ, ru ohwo jọ awawa, wo eyao sa-sa evaọ ohọroma riẹ, je wo ẹyao okie. Agbẹta nọ Ebaibol na ọ rọ ta nọ: “Se ofuomuo ba . . . , keme ofuomuo ọ rẹ wha umuomu tha.”—Olezi 37:8.

  •   Ofu nọ a rẹ gba dhe eva o rẹ wha uye ze re. Ofu nọ a fihọ eva ọ wọhọ ẹyao nọ ọ rrọ obọ eva kẹ ohwo uye. Wọhọ oriruo, onana o rẹ sai ru nọ who re ro mu ovao họ ẹsikpobi, hayo rọ ekpehre ubiẹro rri amọfa. Oghẹrẹ uruemu utiona o rẹ sai ru ei bẹbẹ re who lele ahwo rria dhedhẹ, yọ o rẹ sae wha ebẹbẹ fihọ orọo ra.

 Oware nọ whọ rẹ sai ru

  •   Daoma tẹrovi uruemu uwoma ọrivẹ-orọo ra. Fodẹ iruemu esa nọ e jọ oma orivẹ-orọo ra were owhẹ. Kẹsena nọ ọ tẹ ta ẹme hayo ru oware jọ nọ o dha owhẹ eva, who ve roro kpahe emamọ iruemu yena. Onana o sai fiobọhọ kẹ owhẹ kpọ ofu ra.

     Ehri-uzi Ebaibol: “Wha hai dhesẹ nọ wha wo edẹro.”—Ahwo Kọlọsi 3:15.

  •   Daoma hae rọvrẹ. Orọ ọsosuọ, daoma rri eware epanọ ọrivẹ-orọo ra o bi rri rai. Onana u ti fiobọhọ kẹ owhẹ wo ororokẹ. (1 Pita 3:8) U te no ere no, nọ omara nọ, ‘Kọ oware nọ u bi ru eva dha omẹ na o ga te epanọ mẹ gbẹ sae rọvrẹ hẹ?’

     Ehri-uzi Ebaibol: “[Ehru o rrọ] rọkẹ ẹe re o ri oruthọ jọ vo.”—Itẹ 19:11.

  •   Ma ẹme ra te jẹ rọ uwowou ta oware nọ o be kẹ owhẹ uye. Ta eme nọ i re dhesẹ oghẹrẹ nọ oware na o rrọ owhẹ oma. Wọhọ oriruo, ukpenọ whọ rẹ ta nọ, “Who wo ororokẹ he, oyejabọ nọ who gbe ro se omẹ hẹ re whọ vuẹ omẹ oria nọ whọ rrọ,” whọ sae ta nọ, “Mẹ jẹ ruawa kpahe owhẹ fikinọ oke u thabọ gaga no, yọ mẹ riẹ hẹ sọ oware jọ o via.” Whọ tẹ rọ unu kpotọ ta ẹme, o sai fiobọhọ kẹ owhẹ kpọ ofu ra.

     Ehri-uzi Ebaibol: “Jọ eme rai e hae jọ wowou ẹsikpobi, wọhọ ẹsenọ a fi uwhei họ ae.”—Ahwo Kọlọsi 4:6.

  •   Gaviezọ avọ adhẹẹ. Nọ whọ tẹ ta ẹme nọ ọ rrọ owhẹ eva no, gaviezọ kẹ ọrivẹ-orọo ra ababọ ẹme nọ who re bru dhei unu. Nọ ọ tẹ ta re no, daoma rọ umutho eme ta oware nọ ọrivẹ-orọo ra ọ ta na sọ who wo otoriẹ rai vevẹ. Whọ tẹ be gaviezọ ziezi, u re fiobọhọ kẹ owhẹ kpọ ofu ra.

     Ehri-uzi Ebaibol: “Jọ ọnọ ọ rẹ kaki yo, ọnọ ọ rẹ rọ okpakpa ta ẹme he.”—Jemis 1:19.