Nọ ezae avọ eyae jọ a tẹ rọo te ikpe jọ no, a re gbe dhesẹ uyoyou kẹ ohwohwo tere he. Otẹrọnọ onana o be via evaọ orọo ra, kọ u fo re who rri oware utioye vo?

•  Oware nọ whọ rẹ riẹ

•  Oware nọ whọ rẹ sai ru

 Uyoyou nọ a re dhesẹ u wuzou re whọ sai wo evawere evaọ orọo ra. Wọhọ epanọ o gwọlọ nọ ohwo ọ rẹ hae re emu jẹ da ame kẹse kẹse re oma riẹ o sae ga na, ere uyoyou nọ a re dhesẹ kẹse kẹse o rẹ lẹliẹ evawere jọ orọo je si ọzae-avọ-aye kẹle ohwohwo. Ọzae-avọ-aye a tẹ make rọo kri no, o gbẹ gwọlọ nọ omomọvo o re dhesẹ via kẹ ohwo ọdekọ na ẹsikpobi inọ o you rie gaga je wo isiuru kpahe iẹe.

 Uvi uyoyou u re wo uruemu oriobọ họ. Ohwo nọ o wo uvi uyoyou o re roro kpahe oware nọ o rẹ wha evawere se ọrivẹ riẹ. Fikiere ọzae hayo aye nọ o wo ororokẹ ọ rẹ riẹ ẹgwọlọ ọrivẹ riẹ, ọ vẹ daoma ru ẹgwọlọ yena gba orọnikọ o re dhesẹ uyoyou okenọ u no rie eva ze ọvo ho.

 Ẹsibuobu, eyae họ enọ e rẹ mae gwọlọ nọ a dhesẹ uyoyou kẹ ae. Ọzae ọ sai you aye riẹ gaga. Rekọ otẹrọnọ ohiohiẹ gbe owọwọ, hayo okenọ ọ gwọlọ lele aye riẹ wezẹ ọvo ọ rẹ ta kẹe nọ o you rie, aye na ọ rẹ sae jọ udu riẹ vro sọ ọzae na o gine you rie. O rẹ mai woma re ohwo o dhesẹ uyoyou ẹsibuobu evaọ okpẹdoke kpobi.

 Rehọ ẹmeunu dhesẹ uyoyou. Ẹmẹme wọhọ “Me you owhẹ” hayo “Whọ were omẹ kẹhẹ” o rẹ sae lẹliẹ ọzae hayo aye ra riẹ nọ who you rie.

 Ehri-uzi Ebaibol: “Eme ibuobu nọ e vọ udu na, eye unu o rẹ ta via.”—Matiu 12:34.

 Oware jọ nọ u re fiobọhọ: Orọnikọ ẹmeunu ọvo who re ro dhesẹ uyoyou ra via ha. Kere eme uyoyou na fihọ obe, jẹ rehọ ifonu hayo ekọmputa vi ai.

 Rehọ uruemu dhesẹ uyoyou. Ẹgbalọ, ẹviọlọ, hayo obọ ọrivẹ ra nọ who re kru o rẹ sai dhesẹ kẹe nọ ẹme na o no owhẹ eva ze nọ whọ tẹ ta kẹe nọ “Me you owhẹ.” Whọ rẹ sai je dhesẹ nọ who bi roro kpahe iẹe nọ whọ tẹ rọ omobọ tei, rri rie uriwo nọ u dhesẹ uyoyou, hayo nọ whọ tẹ be hae dẹ oware ro ru ei ọghọ ẹmẹsejọ. Kọ ẹvẹ who roro kpahe obọ nọ who re fihọ kẹ aye ra wọhọ ẹkpa nọ whọ rẹ wọ, ẹthẹ nọ who re rovie, imidhe ewozẹ, iwu efọrọ, hayo emu othere? Ahwo buobu a re rri eware nana wọhọ odhesẹvia uyoyou orọnikọ ọbọ nọ who fihọ kẹ ae ọvo ho!

 Ehri-uzi Ebaibol: “Uyoyou mai o rẹ jọ orọ ẹmeunu hayo unu [ọvo ho], rekọ ma rẹ rọ iruo dhesẹ iẹe via.”—1 Jọn 3:18.

 Oware jọ nọ u re fiobọhọ: Ru ọzae hayo aye ra oghẹrẹ nọ who je ru ei okenọ wha jẹ nya usu orọo.

 Wha fi oke họ nọ wha rẹ rọ jọ kugbe. Wha te wo oke nọ whai imava ọvo wha rẹ rọ jọ kugbe, u re ru usu rai ga je dhesẹ kẹ ọrivẹ ra nọ ọ gbẹ be were owhẹ. Uzẹme riẹ họ, o rẹ sae jọ bẹbẹ re wha ruẹrẹ oke utioye họ otẹrọnọ wha wo emọ hayo wha wo eware buobu nọ i wuzou nọ wha re ru kẹdẹ kẹdẹ. Rekọ whai imava ọvo wha sai kpohọ ore no oke te oke.

 Ehri-uzi Ebaibol: “Vuhu eware nọ e mae roja.”—Ahwo Filipai 1:10.

 Oware jọ nọ u re fiobọhọ: Ezae-avọ-eyae jọ nọ a rẹ kaki wo uvẹ hẹ a re kpohọ ore evaọ owọwọ jọ nọ a fihọ hayo jọ kugbe evaọ urere ẹkpoka.

 Riẹ ọzae hayo aye ra ziezi. Ohwo kpobi o wo oghẹrẹ nọ ọ gwọlọ nọ a re ro dhesẹ uyoyou kẹe. Wha ta kpahe oghẹrẹ nọ whai omomọvo ọ gwọlọ nọ a ro dhesẹ uyoyou kẹe, jẹ ta sọ o gbẹ gwọlọ omodawọ evaọ abọjọ. Kẹsena whọ vẹ daoma ru oware nọ ọrivẹ ra ọ gwọlọ na ziezi. Kareghẹhọ nọ uyoyou nọ a re dhesẹ u wuzou re whọ sai wo evawere evaọ orọo ra.

 Ehri-uzi Ebaibol: “Uyoyou . . . o rẹ gwọlọ ewoma obọriẹ hẹ.”—1 Ahwo Kọrint 13:4, 5.

 Oware jọ nọ u re fiobọhọ: Ukpenọ whọ ta kẹ ọrivẹ ra nọ o dhesẹ uyoyou kẹ owhẹ, nọ omara nọ, ‘Eme me re ru re ọrivẹ mẹ ọ sai you omẹ vi epaọ ọsosuọ?’