Oware nọ whọ rẹ sai ru

Riẹ oghẹrẹ ahwo nọ who re lele nyusu. Otẹrọnọ egbẹnyusu gbe emọ eklase ra a be ta ẹme kpahe owezẹ ezae avọ eyae, o rẹ jọ bẹbẹ kẹ owhẹ re who si iroro itieye no udu otẹrọnọ whọ be hai kuomagbe ai ta oghẹrẹ eme itieye na. Whọ rẹ sai si unu ra no eme itieye na evaọ oghẹrẹ nọ a gbe ro se owhẹ ẹkoko ho inọ who rri oma ra kiẹrẹe gaga.

Kọ whọ te kuvẹ re eware nọ e rẹ sae raha ekọmputa ra e ro ẹe eva? Kọ fikieme whọ rẹ rọ kuvẹ re ekpehre iroro e ruọ owhẹ udu?

Siomano eware omaweromẹ etọtọ. A bi ru eware omaweromẹ buobu nẹnẹ evaọ oghẹrẹ nọ e rẹ rọ kpare isiuru owezẹ. Ohrẹ vẹ Ebaibol na o kẹ kpahe onana? “Wha jọ oma ru oma mai fo uno eware nọ i re zue oma gbe ẹzi, re ma ru oma mai, [ọrẹri] kiete eva ozodhẹ Ọghẹnẹ.” (2 Ahwo Kọrint 7:1) Whaha eware omaweromẹ gbe ighe kpobi nọ e rẹ kpare isiuru owezẹ.

Kareghẹhọ onana: Orọnikọ ohwo nọ o wo isiuru owezẹ yọ ohwo oyoma ha. Ọghẹnẹ ọ ma ọzae avọ aye re a wo isiuru kẹ ohwohwo, yọ ahwo nọ a rọo no a rẹ sae wezẹ kugbe. Fikiere, otẹrọnọ who wo isiuru owezẹ egaga, who roro nọ whẹ yọ ekpehre ohwo ho hayo inọ whọ rẹ sai siomano uruemu otọtọ họ.

Ẹme na họ: Whọ rẹ sae kpọ eware nọ who re roro kpahe. Whọ rẹ sae jọ fuafo evaọ iroro gbe uruemu nọ whọ tẹ gwọlọ ere.