Kpohọ eme nọ e riẹ eva

Kpohọ eme nọ e kẹle obọ emuhọ

Isẹri Jihova

Isoko

Kọ U Fo re Me No Isukulu?

Kọ U Fo re Me No Isukulu?

Roro kpahe enọ nana

O tẹ kawo, ẹvẹ uzi orẹwho ra o gwọlọ nọ ohwo o re kpohọ isukulu te? Kọ who kpohọ isukulu te ere no? Whọ tẹ siọ isukulu ba kiyọ who bi lele ohrẹ Ebaibol ho, onọ o ta nọ ma yo “ẹme enọ a kẹ udu na.”—Ahwo Rom 13:1.

Kọ eware nọ whọ gwọlọ evaọ isukulu i t’owhẹ obọ no? Eme whọ gwọlọ nọ isukulu i re fi obọ họ kẹ owhẹ ru? Otẹrọnọ whọ riẹ hẹ, daoma riẹ. Ogbẹrọ ere he, whọ vẹ te jọ wọhọ ohwo nọ ọ rrọ eva itreni rekọ ọ riẹ obonọ ọ be nya ha. Fikiere, te owhẹ te ọsẹgboni ra wha ta kpahe abọ nọ ọ rrọ obotọ na nọ uzoẹme riẹ o rrọ “ Itee Isukulu Mẹ.” Whọ tẹ siọ isukulu ba yọ who ri ru te epanọ whẹ avọ ọsẹgboni ra wha ta na ha, kiyọ whọ dhẹ no isukulu.

Who te no isukulu, whọ wọhọ ohwo nọ ọ be la no itreni, yọ o ri te oria nọ ọ be nya ha

Fikieme whọ rọ gwọlọ no isukulu? O sae jọnọ whọ gwọlọ kọ okọ nọ who re ro fi obọ họ kẹ uviuwou ra, hayo whọ gwọlọ fialoma via kẹ iruo jọ. O sae jẹ jọnọ whọ gwọlọ siọ isukulu ba fikinọ whọ be dhozọ ẹdawọ hayo whọ gbẹ gwọlọ ru iruo isukulu nọ a rẹ k’owhẹ wha kpo ho. U fo re whọ daoma riẹ oware nọ o be lẹliẹ owhẹ gwọlọ siọ isukulu ba na—sọ emamọ ẹjiroro hayo emamọ họ. Otẹrọnọ whọ siọ isukulu ba fikinọ whọ gwọlọ ruẹ uye he, whọ te ruẹ nọ akpọ ọ lọhọ họ.

Ohwo nọ ọ siọ isukulu ba ọ wọhọ ohwo nọ ọ la no itreni yọ o ri te oria nọ ọ be nya ha. O sae jọnọ oria nọ whọ keria evaọ itreni na u kiehọ owhẹ oma ha yọ ahwo nọ a rrọ eva riẹ kugbe owhẹ a were owhẹ hẹ, rekọ nọ whọ tẹ la no itreni na, who ti te obonọ whọ be nya ha, yọ whọ te se oma ba ẹnwa ha. U te no ere no, otẹrọnọ whọ siọ isukulu ba, o te jọ bẹbẹ kẹ owhẹ re whọ ruẹ iruo. Yọ whọ tẹ tubẹ ruẹ iruo, osa ra u ti te epanọ o hae te jọ họ orọnọ who nwrotọ no isukulu.

Ukpenọ whọ rẹ siọ isukulu ba, daoma ku ebẹbẹ nọ who wo evaọ obọ isukulu họ. Nọ who te bi ru ere, who ti wo ithihakọ, yọ u ti fi obọ họ kẹ owhẹ evaọ obaro nọ who te mu iruo họ no.

 Itee Isukulu Mẹ

Obọdẹ edhere jọ nọ isukulu i re ro fi obọ họ kẹ owhẹ họ, i re ru owhẹ wo iruo nọ whọ rẹ rọ rẹrote omara gbe uviuwou ra evaọ obaro. (2 Ahwo Tẹsalonika 3:10, 12) Kọ whọ jiroro oghẹrẹ iruo nọ whọ gwọlọ gbe oghẹrẹ nọ isukulu e te rọ ruẹrẹ owhẹ kpahe kẹ iruo itieye na no? Re whọ riẹ sọ isukulu e be ruẹrẹ owhẹ kpahe kẹ iruo nọ whọ gwọlọ ru, kẹ iyo enọ nana:

  • Abọ vẹ mẹ be hae jọ daoma ziezi? (Wọhọ oriruo, kọ whọ rẹ riẹ yerikugbe amọfa? Kọ o rẹ were owhẹ re who ku eware hayo re whọ ruẹrẹ eware nọ e raha? Kọ whọ rẹ daoma roro kpahe ebẹbẹ jẹ riẹ epanọ who re ro ku ai họ?)

  • Didi iruo me ti ru nọ e whobọ kpahe eware nọ mẹ riẹ eru ziezi?

  • Oghẹrẹ iruo vẹ ahwo a bi ru evaọ oria nọ mẹ be rria?

  • Isukulu vẹ mẹ be nya enẹna nọ i ti fi obọ họ kẹ omẹ wo iruo?

  • Isukulu vẹ mẹ rẹ nya re mẹ sai wo oghẹrẹ iruo nọ mẹ gwọlọ lọlọhọ?

Kareghẹhọ nọ oware nọ whọ gwọlọ họ, isukulu nọ whọ rẹ nya nwrotọ nọ i re wo iruo k’owhẹ evaọ obaro. Fikiere whọ jọ isukulu ri fihọ họ, re whọ jọ ọmọmọ. O wọhọ ohwo nọ ọ rrọ itreni nọ ọ gwọlọ nwrotọ họ.