Whọ rẹ sae nọ nnọ: “Kọ o ginẹ thọ re me lele ohwo jọ wezẹ? Ogbẹrọnọ ere ohwo kpobi o bi ru?”

Roro te!

Uzẹme na họ: Orọnikọ ohwo kpobi o bi ru ere he.

Ẹsejọhọ whọ ginẹ jọ ebe se no inọ ahwo buobu a bi lele ezae hayo eyae wezẹ. Wọhọ oriruo, ekiakiẹ jọ nọ a ru evaọ obọ America i dhesẹ nọ, nọ a tẹ ghale emọ nọ e rrọ isukulu kpohọ abọ asa, abọ ava a bi gbe-ọfariẹ taure a te ti nwrotọ no isukulu. Rekọ muẹrohọ inọ abọ ọvo soso a bi gbe-ọfariẹ hẹ.

Kọ ẹvẹ kpahe enọ i bi gbe-ọfariẹ? Otu nọ a re ru ekiakiẹ a kiẹ via no inọ izoge nọ i bi gbe-ọfariẹ a rẹ reoja eware nọ ma jọ obotọ fodẹ na.

A rẹ vioja. Izoge buobu nọ i gbe-ọfariẹ a rẹ vioja inọ a riẹ a hai ti ru ei hi.

Ohwo nọ o bi gbe-ọfariẹ ọ wọhọ ohwo ọ be rehọ emamọ uwoho ru uririe-awọ

A re gbe fievahọ ohwohwo ho. Nọ ọmọtẹ avọ ọmọzae a tẹ wezẹ kugbe no, a re gbe fievahọ ohwohwo ho keme a ti muhọ eroro kpahe ohwohwo nọ, ‘Ẹsejọhọ o bi lele omọfa wezẹ re.’

A re gbe rri ohwohwo fioka ha. Emetẹ buobu a re gbe wo adhẹẹ kẹ ọmọzae nọ o lele i rai wezẹ no ho, keme ohwo nọ ọ rẹ thọ ae a gwọlọ orọnikọ ọnọ ọ rẹ raha ae fihọ otọ họ. Epọvo na re, nọ ọmọzae o te lele ọmọtẹ wezẹ no, ọmọtẹ na ọ rẹ gbẹ were iẹe he.

Ẹme na họ: Ugboma ra na o ghare vi oware nọ a re ro jijehwẹ. Dhesẹ nọ whọ gba riẹ mu nọ who re ru oware uwoma ẹkwoma uzi Ọghẹnẹ kpahe ọfariẹ-ogbe nọ who re koko. Kẹsena nọ whọ tẹ rọo no, whọ sae wezẹ kugbe ọzae hayo aye ra. Yọ oke yena whọ te reawere riẹ ababọ ebẹbẹ nọ i re no ọfariẹ-ogbe ze.—Itẹ 7:22, 23; 1 Ahwo Kọrint 7:3.