Kpohọ eme nọ e riẹ eva

ENỌ IZOGE NA

Ẹvẹ Mẹ Sae Rọ Nyẹ Ofu Mẹ?

Ẹvẹ Mẹ Sae Rọ Nyẹ Ofu Mẹ?

 Arozaha nọ a rẹ jọ nọ enọ

  • Ẹvẹ eva e rẹ dha owhẹ kpekpe te?

    • o rẹ kake via ha

    • umutho ẹse

    • kẹse kẹse

  • Ẹvẹ ofu ra o re yoma te?

    • ọ rẹ ga tere he

    • ọ re jọ gaga

    • o re vrẹta

  • Ono whọ be hae mae muofu kẹ?

    • ọsẹ hayo oni ra

    • oniọvo ra

    • ogbẹnyusu ra

U te ginẹ mu owhẹ ẹro nọ u fo nọ whọ rẹ nyẹ ofu ra, uzoẹme nana u ti fiobọhọ kẹ owhẹ ru ere! Orọ ọsosuọ, riẹ oware nọ u je fo re whọ nyẹ omara nọ a te ru eva dha owhẹ.

 Oware nọ u je wuzou

U re fiobọhọ kẹ omara. Itẹ 14:30 o ta nọ: “Udu udhedhẹ [o] rẹ kẹ iwo uzuazọ.” Evaọ abọdekọ riẹ, “ofu ọ rẹ sae wha ẹyao udu họ ohwo oma,” ere obe na Journal of Medicine and Life o ta.

Egbẹnyusu ra. Ebaibol ọ ta nọ: “Who lele ohwo nọ o re muofu jọ ogbẹnyusu hu, hayo ọnọ ọ rẹ gwọlọ ẹwhọ.” (Itẹ 22:24) Otẹrọnọ who wo ofu ọkpakpata yọ ahwo a gbẹ be kẹle owhẹ tere he, riẹ nọ ofu ra na ọ be whae ze. “Otẹrọnọ whọ gbẹ sae ru ofu ra na họ ojọ họ,” “riẹ nọ who ti wo emamọ ogbẹnyusu ọvuọvo ho,” ere ọmọtẹ jọ nọ a re se Jasmine ọ ta.”

Odẹ nọ who ti wo. “Otẹrọnọ whọ rẹ sae nyẹ ofu ra ha, riẹ nọ ahwo a te rọ emamọ ubiẹro rri owhẹ hẹ,” ere ọmọ 17 nọ a re se Ethan ọ ta. Nọ omara nọ, ‘Ẹvẹ mẹ gwọlọ nọ ahwo a rri omẹ fihọ—ohwo nọ uzou riẹ o rrọ uwou hu manikọ ohwo odhedhẹ nọ ọ rẹ gwọlọ ẹme he?’ Ebaibol ọ ta nọ: “Ọnọ ọ rẹ kake muofu hu o re riwi oware muẹ gaga, rekọ ọnọ o re muofu ọkpakpata o re ru eware igheghe.”—Itẹ 14:⁠29.

Ohwo ọvo nọ ọ rẹ gwọlọ jọ kugbe ohwo ofu ọkpakpata ọ rrọ họ

 Oware nọ whọ sai ru

Kiẹ eria Ebaibol gbe eme nọ e rrọ obotọ na riwi, re whọ rehọ enọ nọ i lele rai na kiẹ oma ra riwi.

  • Itẹ 29:22: “Ohwo ofu ọ rẹ rariẹ ẹwhọ, ọgbaofuomuo ọ rẹ wha uzioraha buobu tha.”

    “Okenọ mẹ gbẹ jọ ikpekpogbọ, mẹ jẹ hẹ sae nya oma mẹ vievie he. Imoni ọsẹ mẹ jọ i wo uruemu nana re. Fikiere ma te sei oware uwou. Ma wo ofu ọkpakpata gaga!”—Kerri.

    Kọ me wo ofu ọkpakpata? Kọ otẹrọnọ a te jiri owhẹ fiki emamọ iruemu nọ who wo whọ rẹ ta nọ ahwo unuwou ra who tho ho, kẹvẹ u je te ekpehre uruemu whọ vẹ ta nọ ahwo unuwou ra who tho?

  • Itẹ 15:1: “Uyo olọlọhọ o rẹ whaha ofu, rekọ ẹme ọgaga ọ rẹ rariẹ ofu.”

    “Daoma hae nyẹ ofu ra. Daoma wo uruemu ohwo odhedhẹ, who se ẹme kpobi gbe ọdawẹ hẹ, who te ru ere who ti gbe wo ofu ọkpakpata ha, yọ wo ti gbe wo ẹme kugbe ahwo tere gbe he.”—Daryl.

    Fikieme mẹ gbẹ sae nyẹ oma mẹ hẹ nọ a te ru omẹ eva dha?

  • Itẹ 26:20: “Nọ ire e rọ erae he, erae i ve fu.”

    “Nọ mẹ tẹ rọ unu uwowolẹ kẹ ohwo na uyo, u re ru ofu riẹ kpotọ, mai imava ma vẹ ta ẹme ababọ ofu mai nọ ọ rẹ sa zue.”—Jasmine.

    Oghẹrẹ vẹ ẹme hayo uruemu mẹ o sae rọ tua ofu nọ ọ rrọ ohwo eva?

  • Itẹ 22:3: “Ohwo owareghẹ ọ ruẹ ese o re siomano, rekọ ogbori o re zue ruẹe, ọ vẹ ruẹ uye riẹ.”

    “Oware nọ me re ru ẹsejọ họ, mẹ rẹ nya no etẹe, mẹ vẹ rehọ omoke jọ roro didi kpahe oware nọ o via na, onana u re eme mẹ jọ wowolẹ evaọ oke ofa nọ ma te ta ẹme na.”—Gary

    Oke vẹ o mae woma nọ whọ sae rọ nyavrẹ nọ ofu o te bi koko họ owhẹ eva, ababọ ohwo na nọ ọ rẹ riẹ nọ eva e dha owhẹ no?

  • Jemis 3:2: “Mai kpobi ma re zoruẹ ẹsibuobu.”

    “Jọ oware nọ ma ru thọ o da omai te onwa, jọ o kẹ omai uwuhrẹ. U fo nọ ma rẹ kpama ababọ oke oraha nọ ma te kie, ma vẹ jẹ gbaemu nọ o rẹ gbẹ via ẹdẹfa ha.”—Kerri.

Dao onana: Fi ute họ. Gbaemu nọ whọ te daoma jọ wowolẹ evaọ etoke jọ—wọhọ amara soso. Kere ei fihọ otọ jẹ hae daoma kiẹe riwi sọ whọ be ginẹ daoma.