Kpohọ eme nọ e riẹ eva

Eme Me re Ru Otẹrọnọ Ọsẹgboni Mẹ A be Fa Orọo?

Eme Me re Ru Otẹrọnọ Ọsẹgboni Mẹ A be Fa Orọo?

Oware nọ whọ rẹ sai ru

Lele ai ta kpahe eware nọ e be kẹ owhẹ uye. Ta kẹ ọsẹgboni ra epanọ oware nọ a gwọlọ ru na o be kẹ owhẹ uye te. Ẹsejọhọ a te ta oware nọ o be via kẹ owhẹ, yọ onana u ti ru awaọruọ ra kpotọ.

Otẹrọnọ ọsẹgboni ra a rọwo ta oware nọ o be via kẹ owhẹ hẹ, whọ sae ta eva kẹ ogbẹnyusu ra jọ nọ ọ rẹ sae kẹ owhẹ emamọ ohrẹ.—Itẹ 17:17.

Maero na, whọ rẹ sae lẹ se Ọsẹ obọ odhiwu ra, “ọnọ o re yo elẹ” na. (Olezi 65:2) Ta eva ra kpobi kẹe “keme ọye ọ be sẹro ra.”—1 Pita 5:7.

Oware nọ whọ rẹ whaha

Re who thihakọ nọ ọsẹgboni ra a tẹ fa orọo o wọhọ ohwo nọ o wiri obọ—o rẹ da, rekọ ẹmẹrera na yọ u bi kpo

Who wo ẹgo ho. Daniel nọ ọsẹgboni riẹ a hẹriẹ evaọ okenọ ọ jọ ikpe ihrẹ ọ ta nọ: “Ọsẹgboni mẹ a wo oriobọ, a je roro kpahe omarai ọvo. A roro kpahe omai vievie he, gbe oghẹrẹ nọ o te kẹ omai uye te.

Eme who roro nọ o rẹ sae via kẹ Daniel nọ o gbe si ẹgo gbe evedha na no udu riẹ hẹ?—Re u fi obọ họ kẹ owhẹ: Se Itẹ 29:22.

Fikieme u ro fo re Daniel ọ daoma rọ vrẹ ọsẹgboni riẹ rọkẹ edada nọ a wha sei na?—Re u fi obọ họ kẹ owhẹ: Se Ahwo Ẹfẹsọs 4:31, 32.

Whaha ekpehre uruemu. Denny ọ ta nọ: “Nọ ọsẹgboni mẹ a fa orọo rai, o wha ọkora se omẹ. Me te mu ẹbẹbẹ họ ewo evaọ obọ isukulu, me tube feli ẹdawọ evaọ ukpe jọ. Kẹsena ... me te zihe ruọ ọgwọlọ-ẹme, yọ mẹ jẹ hae họre ẹsikpobi.

Eme who roro nọ o jẹ lẹliẹ Denny gwọlọ-ẹme jẹ họre ahwo?

Ẹvẹ ẹme nọ ọ rrọ Ahwo Galesha 6:7 ọ sai ro fi obọ họ kẹ ahwo wọhọ Denny whaha ekpehre uruemu?

Nọ a te ru ohwo oware odada, o rẹ kake thọrọ ohwo ẹro ho. Rekọ nọ oke o be nyaharo na, whọ te kpairoro vrẹ.