Kpohọ eme nọ e riẹ eva

Kpohọ eme nọ e kẹle obọ emuhọ

Isẹri Jihova

Isoko

ENỌ IZOGE NA

Kọ Me te Ohwo nọ Ọ rẹ Nya Usu-Orọo No?

Kọ Me te Ohwo nọ Ọ rẹ Nya Usu-Orọo No?
  • Eme họ usu-orọo?

  • Fikieme a rẹ rọ nya usu-orọo?

  • Kọ me te ohwo nọ ọ rẹ nya usu utioye no?

  • Fikieme mẹ jẹ dina hẹrẹ?

Eme họ usu-orọo?

  • Ẹsikpobi whẹ avọ ọmọzae hayo ọmọtẹ jọ wha re no usu hu. Kiyọ usu-orọo?

  • Whẹ avọ ọmọtẹ hayo ọmọzae jọ wha were ohwohwo. Wha rẹ rọ ifonu vi uwou hayo se ohwohwo unuẹse jọ evaọ okpẹdẹ. Kiyọ usu-orọo?

  • Ẹsikpobi nọ whẹ avọ egbẹnyusu ra wha tẹ make rrọ oria, whẹ avọ ohwo nana ọvo wha rẹ gbẹ ta ẹme. Kiyọ usu-orọo?

Ẹsejọhọ uyo onọ ọsosuọ na o te bẹ owhẹ ẹkẹ hẹ. Rekọ whọ te dina dhizu re whọ tẹ kẹ uyo avivẹ gbe orọ avesa na. Rekọ eme a re gine se usu-orọo dede?

Evaọ uzẹme, usu-orọo họ nọ ọmọtẹ hayo ọmọzae jọ ọ tẹ dhẹ ruọ owhẹ oma, yọ whẹ omara whọ dhẹ ruọ iẹe oma re.

Fikiere, iyo enọ esa na kpobi họ Ee. Nọ whẹ avọ ohwo otiọye na wha tẹ be hae ta ẹme ẹsikpobi, o tẹ make rrọ ifonu, hayo ovao-dhe-ovao, evaọ ẹgbede hayo oria nọ ohwo ọ rrọ họ, yọ usu-orọo wha rrọ.

Fikieme a rẹ rọ nya usu-orọo?

Usu-orọo yọ oware arozaha ha. Ukpoye u re fiobọhọ kẹ ọmọzae avọ ọmọtẹ nọ a gwọlọ ruọ orọo riẹ ohwohwo ziezi sọ a kiehọ kẹ ohwohwo.

Rekọ izoge jọ a se usu-orọo gbe oware ovo ho. Ẹsejọ orai họ re a jọ kugbe ọmọtẹ hayo ọmọzae jọ nọ ọ were rai ọvo, orọnikọ a gwọlọ rehọ ohwo na ha. Ejọ dede a rẹ rọ ohwo otiọye na nọ a gbẹ rrọ usu na dhesẹ oma wọhọ ẹsenọ a rrọ kugbe okpohwo, re amọfa a tẹ ruẹ e rai a ve rri ai kpehru.

Rekọ ẹsibuobu, usu okpakpafua utioye na o rẹ tọ họ. Ọmọtẹ jọ nọ a re se Heather ọ ta nọ: “Izoge buobu nọ e rẹ nya usu utioye na, eka bro ọvo yọ a fa no. A re rri usu utioye na wọhọ otiowo nọ a lalọ no a kufiẹ, onọ u re wuhrẹ ai epanọ a rẹ fa orọo viukpenọ o ruẹrẹ ae kpahe kẹ orọo.”

O rrọ vevẹ inọ, who te bi lele ohwo jọ nya usu-orọo o wọhọ ẹsenọ ohwo na o fi udu riẹ họ evabọ ra. Fikiere whọ rọ udu ohwo zaharo ho.—Luk 6:31.

Otẹrọnọ whọ be nya usu rekọ whọ gwọlọ rọo ohwo na ha, whọ wọhọ ọmọ nọ ọ rehọ ọmọ-ibebi nọ a dẹ kẹe zaharo no o ve gbolo iei kufiẹ

Dai roro iei: Kọ o te were owhẹ re ohwo jọ ọ rehọ isiuru nọ who wo kẹe zaharo wọhọ ọmọ-ibebi nọ a tọlọ rọ zaharo no a vẹ nya se iẹe ba otọ? Otẹrọ ere, who ru ere kẹ omọfa ha! Ebaibol na ọ ta nọ uyoyou “u re ru ugberuo ho.”—1 Ahwo Kọrint 13:4, 5.

Ọmọtẹ jọ nọ a re se Chelsea ọ ta nọ: “Ẹsejọ mẹ rẹ gwọlọ roro nọ whọ sai wo ogbẹnyusu ọmọzae gheghe, rekọ uye u re noi ze nọ ohwo jọ o te wo isiuru no, yọ ọdekọ o wo ho.”

Ru Onana: Re whọ ruẹrẹ oma kpahe kẹ usu gbe orọo, se 2 Pita 1:5-7 jẹ jariẹ salọ oware jọ nọ u fo nọ whọ rẹ gbẹ daoma fihọ. Nọ amara ọvo ọ tẹ vrẹ no, kiẹ omara re whọ ruẹ epanọ whọ daoma fihọ iẹe te no.

Kọ me te ohwo nọ ọ rẹ nya usu utioye no?

  •  Ẹvẹ who roro nọ ohwo ọ rẹ kpako te re o te mu usu-orọo họ?

  •  Dae nọ ọsẹ hayo oni ra onọ yena re.

Duọ ohwo duọ ọvuọ uyo riẹ, ẹsejọhọ uyo nọ a te kẹ owhẹ u ti wo ohẹriẹ no ora. Hayo o sae jọ ere he! O sae jọnọ whọ rrọ usu izoge nọ i wo areghẹ nọ e be hẹrẹ bẹsenọ a re te ohwo nọ o re wo aye hayo ọzae no re a te ti mu usu họ.

Ere Danielle, nọ ọ rrọ ikpe 17 ọ gwọlọ ru. Ọ ta nọ: “Oghẹrẹ ọzae nọ mẹ hae rehọ evaọ ikpe ivẹ nọ e vrẹ u wo ohẹriẹ gaga no oghẹrẹ ọzae nọ mẹ gwọlọ enẹna. Makọ enẹna dede mẹ re tubẹ riẹ oghẹrẹ ohwo nọ o ti kiehọ omẹ oma ha. Nọ mẹ tẹ gbẹ dina kpako vi enẹ no je wo areghẹ vi enẹ no omojọ, me ve te ti roro kpahe usu-orọo.”

Oware ofa jọ o riẹ nọ u ro woma re ohwo ọ dina hẹrẹ. Ebaibol na ọ ta ẹme kpahe “udhudhu ọmoha” koyehọ okenọ isiuru kẹ owezẹ ọzae-avọ-aye e rẹ jọ gaga. (1 Ahwo Kọrint 7:36) Nọ whẹ avọ ọmọzae hayo ọmọtẹ jọ wha tẹ be nya usu evaọ oke udhudhu yena, yọ who bi koko erae họ oma ra, nọ o te wha ekpehre isiuru ze je su kpohọ ẹnwae-obro.

Izoge nẹnẹ a re se oyena gbe oware ovo ho. Oma o be kpakpa ibuobu rai re a lele ohwo wezẹ. Rekọ whọ rẹ dadamu re whọ siọ ekpehre eriwo otiọyena ba ewo! (Ahwo Rom 12:2) Makọ Ebaibol na dede ọ vẹvẹ owhẹ unu nọ whọ “dhẹ siọ ọfariẹ-ogbe ba.” (1 Ahwo Kọrint 6:18) Whọ tẹ hẹrẹ re whọ vrẹ udhu ọmoha no re whọ tẹ nya usu-orọo, who ti “si edada” no omara—Ọtausiuwoma Na 11:10.

Fikieme mẹ jẹ dina hẹrẹ?

A tẹ be gba owhẹ họ la ruọ usu-orọo yọ whọ re ruẹrẹ oma kpahe he, o wọhọ ẹsenọ a be gba owhẹ họ kere ẹdawọ nọ a re ro nwrotọ no isukulu yọ who mu isukulu họ obọ. Whọ riẹ nọ oware utioye u woma ha! Keme whọ gwọlọ oke nọ who re ro wuhrẹ eware nọ who ti kere evaọ ẹdawọ na.

Ere ọvona usu-orọo o rrọ re.

Usu oyena yọ oware arozaha ha. Fikiere, re who te ti fiẹrohọ uzedhe ohwo jọ, whọ rẹ rehọ oke ro wuhrẹ kpahe epanọ a rẹ nya usu.

Uwhremu na nọ whọ tẹ ruẹ emamọ ohwo na no, whọ vẹ te sae nabe nya usu na ziezi. Keme emamọ egbẹnyusu ivẹ ae a rẹ jọ emamọ ọzae-avọ-aye.

Whọ tẹ hẹrẹ re who te mu usu họ orọnikọ ifi whọ rọ gba oma ra ha. Rekọ o rẹ kẹ owhẹ uvẹ ziezi nọ who re ro wo “oghọghọ evaọ edẹ upelẹ ra.” (Ọtausiuwoma Na 11:9) Who re je wo uvẹ nọ whọ rẹ rọ ruẹrẹ omara kpahe je wuhrẹ emamọ uruemu, maero na kọ edikihẹ ga evaọ egagọ Ọghẹnẹ.—Enuobro 3:27.

Enẹna, who wo uvẹ nọ whọ sai ro lele emezae gbe emetẹ sa-sa zaharo. Edhere vẹ ọ mai woma nọ whọ sai ro ru ei? Whọ sai kuomagbe ekpako gbe ahwo unuikpe sa-sa re emu, da umudi, zamaro kugbe evaọ udevie rai. Ọmọtẹ jọ nọ a re se Tammy ọ ta nọ: “Oyena o rẹ mae were dede. U woma re ohwo o wo egbẹnyusu buobu.” Monica dede ọ rọwo ẹme ọyena re. Ọ ta nọ: “Nọ ahwo a tẹ be zaharo kugbe ere, u woma wo umuo ho, keme o rẹ lẹliẹ owhẹ ruẹ iruemu sa-sa nọ ahwo a wo.”

Rekọ evaọ abọdekọ riẹ, who te fiẹrohọ ohwo jọ ọvo, yọ who bi si uye se omara. Fikiere whọ họrọ oma ha. Rọ oke nana wuhrẹ epanọ who re ro mu emamọ egbẹnyusu gbe oware nọ o rẹ liẹliẹ usu tọ. Evaọ obaro, who je te ohwo nọ ọ rẹ nya usu-orọo no, yọ whọ riẹ omara ziezi no jẹ riẹ oghẹrẹ ohwo nọ whọ te rehọ no.