Oware nọ whọ rẹ sai ru

Orọ ọsosuọ, kake riẹ oghẹrẹ ahwo nọ o rẹ mae jọ bẹbẹ kẹ owhẹ re who mu usu kugbe.

Ikpe rai:

O rrọ bẹbẹ k’omẹ re me mu usu kugbe . . .

  • ewha mẹ

  • ahwo nọ e dina vi omẹ

  • ekpako

Onaa:

O rrọ bẹbẹ k’omẹ re me mu usu kugbe ahwo nọ . . .

  • a wo onaa aruọzaha jọ

  • a wo obọdẹ onaa jọ

  • a kpohọ isukulu gaga

Uruemu:

O rrọ bẹbẹ k’omẹ re me mu usu kugbe ahwo nọ . . .

  • a wo udu

  • a riẹ odẹ

  • a rẹ jọ usu rai sa

Orọ avọ ivẹ, jọ obotọ na salọ oware nọ who re ru nọ whọ tẹ rrọ kugbe ahwo nọ whọ jọ obehru salọ na.

  • Mẹ rẹ faki ru wọhọ ẹsenọ mẹ avọ ohwo na ma wo eware evona nọ e rẹ were omai hayo onaa ovona.

  • Me re gbobọnẹ eware nọ e rẹ were ae, mẹ vẹ ta kpahe enọ e rẹ were omẹ.

  • Mẹ rẹ fọ kpoko jẹ gwọlọ uvẹ kpobi nọ mẹ rẹ rọ nyavrẹ.

Orọ avọ esa, kake jẹ owọ. Orọnikọ ẹsikpobi whọ rẹ hẹrẹ re amọfa a lele owhẹ ta ẹme he; ẹsejọ o rẹ gwọlọ nọ whọ daoma ta ẹme kugbe ai re. (Ahwo Filipai 2:4) Ẹvẹ whọ sai ro ru onana?

Mu usu kugbe ahwo nọ e make rrọ ewha ra ha. Dai roro iei: Fikieme who re ro bruenu inọ whọ be ruẹ ahwo mu usu kugbe he kpakiyọ ahwo unuikpe jọ ọvo whọ gwọlọ? O wọhọ ohwo nọ ohọo u bi kpe whu evaọ udhude nọ ame ọ wariẹ họ, yọ iyei e vọ ame na.

Oni mẹ ọ vuẹ omẹ nọ mẹ hae daoma lele ahwo nọ e kpako no ta ẹme. Ọ ta nọ mẹ te ruẹ nọ eware jọ nọ e rẹ were omẹ e rẹ were ahwo nana re. Ẹme nọ oni mẹ ọ ta na ginọ uzẹme, yọ enẹna me wo egbẹnyusu buobu no.”—Helena, ikpe 20.

Wuhrẹ onaa ẹmeọta. Eware nọ who re ru họ (1) gaviezọ, (2) nọ enọ, (3) wo ẹgwọlọ amọfa họ iroro.—Jemis 1:19.

Mẹ rẹ daoma gaviezọ ukpenọ mẹ ọvo mẹ rẹ ta ẹme. Yọ nọ mẹ tẹ be ta ẹme, mẹ rẹ ta kpahe omobọ mẹ ọvo ho hayo ta ekpehre ẹme amọfa.”—Serena, ikpe 18.

Nọ ohwo ọ tẹ be ta ẹme kpahe oware nọ mẹ riẹ tere he, mẹ rẹ ta kẹe re o ru ẹme na vẹ, yọ onana u re ru omai ta ẹme kri ziezi.”—Jared, ikpe 21.

Oma o rẹ dina vuọ omẹ, fikiere o jẹ hae jọ bẹbẹ kẹ omẹ re me lele amọfa ta ẹme. Rekọ re whọ sai wo egbẹnyusu, u fo nọ whọ rẹ whẹtiẹ ahwo họ oma. Onana u ru nọ me ro mu ẹme họ ẹta kugbe ahwo.”—Leah, ikpe 16.