Kpohọ eme nọ e riẹ eva

Kpohọ eme nọ e kẹle obọ emuhọ

Isẹri Jihova

Isoko

Eme Me re Ru re Ọsẹgboni Mẹ A Fievahọ Omẹ?

Eme Me re Ru re Ọsẹgboni Mẹ A Fievahọ Omẹ?

Oware nọ whọ rẹ sai ru

Roro kpahe onana: Kọ uruemu nọ whọ be hai dhesẹ evaọ oware kpobi u ru nọ ọsẹgboni ra a gbe bi ro fievahọ owhẹ hẹ?

Wọhọ oriruo, Pọl ukọ na o kere nọ: Ma “guọlọ epanọ ma re ro ru eware na kpobi ziezi.” (Ahwo Hibru 13:18) Nọ omara nọ, ‘Didi uruemu mẹ be hai dhesẹ nọ ọsẹgboni mẹ a tẹ nọ omẹ kpahe oria nọ me bi kpohọ gbe oware nọ me bi ru?’

Salọ odẹ jọ evaọ obotọ na re who se iku ohwo na.

 Lori  Beverly

 Lori

Mẹ jẹ hae lẹlẹ vi uwou se ọmọzae jọ nọ ọ rrọ omẹ ẹro. Nọ ọsẹgboni mẹ a riẹ kpahe onana, a tẹ ta kẹ omẹ nọ mẹ gbẹ dawo iẹe he. Mẹ tẹ vuẹ ae nọ me ti gbe ru ei hi, rekọ mẹ seba ghele he. Me ru onana te ẹgbukpe soso. Me te vi uwou se ọmọzae na, ọsẹgboni mẹ a vẹ riẹ, me ve wounu kẹ ae nọ me ti gbe ru ei hi, rekọ mẹ seba ghele he. U te epanọ ọsẹgboni mẹ a gbe je ro fievahọ omẹ vievie he!

Eme who roro nọ o wha riẹ ze nọ ọsẹgboni Lori a gbe je ro fievahọ iẹe he?

Otẹrọnọ whẹ họ ọsẹ hayo oni Lori, eme whọ hai ru, kọ fikieme?

Eme u fo nọ Lori ọ hai ru nọ ọsẹgboni riẹ a kake ta kẹe nọ o gbe vi uwou se ọmọzae na ha?

 Beverly

Nọ u te te ẹme ọmọzae, ọsẹgboni mẹ a fievahọ omẹ hẹ, rekọ enẹna mẹ riẹ oware nọ o wha riẹ ze no. Mẹ jẹ rrọ oma lẹliẹ emezae ivẹ jọ nọ e rehọ ikpe ivẹ kpako vi omẹ. Mẹ jẹ raha oke krẹkri rọ ta ẹme kugbe ai evaọ ifonu, yọ nọ ma te kokohọ bi ru oware jọ, ae ọvo me re lele ta ẹme re. Ọsẹgboni mẹ a te mi omẹ ifonu mẹ amara soso, yọ a jẹ rọwo nọ me kpohọ oria nọ emezae yena na e rrọ họ.

Otẹrọnọ whẹ họ ọsẹ hayo oni Beverly, eme whọ hai ru, kọ fikieme?

Kọ who roro nọ owọ nọ ọsẹgboni Beverly a jẹ na o ga hrọ? Otẹrọ ere, fikieme?

Eme Beverly ọ hai ru re ọsẹgboni riẹ a fievahọ iẹe?

Oware nọ Who re Ru re A Sae Wariẹ Fievahọ Owhẹ

Oware nọ whọ rẹ sai ru

Re whọ jọ ohwo nọ a re fievahọ nọ whọ be rro te uzoge na, o wọhọ ẹsenọ whọ be gadiẹ kpohọ uwou ehru, ẹmẹrera who re ro te obọ ehru

Orọ ọsosuọ, daoma vuhu abọ nọ a be jọ fievahọ owhẹ hẹ na.

  • Mẹ be hai te uwou evaọ oke nọ a fihọ kẹ omẹ hẹ

  • Me be hai ru lele ẹme mẹ hẹ

  • Me be hai lele oke he

  • Mẹ be hae raha igho kufiẹ

  • Mẹ be hai ru iruo nọ i te omẹ hẹ evaọ uwou na

  • A rẹ rọwo omẹ taure mẹ tẹ kpama

  • Mẹ be hai ru ubrukpẹ mẹ kpatiẹ hẹ

  • Mẹ be hae ta uzẹme he

  • Mẹ be rọ ifonu hayo ekọmputa ruiruo thọthọ

  • Mẹ be hae rọwo iruthọ mẹ je wounu hu

  • Efa

Orọ avọ ivẹ, gbaemu evaọ udu ra. Ru ei fihọ utee ra inọ who re ru eware nọ whọ rọwo fihọ nọ who ti ru na. Ru lele ohrẹ Ebaibol na inọ: “Wha si obọnọ uruemu ẹdẹe nọ wha je yeri, ohwo anwae na.” (Ahwo Ẹfẹsọs 4:22) Nọ oke o be nyaharo na, ọsẹgboni ra gbe amọfa a ti muẹrohọ ẹnyaharo ra.—1 Timoti 4:15.

Orọ avọ esa, ta kẹ ọsẹgboni ra kpahe ọtamuo ra na. Ukpenọ whọ rẹ ta nọ a bi fievahọ owhẹ hẹ, nọ ae avọ adhẹẹ kpahe oware nọ who re ru re a sai fievahọ owhẹ.

Kareghẹhọ onana: Who roro nọ ọsẹgboni ra a te nwani fievahọ owhẹ ẹsiẹsiẹ hẹ. Ababọ avro, a te gwọlọ muẹrohọ sọ who bi ru lele ọtamuo ra na tao. Rehọ uvẹ nana dhesẹ nọ whọ ginẹ gwọlọ nọ a fievahọ owhẹ. Nọ oke o be nyaharo na, ọsẹgboni ra a ti fievahọ owhẹ jẹ kẹ owhẹ uvẹ viere. Epọvo na o jọ rọkẹ Beverly, ọnọ ma fodẹ evaọ obehru na. Ọ ta nọ: “O gwọlọ omodawọ gaga re ọsẹgboni ra a sae wariẹ fievahọ owhẹ.” O fibae nọ, “A bi fievahọ omẹ enẹna, yọ eva e be were omẹ!”

Ẹme na họ: Epanọ whọ riẹ ru te, ere amọfa a re fievahọ owhẹ te.